ກອງປະຊຸມວຽກງານກວດກາທົ່ວປະເທດປະຈຳປີ 2020 ແລະ ປະຈໍາ 5 ປີ (2016-2020)ໄດ້ເປີດຂຶ້ນຢ່າງເປັນທາງການໃນຕອນເຊົ້າວັນທີ 28 ມັງກອນ 2021 ທີ່ສະໂມສອນຄະນະກວດກາສູນກາງພັກ (ຫຼັກ 6) ພາຍໃຕ້ການເປັນປະທານຂອງສະຫາຍ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຜູ້ປະຈໍາການເລຂາທິການສູນກາງພັກສະໄໝ XI, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ; ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ປະທານຄະນະກວດກາສູນກາງພັກສະໄໝທີ XI, ມີບັນດາສະຫາຍ ຄະນະປະຈຳພັກ, ກະຊວງ-ອົງການ, ແຂວງ, ນະຄອນ, ຮອງປະທານຄະນະກວດກາສູນກາງພັກ ແລະ ອົງການກວດກາລັດຖະບານ, ບັນດາປະທານ-ຮອງປະທານຄະນະກວດກາກະຊວງ-ອົງການ, ແຂວງ-ນະຄອນຫຼວງ, ຫົວໜ້າ-ຮອງຫົວໜ້າກົມ ພ້ອມດ້ວຍສະມາຊິກພັກ-ພະນັກງານຫຼັກແຫຼ່ງທົ່ວຄະນະກວດການສູນກາງພັກ-ອົງການກວດກາລັດຖະບານເຂົ້າຮ່ວມທັງໝົດ 400 ກວ່າສະຫາຍ.
ໃນກອງປະຊຸມຄັ້ງນີ້, ສະຫາຍ ສີໃນ ມຽງລາວັນ ຮອງເລຂາຄະນະພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດຖະບານ ຂຶ້ນຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານຕິດຕາມ-ກວດກາ ແລະ ສະກັດກັ້ນ-ຕ້ານການສໍ້ລາດບັງຫຼວງປະຈໍາປີ 5 ປີ (2016-2020) ແລະ ທິດທາງແຜນການ 5 ປີໃນຕໍ່ໜ້າ. ເຊິ່ງໄລຍະຜ່ານມາຄະນະພັກ, ອົງການປົກຄອງຄະນະກວດກາພັກ-ອົງການກວດກາລັດແຕ່ລະຂັ້ນ ໄດ້ສຸມໃສ່ຈັດຕັ້ງປະຕິບັດວຽກງານກວດກາຕາມພາລະບົດບາດ, ໜ້າທີ່, ຂອບ ເຂດສິດຂອງຕົນ ໂດຍໄດ້ສືບຕໍ່ຄົ້ນຄວ້າຜັນຂະຫຍາຍມະຕິ ກອງປະຊຸມໃຫຍ່ຄັ້ງທີ X ຂອງພັກ ແລະ ກອງປະຊຸມວຽກງານກວດກາທົ່ວປະເທດຄັ້ງທີ III ເປັນນິຕິກໍາຈໍານວນໜຶ່ງເປັນຕົ້ນ: ອອກຂໍ້ກໍານົດ ວ່າດ້ວຍລະ ບຽບການ ຄົ້ນຄວ້າພິຈາລະນາຄໍາຮ້ອງຟ້ອງ, ຮ້ອງທຸກ-ຄໍາສະເໜີ; ຂໍ້ກໍານົດ ວ່າດ້ວຍລະບຽບການຕິດຕາມ, ກວດກາ ຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ບັນດາອົງການອໍານາດລັດ; ຮ່າງບົດບັນທຶຶກການພົວພັນລະຫວ່າງອົງການກວດກາລັດຖະບານ ກັບກະຊວງປ້ອງ ກັນຄວາມສະຫງົບ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ແລະ ກະຊວງຍຸດຕິທໍາ ໃນການດໍາເນີນຄະດີສໍ້ລາດບັງຫຼວງ; ຮ່າງກໍານົດວ່າດ້ວຍລະບຽບໃຫ້ສື່ມວນຊົນ ແລະ ປະຊາຊົນເຂົ້າຮ່ວມຕິດຕາມ, ກວດກາການປະຕິບັດໜ້າທີ່ ແລະ ການດໍາລົງຊີວິດຂອງສະມາຊິກພັກ-ພະນັກງານ ມະຕິວ່າດ້ວຍການແກ້ໄຂພະຍາອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງ ຂອງຄະ ນະບໍລິຫານງານສູນກາງພັກ ແລະ ອື່ນໆ.
