ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ

ກອງປະຊຸມວຽກງານການຮ່ວມມືທາງດ້ານ ເສດຖະກິດ ແລະ ວັດທະນະທໍາ-ສັງຄົມ ຂອງສະພາເເຫ່ງຊາດກໍາປູເຈຍ-ລາວ-ຫວຽດນາມ
ພາຍໃຕ້ຫົວຂໍ້ “ເພີ່ມທະວີການຮ່ວມມືລັດຖະສະພາໃນການຊຸກຍູ້ການເຊື່ອມຈອດທາງດ້ານເສດຖະກິດ ຂອງກໍາປູເຈຍ-ລາວ-ຫວຽດນາມ ໄປສູ່ເປົ້າຫມາຍການພັດທະນາເເບບຍືນຍົງ ເເລະ ກວມລວມ ຄັ້ງທີ1”

ເຊີ່ງເປັນກອງປະຊຸມປີ່ນອ້ອມ ໃນກອງປະຊຸມສຸດຍອດຍອດລັດຖະສະພາ ກໍາປູເຈຍ-ລາວ-ຫວຽດນາມ ຫລື CLV ຄັ້ງທີ່1ທີ່ລາວຮັບກຽດເປັນເຈົ້າພາບ ຈັດຂື້ນໃນຕອນບ່າຍ ວັນທີ 5 ທັນວາ 2023 ຢູ່ໂຮງເເຮມຄຣາວພາຊາ ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ເເລະ ສີ່ງເເວດລ້ອມສະພາແຫ່ງຊາດລາວ, ໂດຍການເປັນປະທານຮ່ວມຂອງ ທ່ານຈາງວູນ ປະທານກຳມາທິການການເສດຖະກິດ, ການເງິນ, ການທະນາຄານ ແລະ ການກວດສອບ ສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ, ທ່ານວູຮຸ່ງເເທັງ ປະທານກຳມາທິການເສດຖະກິດ, ສະພາແຫ່ງຊາດ ຫວຽດນາມ ມີບັນດາທ່ານ ລັດຖະມົນຕີ, ຮອງລັດຖະມົນຕີ ແລະ ບັນດາຮອງບັນດາສະມາຊິກສະພາແຫ່ງຊາດ ພ້ອມດ້ວຍພາກສ່ວນກ່ຽວຂ້ອງຂອງສາມປະເທດເຂົ້າຮ່ວມ.

ທ່ານ ລິນຄໍາ ດວງສະຫວັນ ປະທານກໍາມາທິການເສດຖະກິດ,ເຕັກໂນໂລຊີ ເເລະ ສີ່ງເເວດລ້ອມສະພາແຫ່ງຊາດລາວ ໃນນາມປະທານກອງປະຊຸມ ຕີລາຄາສູງ ຕໍ່ຄະນະຜູ້ແທນ ຈາກສະພາແຫ່ງຊາດທັງສາມປະເທດ ກໍາປູເຈຍ-ລາວ-ຫວຽດນາມ ຫລື CLV ກໍ່ຄືກະຊວງທີ່ກ່ຽວຂ້ອງ ທີ່ ເຂົ້າຮ່ວມກອງປະຊຸມຄັ້ງນີ້, ຊຶ່ງເປັນໂອກາດອັນດີ ທີ່ຈະໄດ້ຮ່ວມກັນປຶກສາ ເພີ່ມທະວີບົດບາດຂອງລັດຖະສະພາ CLV, ເວົ້າສະເພາະການຮ່ວມມືທາງດ້ານ ເສດຖະກິດ ແລະ ວັດທະນະທໍາ-ສັງຄົມຂອງສະພາເເຫ່ງຊາດທັງສາມປະເທດໃຫ້ນັບມື້ໄດ້ຮັບການພັດທະນາເເລະກ້ວເຂົ້າສູ່ລວງເລີກ ເເນໃສ່ສົ່ງເສີມການຮ່ວມມື ແລະ ​ຊຸກຍູ້​ການ​ເຊື່ອມ​ຈອດ​ ທາງດ້ານ​ເສດຖະກິດ ຂອງ ຣາຊອານາຈັກກໍາປູເຈຍ – ສປປ ລາວ – ສສ ຫວຽດນາມ ​​ໄປສູ່ເປົ້າໝາຍ ການ​ພັດທະນາ​ແບບ​ຍືນ​ຍົງ ​ແລະ ກວມລວມ ທັງເປັນການປະຕິບັດບັນດາສົນທິສັນຍາ, ສັນຍາ, ຂໍ້ຕົກລົງ ແລະ ເອກະສານ ທີ່ລັດຖະບານສາມປະເທດໄດ້ຕົກລົງຮ່ວມກັນໃຫ້ເກີດດອກອອກຜົນ ເພື່ອນຳເອົາຜົນປະໂຫຍດ ແລະ ຄວາມຈະເລີນຮຸ່ງເຮືອງ ທາງດ້ານເສດຖະກິດ ແລະ ວັດທະນະທໍາ-ສັງຄົມ ມາສູ່ປະຊາຊົນໃນເຂດສາມຫຼຽມພັດທະນາ ກໍ່ຄື ສາມປະເທດ CLV ໃນຕໍ່ໜ້າ.

