ກອງປະຊຸມລາຍງານຜົນສໍາເລັດໃນການຈັດຕັ້ງປະຕິບັດຂະບວນການ ວສຊ ຫມາກແດງໃຫຍ່-ຫມາກແດງນ້ອຍ ໃນທົ່ວປະເທດ ແລະ ແຜນບຸລິມະສິດ ໃນ 6 ເດືອນ ທ້າຍປີ 2024. ໄດ້ຈັດຂຶ້ນໃນວັນທີ 16-17 ກໍລະກົດ 2024ນີ້ ທີ່ເມືອງແກ້ວອຸດົມ ແຂວງວຽງຈັນ.
ໂດຍການເປັນປະທານຂອງ ທ່ານ ດຣ. ພອນປະເສີດ ໄຊຍະມຸງຄຸນ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ, ພ້ອມດ້ວຍບັນດາຜູ້ຕາງໜ້າຈາກຫ້ອງການກະຊວງສາທາ, ບັນດາທ່ານຫົວໜ້າກົມ, ຮອງຫົວໜ້າກົມ, ຫົວໜ້າສູນ ຮອງສູນອ້ອມຂ້າງກະຊວງສາທາລະນະສຸກ, ທ່ານຫົວໜ້າ, ຮອງກົມໄວຮຽນ, ກົມສາມັນສຶກສາ ຈາກກະຊວງສຶກສາທິການ ແລະ ກິລາ ທ່ານຫົວຫນ້າກົມ, ຮອງກົມສື່ມວນຊົນ, ກົມຊົນເຜົ່າ ຈາກແນວລາວສ້າງຊາດ, ກົມຈາກກະຊວງພາຍໃນ ແລະ ກົມສົ່ງເສີມຄວາມກ້າວຫນ້າຂອງແມ່ຍິງ ຈາກສູນກາງສະຫະພັນແມ່ຍິງລາວ, ທ່ານຫົວຫນ້າ ແລະ ຮອງພະແນກສາທາລະນະສຸກຈາກ 17 ແຂວງ ແລະ 1 ນະຄອນຫຼວງ, ບັນດາຄູ່ຮ່ວມພັດທະນາຈາກອົງການອະນາໄມໂລກ, ອຸຍນີເຊັບ, ກາວີ, ໄຈ, ເວີນແບັງ, USCDC ແລະ ຄູ່ຮ່ວມພັດທະນາກໍ່ໄດ້ເຂົ້າຮ່ວມ.
ກອງປະຊຸມໄດ້ສະເຫນີຜົນສໍາເລັດໃນການຈັດຕັ້ງປະຕິບັດຂະບວນການ ວສຊ ຫມາກແດງໃຫຍ່-ຫມາກແດງນ້ອຍໃນຂອບເຂດທົ່ວປະເທດ ຊຶ່ງໄດ້ປະຕິບັດໃນໄລຍະວັນທີ 20 ຫາ ວັນທີ 12 ພຶດສະພາ ຜ່ານມານີ້. ໄດ້ສົນທະນາ ປະກອບຄໍາເຫັນ ແລະ ຄໍາແນະນໍາ ເພື່ອຖອດຖອນບົດຮຽນເຂົ້າໃສ່ໃນການປັບປຸງວຽກງານໃຫ້ວັກຊີນໃນຮອບປົກກະຕິ ທີ່ຍັງເຫລືອອີກ 6 ເດືອນຂ້າງຫນ້າ ເພື່ອໃຫ້ບັນລຸຕົວຊີ້ບອກໃນແຕ່ລະດ້ານ ທີ່ທາງກະຊວງສາທາລະນະສຸກ ໂດຍສະເພາະຕົວເລກ Penta3 ໃຫ້ໄດ້ 95%, ໂດຍສະເພາະເລັ່ງໃສ່ອັດຕາປົກຄຸມກັນພະຍາດຫມາກແດງໃຫຍ່-ຫມາກແດງນ້ອຍ ເຂັມ1, ເຂັມ2 ໃຫ້ບັນລຸຕາມຕົວຊີ້ບອກຂອງສະພາວາງໄວ້ ທັງໝົດນີ້ເພື່ອກ້າວເຂົ້າໄປສູ່ການກໍາຈັດ ພະຍາດຫມາກແດງໃຫຍ່-ຫມາກແດງນ້ອຍໃນແຜນ 5 ປີຂ້າງຫນ້າແຕ່ນີ້ຫາປີ 2027.
