ພະແນກກະສິກຳ ແລະ ປ່າໄມ້ແຂວງ ຈຳປາສັກ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດ ແລະ ປິດໂຄງການຄຸ້ມ ຄອງປ່າໄມ້ແບບຍືນນານ.ໃນວັນທີ 29 ມິຖຸນາ 2022 ຢູ່ທີ່ໂຮງແຮມພູເທວະດາ ເມືອງປາກຊ່ອງ ແຂວງຈຳປາສັກ ພາຍໃຕ້ການເປັນປະທານຂອງທ່ານ ສີຮອງ ຄຳສະເດັດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ,ມີບັນດາທ່ານຄະນະຊີ້ນຳໂຄງການ ແລະ ຜູ້ປະສານງານຂັ້ນແຂວງ ແລະ ເມືອງທີ່ປະຕິບັດໂຄງການເຊັ່ນ: ເມືອງປະທຸມພອນ,ບາຈຽງຈະເລີນສຸກ,ສຸຂຸມາ,ມຸນລະປາໂມກ ແລະ ເມືອງຊະນະສົມບູນ ຕະຫຼອດຮອດຂະແໜງການກ່ຽວຂ້ອງເຂົ້າຮ່ວມ.
ທ່ານ ສີຮອງ ຄຳສະເດັດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຈຳປາສັກໄດ້ກ່າວວ່າ: ກອງປະຊຸມຄັ້ງນີ້ມີຄວາມສຳຄັນຫຼາຍ.ເນື່ອງຈາກເປັນການສະຫຼຸບຕີລາຄາຜົນໄດ້ຮັບຂອງໂຄງການນັບແຕ່ ປີ 2014 – ປີ 2022,ຍົກໃຫ້ເຫັນຜົນງານຂໍ້ສະດວກ,ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ຈາກການປະຕິບັດໂຄງການໃນໄລຍະ 9 ປີທີ່ຜ່ານມາ.
ໂຄງການຄຸ້ມຄອງປ່າໄມ້ແບບຍືນນານ (SUFORD-SU). ສຳລັບແຂວງຈຳປາສັກ ກໍເປັນແຂວງໜຶ່ງທີ່ມີພື້ນປ່າຜະລິດແຫ່ງ ຊາດ ທີ່ໄດ້ຮັບທຶນຈາກໂຄງການຄຸ້ມຄອງ ປ່າໄມ້ແບບຍືນນານ ຊຶ່ງມີພື້ນທີ່ກວມເອົາ 03 ແຫ່ງ ມີ 5 ເຂດຄຸ້ມຄອງ ກໍຄື 5 ເມືອງ, ມີ 101 ບ້ານ ແລະ ແບ່ງອອກ ເປັນ 15 ເຂດຄຸ້ມຄອງຍ່ອຍ ຄື: ເມືອງ ຊະນະສົມບູນ 2 ເຂດຄຸ້ມຄອງຍ່ອຍ, ເມືອງ ບາຈຽງຈະເລີນສຸກ 02 ເຂດຄຸ້ມຄອງຍ່ອຍ, ເມືອງປະທຸມພອນ 05 ເຂດຄຸ້ມຄອງຍ່ອຍ, ເມືອງສຸຂຸມາ 03 ເຂດຄຸ້ມຄອງຍ່ອຍ – ແລະ ເມືອງມຸນລະປະໂມກ 03 ເຂດຄຸ້ມຄອງຍ່ອຍ) ມີເນື້ອທີ່ທັງໝົດ : 122.634 ເຮັກຕາ,ນຳໃຊ້ງົບປະມານທັງໝົດ ປະຕິບັດໂຄງການ 9 ແສນ 6 ໝື່ນ 2 ພັນ ໂດລາ ປະມານ 10 ຕື້ກ່ວາກີບ.
ການຈັດຕັ້ງປະຕິບັດ ບັນດາກິດຈະກໍາ ເປົ້າໝາຍເພື່ອ (ຫຼຸດຜ່ອນ ການປ່ອຍອາຍພິດ ຈາກການທໍາລາຍປ່າໄມ້ ແລະ ການເຮັດໃຫ້ ປ່າໄມ້ເສື່ອມໂຊມ) ໂດຍຜ່ານການຄຸ້ມຄອງປ່າໄມ້ແບບຍືນນານ ໃນພື້ນທີ່ປ່າໄມ້ ທີ່ເປັນບຸລິມະສິດ (ເຂດປ່າຜະລິດ ສະລິວັງ ເວີນ, ເຂດປ່າຜະລິດ ປະທຸມພອນ ແລະ ເຂດປ່າຜະລິດ ໜອງຕະໂຫງກ ).
ຈຸດປະສົງ ໂຄງການເພື່ອ ເສີມຂະຫຍາຍ ແລະ ເພີ່ມທະວີການຄຸ້ມຄອງປ່າໄມ້ແບບຍືນນານ ແລະ ມີສ່ວນຮ່ວມໃນເຂດປ່າຜະລິດ. ເສີມສ້າງ, ເຜີຍແຜ່, ແລະ ບັງຄັບໃຊ້ ບັນດານິຕິກຳ ແລະກົດໝາຍຢ່າງມີປະສິດທິພາບ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງບົດສະຫຼຸບຜົນການຈັດຕັ້ງປະຕິບັດທ້າຍໂຄງການ ນັບແຕ່ ປີ 2014- 2022 ຈາກ ທ່ານ ໄພມະນີ ສີພອນວົງ ຜູ້ປະ ສານງານໂຄງການຂຫ້ນແຂວງ, ຈາກນີ້ບັນດາທ່ານ ຈາກພາກສ່ວນ ທີ່ກ່ຽວຂ້ອງຈາກ ຂັ້ນສູນກາງ, ຂັ້ນແຂວງ ແລະ ຂັ້ນເມືອງ ທີ່ເຮັດວຽກກັບໂຄງການຄຸ້ມຄອງປ່າໄມ້ແບບ ຢືນນານ ກໍໄດ້ມີຄຳຄິດຄຳເຫັນເພື່ອນຳເອົາບາງບົດຮຽນຜົນສຳເລັດນຳໄປສືບຕໍ່ຈັດຕັ້ງປະຕິບັດ ແລະ ປັບປຸງແກ້ໄຂໃຫ້ດີຂຶ້ນ ພ້ອມທັງເຜີຍແຜ່ໃຫ້ບັນດາບ້ານ, ກຸ່ມບ້ານຮັບຮູ້ເຂົ້າໃຈຕາມຍຸດທະສາດລວມຂອງວຽກງານປ່າໄມ້ ໃນ ຂັ້ນຕໍ່ໄປ.
ຂ່າວ;ພາບ: ເກດສະໜາ
