ກອງປະຊຸມວົງແຄບ ຂອງບັນດາເຈົ້າໜ້າທີ່ອາວຸໂສປະເທດສະມາຊິກອາຊຽນ ທີ່ຮັບຜິດຊອບວຽກງານອາຊະຍາກໍາຂ້າມຊາດ ແມ່ນໜຶ່ງໃນກອງປະຊຸມປິ່ນອ້ອມກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 24 ໄດ້ຈັດຂຶ້ນໃນຕອນບ່າຍຂອງວັນທີ 26 ມິຖຸນາ 2024 ໂດຍການເປັນປະທານຂອງ ທ່ານ ພົນຕີ ສຸລິນະ ແກ້ວປະເສີດ ຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ຫົວໜ້າເຈົ້າໜ້າທີ່ອາວຸໂສ ຮັບຜິດຊອບວຽກງານຕ້ານອາຊະຍາກໍາຂ້າມຊາດ ສປປ ລາວ.
ກອງປະຊຸມໄດ້ພ້ອມກັນຕີລາຄາເຖິງສະພາບການຂອງໂລກ ແລະ ພາກພື້ນ ພ້ອມທັງທົບທວນຄືນຜົນການຈັດຕັ້ງປະຕິບັດບັນດາແຜນງານ ຕ້ານອາຊະຍາກໍາຂ້າມຊາດ ໃນໄລຍະຜ່ານມາຂອງບັນດາປະເທດສະມາຊິກອາຊຽນ. ນອກນີ້, ຍັງໄດ້ພ້ອມກັນປຶກສາຫາລື, ແລກປ່ຽນບົດຮຽນ ແລະ ກໍານົດທິດທາງແຜນການຮ່ວມມືໃນຕໍ່ໜ້າ ໃນການຕ້ານອາຊະຍາກໍາຂ້າມຊາດ ເປັນຕົ້ນແມ່ນ: ບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກ ລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງິນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັກລອບນໍາຄົນເຂົ້າ-ອອກເມືອງ.
ທັງນີ້ ເພື່ອເຮັດໃຫ້ການຈັດຕັ້ງປະຕິບັດແຜນງານ, ໂຄງການ, ຂໍ້ຕົກລົງຕ່າງໆ ທີ່ກໍານົດໄວ້ ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາ ແລະ ຮັບປະກັນທາງດ້ານປະສິດທິຜົນ ແນໃສ່ສ້າງໃຫ້ປະຊາຄົມອາຊຽນມີສະຖຽນລະພາບ, ມີຄວາມໝັ້ນຄົງ, ມີຄວາມສະຫງົບສຸກ, ເປັນພາກພື້ນແຫ່ງສັນຕິພາບ ໄມຕີຈິດ ມິດຕະພາບ ແລະ ຍືນຍົງ.
ຂ່າວ: ກົມສື່ມວນຊົນ
ພາບ: ບຸນພະຈັນ
