ກອງປະຊຸມສະຫຼຸບການຈັດຕັ້ງປະຕິບັດວຽກງານອະໄພຍະໂທດ ປະຈຳປີ 2023
ກອງປະຊຸມຈັດຂື້ນໃນວັນທີ 16 ມັງກອນ 2024 ທີ່ສະໂມສອນໃຫຍ່ ສະໜາມມ້າ ກະຊວງປ້ອງກັນຄວາມສະຫງົບ ພາຍໃຕ້ການເປັນປະທານຂອງ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ປະທານຄະນະກຳມະການອະໄພຍະໂທດ ລະດັບຊາດ ໂດຍມີຫົວໜ້າອົງການໄອຍະການປະຊາຊົນສູງສຸດ, ບັນດາສະຫາຍ ຄະນະກຳມະການອະໄພຍະໂທດຂັ້ນສູນກາງ ແລະ ທ້ອງຖິ່ນເຂົ້າຮ່ວມ.
ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ກ່າວວ່າ “ ສຳລັບວຽກງານອະໄພຍະໂທດ ແມ່ນວຽກງານໜຶ່ງທີ່ສໍາຄັນທີ່ຕິດພັນກັບແນວທາງນະໂຍບາຍຂອງພັກ-ລັດ; ເຊິ່ງປີທີ່ຜ່ານມາຄະນະກຳມະການອະໄພຍະໂທດ ແມ່ນໄດ້ເອົາໃຈໃສ່ນຳພາ-ຊີ້ນຳຢ່າງໃກ້ຊິດ ໂດຍສະເພາະການຕິດຕາມກວດກາການຊຸກຍູ້ຄະນະກຳມະການອະໄພຍະໂທດແຕ່ລະຂັ້ນ ໃຫ້ດຳເນີນວຽກງານໄປຕາມຂັ້ນຕອນ, ລະບຽບການ, ຮັບປະກັນຄວາມຖືກຕ້ອງ, ໂປ່ງໃສ ແລະ ຍຸຕິທຳ ”
ກອງປະຊຸມຍັງໄດ້ພ້ອມກັນຄົ້ນຄວ້າເນື້ອໃນຕົ້ນຕໍ ກໍ່ຄືວຽກງານສຸມໃສ່ສະຫຼຸບຕີລາຄາການຊີ້ນຳ-ນຳພາ ຂອງຄະນະກຳມະການອະໄພຍະໂທດ ຂັ້ນຕ່າງໆໃນປີຜ່ານມາ ແລະ ກຳນົດທິດທາງວຽກງານຈຸດສູຸມໃນປີ 2024, ຄົ້ນຄວ້າເນື້ອໃນກອງປະຊຸມເພື່ອຄວາມເປັນເອກະພາບໃນການຕີລາຄາສະພາບການຮອບດ້ານ, ມີຄວາມຮັບຜິດຊອບໃນການເບິ່ງບັນຫາໃຫ້ຖືກກັບຄວາມເປັນຈິງ, ຍົກໃຫ້ເຫັນອັນທີ່ເຮັດໄດ້, ອັນທີ່ເປັນບົດຮຽນ ແລະ ສິ່ງຫຍໍ້ທໍ້ຄົງຄ້າງຕ່າງໆ ກໍຄືການແກ້ໄຂບັນຫາຕົວຈິງໃຫ້ຖືກຕ້ອງ ແລະ ຮັບປະກັນໃຫ້ການກຳນົດແຜນວຽກຈຸດສຸມໃນຕໍ່ໜ້າ ແທດເໝາະກັບສະພາບແວດລ້ອມຕົວຈິງ.
ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ລາຍງານວ່າ : ” ການອະໄພຍະໂທດ ແມ່ນການປະຕິບັດນະໂຍບາຍມະນຸດສະທຳຂອງພັກ ແລະ ລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາ ຊົນລາວ ດ້ວຍການຫຼຸດຜ່ອນໂທດ ແລະ ປ່ອຍຕົວນັກໂທດ ໂດຍສະເພາະແມ່ນວັນ ຊາດທີ 2 ທັນວາ ຂອງແຕ່ລະປີ, ຄະນະກຳມະການອະໄພຍະໂທດຂັ້ນຕ່າງໆ ໄດ້ຈັດຕັ້ງປະຕິບັດນະໂຍບາຍການໃຫ້ອະໄພຍະໂທດແກ່ນັກໂທດ ຕາມລັດຖະດຳລັດຂອງປະທານປະເທດ ຢ່າງຖືກຕ້ອງ.
ນັກໂທດທີ່ໄດ້ຮັບການໃຫ້ອະໄພຍະໂທດ ໃນປີ 2023 ຕາມລັດຖະດໍາລັດຂອງປະທານປະເທດ ມີທັງໝົດ 1.824 ຄົນ, ຍິງ 238 ຄົນ; ຕ່າງປະເທດ 16 ຄົນ. ໃນນີ້ມີນັກໂທດຕະຫຼອດຊີວິດ 4 ຄົນ, ຍິງ 2 ຄົນ; ນັກໂທດປະຫານຊີວິດ 9 ຄົນ, ຍິງ 2 ຄົນ, ສຳລັບມາດຕະການຈັດຕັ້ງປະຕິບັດວຽກງານອະໄພຍະໂທດ ປະຈໍາປີ 2024 ກອງເລຂາ ແລະ ຄະນະກໍາມະການອະໄພຍະໂທດຂັ້ນຕ່າງໆ ຈະເພີ່ມທະວີການໂຄສະນາສຶກສາອົບຮົມໂດຍຈັດຕັ້ງເຊື່ອມຊຶມ ລັດຖະບັນຍັດ ວ່າດ້ວຍການໃຫ້ອະໄພຍະໂທດ, ແນວທາງນະໂຍບາຍຂອງລັດຖະບານ ກໍຄືບັນດາເອກະສານຕ່າງໆທີ່ກ່ຽວຂ້ອງກັບວຽກງານອະໄພຍະໂທດໃຫ້ເລິກເຊິ່ງ ຈັດຕັ້ງຜັນຂະຫຍາຍບັນດາວຽກຈຸດສຸມທີ່ວາງອອກໃຫ້ຖືກຕ້ອງ, ວ່ອງໄວ ແລະ ທັນເວລາ “