ໃນກອງປະຊຸມຄັ້ງນີ້ບັນດາຜູ້ເເທນທີ່ເຂົ້າຮ່ວມກອງປະຊຸມທັງສາມປະເທດໄດ້ຜັດປ່ຽນກັນປະກອບຄໍາເຫັນກ່ຽວກັບຈັດຕັ້ງປະຕິບັດວຽກງານວິຊາສະເພາະຂອງຕົນໃນໄລຍະຜ່ານມາ ເເລະ ວາງທິດທາງເເຜນການໃນຕໍ່ຫນ້າ ເພື່ອໃຫ້ສອດຄ່ອງກັບ ຫົວຂໍ້ຂອງກອງປະຊຸມ ທີ່ເວົ້າເຖີງການເພີ່ມທະວີການຮ່ວມມືລັດຖະສະພາໃນການຊຸກຍູ້ການເຊື່ອມຈອດທາງດ້ານເສດຖະກິດ ຂອງກໍາປູເຈຍ-ລາວ-ຫວຽດນາມ ໄປສູ່ເປົ້າຫມາຍການພັດທະນາເເບບຍືນຍົງ ເເລະ ກວມລວມ,

ເຊີ່ງຕະຫລອດໄລຍະຜ່ານມາ ລັດຖະບານ ຂອງສາມປະເທດ ໄດ້ເອົາໃຈໃສ່ ແລະ ມີຄວາມພະຍາຍາມສູງ ໃນການຈັດຕັ້ງປະຕິບັດ ບັນດາແຜນແມ່ບົດ ແລະ ແຜນປະຕິບັດງານ ທີ່ໄດ້ລົງນາມຮ່ວມກັນໄດ້ຮັບຜົນສໍາເລັດດີສົມຄວນ ຊຶ່ງໄດ້ນຳເອົາຜົນປະໂຫຍດມາສູ່ປະຊາຊົນໃນເຂດສາມຫຼ່ຽມພັດທະນາ CLVຢ່າງແທ້ຈິງ,ໄດ້ເອົາໃຈໃສ່ຮ່ວມມືກັນຢ່າງຫ້າວຫັນ ໃນການສ້າງສະພາບແວດລ້ອມທີ່ດີທາງດ້ານກົດໝາຍ, ການດໍາເນີນຂັ້ນຕອນຂອງລະບຽບການທາງດ້ານເອກະສານໃຫ້ສະດວກ ແລະ ວ່ອງໄວຂຶ້ນ, ພັດທະນາລະບົບໂຄງລ່າງພື້ນຖານໃນເຂດສາມຫຼ່ຽມພັດທະນາ, ການສ້າງເຂດເສດຖະກິດພິເສດ, ການດຶງດູດການລົງທຶນ ພາຍໃນ ແລະຕ່າງ ປະເທດ, ການເສີມຂະຫຍາຍການເຊື່ອມໂຍງເຊື່ອມຈອດໃຫ້ນັບມື້ນັບດີຂຶ້ນ, ມີການພົວພັນຮ່ວມມືກັບສາກົນເພື່ອຍາດແຍ່ງເອົາທຶນຮອນ ແລະ ເຕັກນິກວິຊາການເຂົ້າມາພັດທະນາໃນເຂດສາມຫຼ່ຽມພັດທະນາ, ສົ່ງເສີມການພົວພັນ ລະຫວ່າງ ປະຊາຊົນ ກັບ ປະຊາຊົນ ໃຫ້ນັບມື້ນັບດີຂຶ້ນເຮັດໃຫ້ການໄປມາຫາສູ່ກັນ ມີຄວາມສະດວກສະບາຍກວ່າເກົ່າ, ໄດ້ມີຄວາມພະຍາຍາມນຳໃຊ້ຊັບສົມບັດ ດ້ານສິ່ງແວດລ້ອມທາງທຳມະຊາດ ທີ່ເປັນເອກະລັກຮ່ວມກັນ ພ້ອມທັງຊອກຫາວິທີການແກ້ໄຂໃຫ້ສອດຄ່ອງກັບກົດໝາຍ ແລະ ນິຕິກຳພາຍໃນ ຂອງແຕ່ລະປະເທດ ເພື່ອປົກປັກຮັກສາຊັບພະຍາກອນທຳມະຊາດ ທີ່ມີຢູ່ຢ່າງຈຳກັດໃຫ້ມີຄວາມຍືນຍົງ,ໄດ້ມີຄວາມພະຍາມຍາມ ແລະ ນຳສະເໜີແນວຄິດລິເລີ່ມ ຂອງການພັດທະນາພະລັງງານທົດແທນ ແລະ ພະລັງງານສະອາດ ເພື່ອນຳເອົາຜົນປະໂຫຍດມາສູ່ຊຸມຊົນ ແລະປະຊາຊົນໃນເຂດດັ່ງກ່າວ,ຄຽງຄູ່ກັນນີ້ໄດ້ເອົາໃຈໃສ່ປະຕິບັດບັນດາມາດຕະການໃນການພັດທະນາ, ການສະໜອງແຮງງານທີ່ຈຳເປັນ, ການສຶກສາ ແລະ ການຝຶກອົບຮົມ, ການບໍລິການສາທາລະນະສຸກ,

