ວັນທີ 30 ພຶດສະພາ 2024 ຢູ່ທີ່ໂຮງແຮມລາວພຣາຊາ, ນະຄອນຫຼວງວຽງຈັນ ໄດ້ຈັດກອງປະຊຸມວຽກງານດ້ານຄວາມປອດໄພທາງຫຼວງ ລະຫວ່າງ ກອງເລຂາຄະນະກໍາມະການແຫ່ງຊາດ ດ້ານຄວາມປອດໄພທາງຫຼວງ, ກອງເລຂາຄະນະກໍາມະການດ້ານຄວາມປອດໄພທາງຫຼວງ ແຂວງ, ນະຄອນຫຼວງ, ໂດຍການເປັນປະທ່ານ ຂອງທ່ານ ປອ ບຸນຕາ ອ່ອນນາວົງ ຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ, ຫົວໜ້າກອງເລຂາຄະນະກໍາມະການແຫ່ງຊາດ ດ້ານຄວາມປອດໄພທາງຫຼວງ, ຊຶ່ງມີບັນດາທ່ານຈາກຂະແໜງການ ໂຍທາທິການ ແລະ ຂົນສົ່ງ, ກອງບັນຊາການປ້ອງກັນຄວາມສະຫງົບ, ສຶກສາທິການ ແລະ ກິລາ, ສາທາລະນະສຸກ, ຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ທັງສູນກາງ ແລະ ທ້ອງຖິ່ນ ໃນຂອບເຂດທົ່ວປະເທດ ຈໍານວນ 110 ທ່ານ,
ຈຸດປະສົງຂອງກອງປະຊຸມຄັ້ງນີ້ ເພື່ອໃຫ້ແຕ່ລະພາກສ່ວນໄດ້ຖອດຖອນບົດຮຽນ ແລກປ່ຽນຄໍາຄິດຄໍາເຫັນ ຈາກການປະຕິບັດວຽກງານຕົວຈິງຢູ່ແຕ່ລະແຂວງເພື່ອຫາວິທີທາງແກ້ໄຂ ແລະ ຈັດຕັ້ງປະຕິບັດວຽກງານ ຄວາມປອດໄພທາງຫຼວງ ໃຫ້ໄດ້ຮັບຜົນດີ ແລະ ປຶກສາຫາລືລົງເລິກບັນຫາກົນໄກການປະສານງານ, ແບບແຜນເຮັດວຽກ, ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີ ເພື່ອແນໃສ່ເຮັດໃຫ້ຄວາມປອດໄພຕາມທ້ອງຖະໜົນຫລວງ ນັບມື້ດີຂຶ້ນກວ່າເກົ່າ.
