ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ຈະຈັດຂຶ້ນໃນມໍ່ໆນີ້ ເພື່ອທົບທວນ ຄືນບາງບັນຫາສຳຄັນ ເປັນຕົ້ນສະຫລຸບຕີລາຄາການເຄື່ອນໄຫວວຽກງານການເມືອງ-ແນວຄິດໃນໄລຍະ ແຕ່ກອງປະຊຸມວຽກງານການເມືອງ- ແນວຄິດ ຄັ້ງທີ IV ປີ 2003 ເປັນຕົ້ນມາ, ພ້ອມທັງກໍານົດທິດທາງ, ໜ້າທີ່ຈຸດສຸມຂອງວຽກງານການເມືອງ-ແນວຄິດໃນຕໍ່ໜ້າ; ປະກອບຄວາມຄິດຄວາມເຫັນກ່ຽວກັບວິທີການ, ມາດຕະການຂອງການດຳເນີນວຽກງານການເມືອງ-ແນວຄິດ ໃນສະເພາະໜ້າ ແລະ ຊຸມປີຕໍ່ໆໄປ ແນໃສ່ເຮັດໃຫ້ວຽກງານແນວຄິດຕິດພັນ ແລະ ຊຸກຍູ້ຂະບວນການວຽກງານຕົວຈິງ ໃນພາລະ ກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ຮັບປະກັນສະຖຽນລະພາບທາງດ້ານການເມືອງ ແລະຄວາມສະຫງົບທີ່ໜັ້ກແໜ້ນ, ແກ້ໄຂຄວາມທຸກຍາກຂອງປະຊາຊົນ ຕິດພັນກັບການແຂ່ງຂັນຮັກຊາດພັດທະນາ.
ທ່ານ ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ແຈ້ງໃຫ້ຮູ້ໃນວັນທີ 11 ພະຈິກ 2022 ນີ້ວ່າ: ວຽກງານການເມືອງ-ແນວຄິດເປັນວຽກງານສຳຄັນຂອງພັກ, ເປັນວຽກກົກ ແລະ ສອດຫ້ອຍໃນທຸກຂົງເຂດວຽກງານ, ຕະຫລອດໄລຍະແຫ່ງການຕໍ່ສູ້ປົດປ່ອຍຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ພັກໄດ້ຖືເອົາວຽກງານການເມືອງ-ແນວຄິດ ເປັນອາວຸດອັນແຫລມຄົມ ແລະ ເປັນປັດໄຈສໍາຄັນ ຕັດສິນໄຊຊະນະຂອງການປະ ຕິວັດ; ມາໃນຍຸກສະໄໝແຫ່ງການປົກປັກຮັກສາ ແລະ ສ້າງສາພັດທະນາປະເທດ ຊາດ ພັກຍີ່ງຖືສໍາຄັນຕໍ່ວຽກງານການເມືອງ-ແນວຄິດ ແລະໄດ້ປະກອບສ່ວນເຂົ້າໃນຜົນສໍາເລັດລວມຂອງການດຳເນີນພາລະກິດປ່ຽນແປງໃໝ່ຂອງພັກ.
ຕະຫລອດໄລຍະ 35 ປີ ແຫ່ງການດຳເນີນພາລະກິດປ່ຽນແປງໃໝ່, ພັກເຮົາໄດ້ປະເຊີນກັບສິ່ງທ້າທາຍທົດສອບຫລາຍປະການ ເປັນຕົ້ນການໂຄສະນາໂຈມຕີບິດເບືອນ, ໃສ່ຮ້າຍປ້າຍສີຂອງກຸ່ມຄົນບໍ່ຫວັງດີ ທີ່ຫວັງທຳລາຍມ້າງເພລະບອບໃໝ່ ເຊິ່ງມັນໄດ້ສົ່ງຜົນກະທົບບໍ່ໜ້ອຍ ຕໍ່ແນວຄິດຈິດໃຈຂອງພະນັກງານ, ສະມາຊິກພັກ ແລະ ປະຊາຊົນຊັ້ນຄົນຕ່າງໆ, ກໍ່ໃຫ້ເກີດສະພາບແນວຄິດງໍ້ງ່ຽງ, ຄອນແຄນ, ລະແວງສົງໄສຕໍ່ການນຳພາຂອງພັກ ເຮັດໃຫ້ເກີດມີບັນຫາຫຍໍ້ທໍ້ຕ່າງໆ. ຕໍ່ກັບສະພາບດັ່ງກ່າວ ວຽກງານການເມືອງ-ແນວຄິດ ໄດ້ມີບົດບາດສຳຄັນໃນການແກ້ໄຂທຸກໆບັນຫາທີ່ເກີດຂຶ້ນ ເພື່ອປົກປ້ອງແນວທາງ-ແຜນນະໂຍບາຍຂອງພັກ ທັງສຶກສາອົບຮົມແນວຄິດ, ທັງຊຸກຍູ້ສົ່ງເສີມ ໃຫ້ທົ່ວສັງຄົມຈັດຕັ້ງຜັນຂະ ຫຍາຍມະຕິ, ຄຳສັ່ງຂອງພັກ-ລັດ ໃຫ້ປະກົດຜົນເປັນຈິງ. ນອກນີ້ວຽກງານການເມືອງ-ແນວຄິດ ຍັງໄດ້ປະກອບສ່ວນສຳຄັນເຂົ້າໃນການໂຄສະນາສຶກສາອົບຮົມ, ຊີ້ແຈງອະທິບາຍ, ສ້າງຄວາມຮັບຮູ້ຢ່າງເລິກເຊິ່ງ ຕໍ່ແນວທາງ-ແຜນນະໂຍບາຍຂອງພັກ, ກົດໝາຍຂອງລັດ ແລະ ສ້າງຄວາມຮັບຮູ້ໃໝ່ ທາງດ້ານແນວຄິດທິດສະດີ, ແນວຄິດ ປະທານ ໄກສອນ ພົມວິຫານ ແລະ ຮັບຮູ້ຈິນຕະນາກາໃໝ່ ຈາກການປະກອບສ່ວນຂອງວຽກງານການເມືອງ-ແນວຄິດ ເຂົ້າໃນການຈັດຕັ້ງປະຕິບັດພາລະກິດປ່ຽນແປງໃໝ່ຂອງພັກ ທີ່ມີຜົນສຳເລັດອັນໃຫຍ່ຫລວງນັ້ນ ພັກໄດ້ຍຶດໝັ້ນຢ່າງສະເໝີຕົ້ນສະເໝີປາຍ ຕໍ່ອຸດົມການສັງຄົມນິຍົມ, ປ່ຽນແປງໃໝ່ບໍ່ແມ່ນປະຖິ້ມຈຸດໝາຍສັງຄົມນິຍົມ, ແຕ່ເປັນການກຳນົດຮູບການ, ວິທີການ ແລະ ບາດກ້າວເດີນທີ່ສອດຄ່ອງກັບເປົ້າໝາຍທີ່ກຳນົດໄວ້.