ພ້ອມທັງເສີມຂະຫຍາຍແລະ ພັດທະນາແຫຼ່ງທ່ອງທ່ຽວ ໄປຄຽງຄູ່ກັບການສົ່ງເສີມ ການທ່ອງທ່ຽວຊຸມຊົນ ແລະ ການທ່ອງທ່ຽວແບບອະນຸລັກ ໂດຍສະເພາະ ການສົ່ງເສີມ ແລະ ສ້າງໃຫ້ສາມປະເທດ ກາຍເປັນຈຸດໝາຍປາຍທາງການທ່ອງທ່ຽວ ຮ່ວມກັນ.ໃນນີ້ສະເພາະສະເພາະໃນສີ່ແຂວງພາກໃຕ້ ຂອງ ລາວ ທີ່ມີຊາຍແດນຕິດຈອດໃນເຂດສາມຫຼ່ຽມພັດທະນາ ກໍໄດ້ມີການຂະຫຍາຍ ການເຊື່ອມໂຍງ, ສົ່ງເສີມສິນຄ້າ, ການລົງທຶນ, ການທ່ອງທ່ຽວ, ການສຶກສາ ແລະ ສາທາລະນະສຸກ ເຮັດໃຫ້ເຂດດັ່ງກ່າວມີການພັດທະນາຮ່ວມກັນຫຼາຍຂຶ້ນເປັນຕົ້ນ: ການພັດທະນາ ແລະ ອຳນວຍຄວາມສະດວກໃນການຄົມມະນາຄົມຂົນສົ່ງ ພ້ອມທັງ ເປີດດ່ານສາກົນ ແລະ ທ້ອງຖິ່ນລະຫວ່າງກັນຫລາຍຂຶ້ນ, ມີການປັບປຸງຂອດການບໍລິການ, ການອໍານວຍຄວາມສະດວກດ້ານເອກະສານ ເຮັດໃຫ້ການຮ່ວມມືມີທ່ວງທ່າດີຂຶ້ນ ສາມາດຍາດໄດ້ຜົນສຳເລັດຫຼາຍດ້ານ,ນອກຈາກນີ້ເພື່ອເປັນການສ້າງພື້ນຖານ ແລະ ເງື່ອນໄຂເອື້ອອຳນວຍ ໃຫ້ແກ່ການຈັດຕັ້ງປະຕິບັດວຽກງານໃນຂົງເຂດເສດຖະກິດ ແລະ ວັດທະນະທຳ-ສັງຄົມ ຢູ່ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ໃຫ້ເປັນຮູບປະທຳ ແລະ ມີປະສິດທິຜົນດີຂຶ້ນໃນຕໍ່ຫນ້າ