ວຽກງານຕິດຕາມ ກວດກາບໍລິຫານລັດ, ສະກັດກັ້ນ-ຕ້ານການສໍ້ລາດບັງຫຼວງ ແລະ ສືບສວນ-ສອບສວນ ຄະນະ ພັກ-ຄະນະນໍາ, ຄະນະກວດກາແຕ່ລະຂັ້ນໄດ້ນໍາພາ-ຊີ້ນໍາ ດໍາເນີນການຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີເປັນຕົ້ນ: ໂຄງການກໍ່ສ້າງເສັ້ນທາງລົດໄຟລາວ-ຈີນ, ໂຄງການກໍ່ສ້າຂົວທາງ-ເຄຫາ ແລະ ກໍ່ສ້າງຊົນ ລະປະທານຈໍານວນໜຶ່ງ; ການຕິດຕາມ-ກວດກາຕາມຜົນການກວດສອບ, ກວດກາຕາມຄໍາສັ່ງ; ຊີ້ນໍາການຕິດຕາມ-ຊຸກຍູ້ການຈັດຕັ້ງປະຕິບັດຄໍາສັ່ງ ເລກທີ 15/ນຍ ແລະ ອື່ນໆ ສ່ວນວຽກງານຄົ້ນຄວ້າຄໍາຮ້ອງ-ຄໍາສະເໜີ ໄດ້ນໍາພາ-ຊີ້ນໍາການຄົ້ນຄວ້າຄໍາຮ້ອງ-ຄໍາສະເໜີຂອງພົນລະເມືອງທີ່ມີຕໍ່ການຈັດຕັ້ງພັກ, ອົງການບໍລິຫານລັດ, ການປະຕິບັດໜ້າທີ່ຂອງສະມາຊິກພັກ-ພະນັກງານ ຕາມກົດລະບຽບຂອງພັກ, ກົດໝາຍຂອງລັດ ແລະ ອື່ນໆ.
ນອກຈາກນີ້, ຜູ້ເຂົ້າຮ່ວມກອງງປະຊຸມຍັງໄດ້ຮັບຟັງລາຍ ງານລົງເລີກກ່ຽວກັບວຽກງານຕິດຕາມ-ກວດກາພັກ, ວຽກ ງານການກວດກາຕາມຜົນຂອງການກວດສອບ, ວຽກງານສະກັດກັ້ນ-ຕ້ານການສໍ້ລາດບັງຫຼວງ ແລະ ສືບສວນ-ສອບສວນ, ວຽກງານຄົ້ນຄວ້າຄໍາຮ້ອງ-ຄໍາສະເໜີ ແລະ ວຽກ ງານຕິດຕາມ-ກວດກາການປະຕິບັດຜົນຂອງການກວດສອບ ຈາກບັນດາກົມທີ່ກ່ຽວຂ້ອງ ແລະ ບັນດາຜູ້ແທນທີ່ເຂົ້າຮ່ວມກອງປະຊຸມທີ່ມາຈາກບັນດາກະຊວງ-ອົງການ ແລະ ທ້ອງຖີ່ນກໍ່ໄດ້ພັດປ່ຽນກັນຂຶ້ນປະກອບຄໍາເຫັນຕາມການເຈາະຈີ້ມຂອງປະທານກອງປະຊຸມ ເຊິ່ງກອງປະຊຸມຈະດໍາເນີນເປັນເວລາສອງວັນ (28-29 ມັງກອນ 2021) ຈຶ່ງຈະສໍາເລັດ.
ຂ່າວ: ນັກຂ່າວຄະນະກວດກາສູນກາງພັກ
ພາບ: ອາພິນຍາ ສຸລິຍະວົງ
Loading...