ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມວຽກງານກວດກາປະຈຳປີ 2019 ຂອງກະຊວງການຕ່າງປະເທດ ປິດລົງດ້ວຍຜົນສຳເລັດອັນຈົບງາມ

ໃນວັນທີ 02 ກໍລະກົດ 2020, ກອງປະຊຸມສະຫລຸບການເຄື່ອນໄຫວວຽກງານກວດກາປະຈຳປີ 2019 ຂອງກະຊວງການຕ່າງປະເທດ ໄດ້ຈັດຂຶ້ນຢ່າງເປັນທາງການ ໂດຍການເປັນກຽດເປັນ​ປະທານ​ຂອງ​ ສະຫາຍ ທອງສະຫວັນ ພົມວິຫານ, ຄະນະປະຈຳພັກ, ຮອງລັດຖະມົນຕີກະຊວງການຕ່າງປະເທດ (ຜູ້ຊີ້ນຳວຽກງານກວດກາ); ມີຄະນະ​ພັກ-ຄະນະ​ນຳກະຊວງ, ບັນດາຫົວໜ້າ ແລະ ຄະນະກົມ, ແລະ ພະນັກງານຫຼັກແຫຼ່ງຂອງກະຊວງການຕ່າງປະເທດເຂົ້າຮ່ວມ.

ກອງປະຊຸມ ໄດ້ຜ່ານບົດສະຫລຸບຕີລາຄາວຽກງານກວດກາ ປະຈຳປີ 2019 ຂອງກະຊວງການຕ່າງປະເທດ ໂດຍການເອົາໃຈໃສ່ນຳພາ-ຊີ້ນຳ ຢ່າງໃກ້ຊິດ ແລະ ເປັນປົກກະຕິຂອງຄະນະພັກ-ຄະນະນຳກະຊວງການຕ່າງປະເທດ. ໃນປີ 2019 ຜ່ານມາ, ການເຄື່ອນໄຫວກວດກາປົກກະຕິວຽກພັກ-ລັດ ລວມທັງໝົດ 19 ເປົ້າໝາຍ; ອັນພົ້ນເດັ່ນແມ່ນ ບໍ່ທັນພົບເຫັນກໍລະນີສໍ້ລາດບັງຫລວງທີ່ເປັນມູນຄ່າເທື່ອ. ພ້ອມດຽວກັນນີ້, ໄດ້ສ້າງກົນໄກອຳນວຍຄວາມສະດວກໃຫ້ແກ່ວຽກງານຕິດຕາມ, ກວດກາ ໂດຍຜ່ານການຈັດຕັ້ງກອງປະຊຸມຜູ້ເຮັດວຽກງານກວດກາຂອງໜ່ວຍພັກອ້ອມຂ້າງກະຊວງການຕ່າງປະເທດ 2ຄັ້ງ/ປີ. ຜ່ານການເຄື່ອນໄຫວກວດກາຕົວຈິງເຫັນວ່າ ຄະນະໜ່ວຍພັກ, ສະມາຊິກພັກ-ພະນັກງານຂອງກະຊວງການຕ່າງປະເທດ ມີຄວາມຮັບຮູ້, ເຂົ້າໃຈຢ່າງຖືກຕ້ອງ ຕໍ່ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງ, ມີຄວາມຕື່ນຕົວ ແລະ ໃຫ້ການຮ່ວມມືເປັນຢ່າງດີ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ປະຕິບັດຕາມກົດໝາຍຂອງລັດຢ່າງເຂັ້ມງວດ ເຊິ່ງສາມາດຕີລາຄາວ່າ ສະພາບການພາຍໃນກະຊວງການຕ່າງປະເທດມີຄວາມສະຫງົບ, ມີສະຕິສູງ, ມີຄວາມໂປ່ງໃສໃນການນຳພາ-ຊີ້ນຳການເຄື່ອນໄຫວວຽກງານການຕ່າງປະເທດຢ່າງຮອບດ້ານ; ທັງໝົດນີ້, ເປັນການປະກອບສ່ວນສຳຄັນໜຶ່ງເຂົ້າໃນວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ສ້າງສາພັດທະນາປະເທດຊາດ. ພ້ອມດຽວກັນນັ້ນ, ກໍ່ໄດ້ວາງແຜນການເຄື່ອນໄຫວສຳລັບປີ 2020 ແລະ ເຜີຍແຜ່ເຊື່ອມຊືມເນຶ້ອໃນ4 ເອກະສານສໍາຄັນຄື: (1) ບົດໂອ້ລົມ ຂອງ ທ່ານ ປອ ບຸນ​ທອງ ຈິດ​ມະນີ, ກຳມະການກົມການ​ເມືອງສູນ​ກາງ​ພັກ, ຮອງ​ນາຍົກລັດຖະມົນຕີ, ປະທານ​ຄະນະ​ກວດກາ​ສູນ​ກາງ​ພັກ, ປະທານອົງການ​ກວດກາ​ລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງ​ປະຊຸມ​ວຽກງານ​ກວດກາ​ທົ່ວ​ປະ​ເທດປະຈຳປີ 2019; (2) ບົດສະຫລຸບຫຍໍ້ວຽກງານກວດກາທົ່ວປະເທດ ປະຈຳປີ 2019 ແລະ ທິດທາງຄາດໝາຍສູ້ຊົນວຽກງານກວດກາປີ 2020 ຂອງຄະນະກວດກາສູນກາງພັກ; (3) ຂໍ້ກຳນົດຂອງຄະນະກວດກາສູນກາງພັກ ສະບັບເລກທີ 398/ຄກສພລົງວັນທີ 26 ກັນຍາ 2019 ວ່າດ້ວຍການຄົ້ນຄວ້າ, ແກ້ໄຂຄຳຮ້ອງຟ້ອງ-ຮ້ອງທຸກ ແລະ ຄຳສະເໜ; ແລະ (4) ເອກະສານປາຖະກະຖາວັນຕ້ານການສໍ້ລາດບັງຫລວງສາກົນ ຄົບຮອບ 16 ປີ ວັນທີ 9 ທັນວາ 2003 – 9 ທັນວາ 2019.

ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຂອງ ສະຫາຍ ທອງສະຫວັນ ພົມວິຫານ, ຄະນະປະຈຳພັກກະຊວງ, ຮອງລັດຖະມົນຕີກະຊວງການຕ່າງປະເທດ; ໃນນັ້ນ, ສະຫາຍໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ໃນປີ 2019. ພ້ອມນັ້ນ, ກໍ່ໄດ້ມີທິດຊີ້ນຳບາງບັນຫາສຳຄັນໃນຕໍ່ໜ້າຄວນເອົາໃຈໃສ່ວຽກງານຕິດຕາມ-ກວດກາ ເປັນຕົ້ນໄດ້ເນັ້ນໃຫ້​ຄະນະພັກ-ຄະນະນຳທຸກຂັ້ນ ມີຄວາມເຂົ້າ​ໃຈ​ເລິກ​ເຊິ່ງຕໍ່ພາລະ​ບົດບາດຄວາມສຳຄັນຂອງວຽກງານກວດກາ, ຕີຖອຍທັດສະນະແນວຄິດຖືເບົາຕໍ່ວຽກງານກວດກາ, ໃຫ້ສືບຕໍ່ສົ່ງເສີມດ້ານດີ, ວຽກງານກວດກາເປັນວຽກທີ່ຕ້ອງເຮັດເປັນປົກກະຕິ ແລະ ຂາດບໍ່ໄດ້ ສຳລັບການນຳພາຂອງພັກ, ການຄຸ້ມຄອງຂອງລັດ. ເອົາໃຈໃສ່ປັບປຸງແກ້ໄຂຂໍ້ຄົງຄ້າງ ໂດຍສະເພາະແຕ່ລະພາກສ່ວນຕ້ອງມີການປະສົມປະສານສົມທົບກົມກຽວກັນຕໍ່ວຽກງານກວດກາແຕ່ລະເປົ້າໝາຍ, ຕັ້ງໜ້າປະຕິບັດຕາມຫ້າທິດທາງ ແລະ ຫ້າຄາດໝາຍສູ້ຊົນທີ່ກອງປະຊຸມວຽກງານກວດກາທົ່ວປະເທດວາງອອກ ໃຫ້ໄດ້ຮັບຜົນດີ.