ກອງປະຊຸມສະເຫນີໃຫ້ສະພາແຫ່ງຊາດ ຂອງສາມປະເທດ ຈະຕ້ອງໄດ້ເອົາໃຈໃສ່ສືບຕໍ່ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາສັນຍາ, ສົນທິສັນຍາ ແລະບັນດາຂໍ້ລິເລີ່ມດ້ານການພັດທະນາ ທີ່ລັດຖະບານທັງສາມປະເທດ ໄດ້ລົງນາມຮ່ວມກັນຢ່າງແຂງແຮງ,ຮ່ວມກັນເກັບກຳບັນຫາ, ຂໍ້ຫຍຸ້ງຍາກ ແລະ ຄຳສະເໜີ ຂອງປະຊາຊົນ ເພື່ອນຳສະເໜີຕໍ່ລັດຖະບານຂອງສາມປະເທດ ນຳໄປຄົ້ນຄວ້າ ພິຈາລະນາແກ້ໄຂ ແລະ ຈັດຕັ້ງປະຕິບັດ,ສົ່ງເສີມ, ສ້າງກິດຈະກໍາຮ່ວມກັນ ເປັນຕົ້ນ: ການແລກປ່ຽນຂໍ້ມູນ-ຂ່າວສານ, ການຈັດຕະຫຼາດວາງສະແດງສິນຄ້າ, ແລກປ່ຽນກິດຈະກໍາທາງດ້ານສີລະປະ, ກິລາ ແລະ ອື່ນໆ.

ເພື່ອຮັດແໜ້ນສາຍພົວພັນຮ່ວມມື, ຄວາມສາມັກຄີ ຮັກແພງ ທີ່ມີມູນເຊື້ອ ລະຫວ່າງ ປະຊາຊົນດ້ວຍກັນ ໂດຍສະເພາະ ຄົນຮຸ່ນໜຸ່ມ ຢູ່ໃນເຂດສາມຫຼ່ຽມພັດທະນາ,ຊຸກຍູ້ ໃຫ້ມີການສົ່ງເສີມ ແລະ ການແລກປ່ຽນ ຄວາມຮູ້, ປະສົບການ, ເຕັກນິກວິຊາການ,ຊ່ຽວຊານສະເພາະດ້ານ, ການສຶກສາ ແລະ ການຝຶກອົບຮົມເຕັກນິກວິຊາຊີບ, ວິທະຍາສາດ-ເຕັກໂນໂລຊີ ແລະ ນະວັດຕະກຳໃໝ່ ໃນຂົງເຂດທີ່ກ່ຽວຂ້ອງ ລະຫວ່າງ ແຂວງ ໃນເຂດສາມຫຼ່ຽມພັດທະນາສະເໜີໃຫ້ຂະແໜງການກ່ຽວຂ້ອງ ຂອງລັດຖະບານສາມປະເທດ ສືບຕໍ່ເພີ່ມທະວີການຊຸກຍູ້, ສົ່ງເສີມ ແລະ ດຶງດູດນັກລົງທຶນທັງພາຍໃນ ແລະ ຕ່າງປະເທດໃຫ້ເຂົ້າມາລົງທຶນ ໃນເຂດສາມຫຼ່ຽມພັດທະນາ ເພື່ອເປັນການຂະຫຍາຍ ການຜະລິດ ແລະການບໍລິການ, ສົ່ງເສີມເສດຖະກິດ, ການຄ້າ-ການລົງທຶນ, ການສຶກສາ, ສາທາລະນະສຸກ,ການທ່ອງທ່ຽວ ແລະ ຂະແໜງການ ອື່ນໆ ທີ່ມີທ່າແຮງຮ່ວມກັນ,