ຄຽງຄູ່ກັບຜົນງານທີ່ຍາດມາໄດ້ໃນໄລຍະພຽງ ສາມອາທິດຜ່ານມານັ້ນ ຈາກຕົວເລກສະແດງໃຫ້ເຫັນໃນລະດັບທົ່ວປະເທດໄດ້ສະຫລຸບໃຫ້ເຫັນວ່າຕົວເລກມື້ສຸດທ້າຍແມ່ນພວກເຮົາບັນລຸໄດ້ຫຼາຍກວ່າ 95.2% ແຕ່ໃນນີ້ກໍຍັງມີຫຼາຍແຂວງ ຫຼາຍເມືອງແມ່ນບັນລຸຕາມເປົ້າໝາຍທີ່ວາງໄວ້ເປັນຕົ້ນບາງເມືອງໃຫຍ່ໃນນະຄອນຫຼວງ ເປັນເມືອງທີ່ຢູ່ໃນເມືອງ ແລະ ເຂົ້າເຖິງການບໍລິການງ່າຍ, ແຕ່ກົງກັນຂ້າມຍັງມີເດັກນ້ອຍເປົ້າໝາຍຈໍານວນຫຼວງຫຼາຍພາດໂອກາດບໍ່ໄດ້ຮັບວັກຊີນຫມາກແດງໃຫຍ່-ຫມາກແດງນ້ອຍໃນໄລຍະເຮັດ ວສຊ ເນື່ອງຈາກວ່າພໍ່ແມ່ຜູ້ປົກຄອງເດັກຍັງບໍ່ທັນໄດ້ຮັບຂໍ້ມູນຂ່າວສານຢ່າງເລິກເຊິ່ງດີ ເຮັດໃຫ້ການຈັດຕັ້ງປະຕິບັດການສັກວັກຊີນໃນໂຮງຮຽນບາງແຫ່ງກໍພາດໂອກາດບໍ່ໄດ້ສັກວັກຊີນ.
ດັ່ງນັ້ນຈຶ່ງຕ້ອງໄດ້ມາຄົ້ນຄວ້າ ວິເຄາະບັນຫາຢູ່ກັບພາກສ່ວນໃດເປັນຕົ້ນວ່າ ບັນຫາຜູ້ປົກຄອງເດັກບໍ່ເຂົ້າໃຈ ບໍ່ນໍາເອົາລູກຂອງຕົນມາສັກວັກຊີນສະນັ້ນຜູ້ຈະຊ່ວຍໄດ້ກໍ່ຄືຂະແຫນງການສຶກສາທິການ ແລະ ອໍານາດການປົກຄອງໃນແຕ່ລະຂັ້ນ ເພື່ອຖອດຖອນບົດຮຽນໃນແຕ່ລະດ້ານ ແນ່ໃສ່ປັບປຸງວຽກງານການບໍລິການໃຫ້ວັກຊີນຮອບປົກກະຕິໃຫ້ດີຂຶ້ນ.
ທັງໝົດນີ້ ໃຫ້ກວດກາດ້ານໃດແດ່ທີ່ເປັນຈຸດດີ ສາຍເຫດພາໃຫ້ບັນລຸ ແລະ ດ້ານໃດແດ່ທີ່ເປັນຈຸດປັບປັງ ເພື່ອວາງແຜນແບບມີຈຸດສຸມ ຈັດລຽງກິດຈະກໍາທີ່ເປັນບຸລິມະສິດ ເພື່ອເຮັດແນວໃດ ໃຫ້ເດັກເປົ້າໝາຍຕ້ອງໄດ້ຮັບວັກຊີນປົກກະຕິ ໂດຍເຊື່ອມສານກັບວຽກງານແມ່ ແລະ ເດັກອື່ນ ຢ່າງທົ່ວເຖິງ ແລະ ມີຄຸນນະພາບ. ເພື່ອໃຫ້ບັນລຸຕາມເປົ້າໝາຍທີ່ວາງໄວ້. ແຜນ 6 ເດືອນທ້າຍປີ ຈະຕ້ອງໄດ້ເຮັດວຽກປະສານງານຮ່ວມກັບຫຼາຍພາກສ່ວນເປັນຕົ້ນ ກະຊວງສຶກສາທິການ ແລະ ກິລາ ໃນການຈັດຕັ້ງປະຕິບັດຂະບວນການໃຫ້ວັກຊີນກັນມະເຮັງປາກມົດລູກ ໃນກຸ່ມເປົ້າໝາຍເດັກຍິງອາຍຸ 10 ຫາລຸ່ມ 12ປີ ທີ່ເຂົ້າໂຮງຮຽນ ແລະ ບໍ່ໄດ້ເຂົ້າໂຮງຮຽນ ທີ່ຈະຈັດໃນເດືອນຕຸລາ ປີ 2024 ນີ້. ດັ່ງນັ້ນຮຽກຮ້ອງໃຫ້ພະແນກສາທາລະນະສຸກແຂວງ ປະສານງານກັບພະແນກສຶກສາທິການ ແລະ ກິລາແຂວງຢ່າງໃກ້ສິດ ແລະ ເພື່ອໃຫ້ເດັກຍິງເປົ້າໝາຍໄດ້ຮັບວັກຊີນກັນມະເຮັງປາກມົດລູກ ແລະ ທັງໝົດນີ້ກໍເພື່ອໃຫ້ເດັກຍິງເປົ້າໝາຍທີ່ເຂົ້າໂຮງຮຽນ ແລະ ບໍ່ເຂົ້າໂຮງຮຽນໄດ້ຮັບວັກຊີນຢ່າງທົ່ວເຖິງ ແລະ ຫລຸດຜ່ອນການພາດໂອກາດຂອງເດັກຍິງດັ່ງກ່າວນີ້.