ພ້ອມດຽວກັນນັ້ນ ໃຫ້ເຊື່ອມສານເປົ້າໝາຍຂອງແຜນແມ່ບົດ ແລະ ແຜນປະຕິບັດງານ ເຂດສາມຫຼ່ຽມພັດທະນາເຂົ້າໃນແຜນພັດທະນາເສດຖະກິດ-ສັງຄົມ ແລະ ຈັດສັນງົບປະມານຂອງລັດເຂົ້າໃນການພັດທະນາເຂດດັ່ງກ່າວ,ພັດທະນາໂຄງລ່າງພື້ນຖານ, ການຄົມມະນາຄົມ, ຕະຫຼາດຊຸມຊົມ ແລະ ການສະໜັບສະໜູນ ສິ່ງອຳນວຍຄວາມສະດວກອື່ນໆ ຕາມບໍລິເວນຊາຍແດນ ຂອງສາມປະເທດ ເປັນຕົ້ນ: ການປັບປຸງ ແລະ ຍົກລະດັບດ່ານສາກົນ ເພື່ອອຳນວຍຄວາມສະດວກໃນການຂົນສົ່ງສິນຄ້າຜ່ານແດນ ແລະ ການໄປມາຫາສູ່ຂອງປະຊາຊົນ,ຊຸກຍູ້ ການປົກປັກຮັກສາ ຊັບພະຍາກອນທໍາມະຊາດ, ລະບົບນິເວດທຳມະຊາດ ແລະ ຊີວະນາໆພັນທາງທຳມະຊາດ ພ້ອມທັງຊຸກຍູ້ການພັດທະນາ, ນໍາໃຊ້ແບບຢືນຍົງ ແລະ ຮັບປະກັນປະສິດທິຜົນສູງສຸດ ພາຍໃນແຂວງ ຂອງເຂດສາມຫຼ່ຽມພັດທະນາ.

ນອກຈາກດໍາເນີນກອງປະຊຸມວຽກງານການຮ່ວມມືທາງດ້ານ ເສດຖະກິດ ແລະ ວັດທະນະທໍາ-ສັງຄົມຂອງສະພາເເຫ່ງຊາດກໍາປູເຈຍ-ລາວ-ຫວຽດນາມ ພາຍໃຕ້ຫົວຂໍ້ເພີ່ມທະວີການຮ່ວມມືລັດຖະສະພາໃນການຊຸກຍູ້ການເຊື່ອມຈອດທາງດ້ານເສດຖະກິດ ຂອງກໍາປູເຈຍ-ລາວ-ຫວຽດນາມ ໄປສູ່ເປົ້າຫມາຍການພັດທະນາເເບບຍືນຍົງ ເເລະ ກວມລວມເເລ້ວ,ໄດ້ດໍາເນີນກອງປະຊຸມປີ່ນອ້ອມສໍາຄັນເພີ່ມຕື່ມອີກ3ກອງປະຊຸມ ເປັນຕົ້ນ : ກອງປະຊຸມວຽກງານກໍາມາທິການການຕ່າງປະເທດຂອງລັດຖະສະພາ ກໍາປູເຈຍ-ລາວ-ຫວຽດນາມ ພາຍໃຕ້ຫົວຂໍ້ເພີ່ມທະວີບົດບາດຂອງລັດຖະສະພາກໍາປູເຈຍ-ລາວຫວຽດນາມ ໃນການການຊຸກຍູ້ການຮ່ວມມື,ການເປັນຄູ່ຮ່ວມ,ຄວາມສາມັກຄີ ເເລະ ຄວາມຈະເລີນຮຸ່ງເຮືອງ,ກອງປະຊຸມວຽກງານກໍາມາທິການປ້ອງກັນຊາດ-ປ້ອງກັນຄວາມສະຫງົບ ຂອງລັດຖະສະພາ ກໍາປູເຈຍ-ລາວ-ຫວຽດນາມ ພາຍໃຕ້ຫົວຂໍ້ ເພີ່ມທະວີບົດບາດໃນການຕິດຕາມກວດກາຂອງລັດຖຖະສະພາກໍາປູເຈຍ-ລາວ-ຫວຽດນາມ ຕໍ່ວຽກງານປ້ອງກັນຊາດປ້ອງກັນຄວາມສະຫງົບ ເພື່ອຮັບປະກັນສັນຕິພາບ ເເລະສະຖຽນລະພາບ ເເລະ ກອງປະຊຸມສະເພາະຂອງຄະນະກໍາມະການຮ່າງຖະເເຫລງການຮ່ວມກອງປະຊຸມ.