ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 21-22 ທັນວາ 2023, ທີ່ເມືອງວັງວຽງ, ແຂວງວຽງຈັນ, ກະຊວງການຕ່າງປະເທດ ໄດ້ຈັດກອງປະຊຸມສະຫຼຸບວຽກງານ ປະຈໍາປີ 2023 ແລະ ວາງທິດທາງປະຈຳປີ 2024 ຂອງຄະນະຈຸດປະສານງານ ແລະ ກອງເລຂາຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຢູ່ ສປປ ລາວ ພາຍໃຕ້ການເປັນປະທານ ຂອງ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໂດຍມີຄະນະຈຸດປະສານງານ ປພຍ ຂັ້ນຫົວໜ້າ ແລະ ຮອງຫົວໜ້າຫ້ອງການ, ຫົວໜ້າກົມ ແລະ ບັນດາຮອງຫົວໜ້າກົມ ພ້ອມທັງຜູ້ຕາງໜ້າຈາກບັນດາກະຊວງ ແລະ ອົງການທຽບເທົ່າກະຊວງທີ່ກ່ຽວຂ້ອງ ເຂົ້າຮ່ວມຫຼາຍກວ່າ 60 ຄົນ.
ໃນໂອກາດກ່າວເປີດກອງປະຊຸມ, ທ່ານ ໂພໄຊ ໄຂຄຳພິທູນ ໄດ້ຕີລາຄາສະພາບ ການພາກພື້ນ ແລະ ສາກົນ ໃນໄລຍະໜຶ່ງປີຜ່ານມາ ເປັນຕົ້ນບັນຫາສັນຕິພາບ ແລະ ຄວາມຫມັ້ນຄົງສາກົນ ກໍ່ຄືບັນຫາວິກິດ ການດ້ານຕ່າງໆ ຊຶ່ງເປັນສິ່ງທ້າທາຍອັນໃຫຍ່ຫຼວງ ທີ່ຈະສືບຕໍ່ສົ່ງຜົນກະທົບຕໍ່ການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມ ກໍ່ຄືການບັນລຸບັນດາຄາດໝາຍ ປພຍ ຂອງ ສປປ ລາວ. ພ້ອມກັນນັ້ນ, ທ່ານ ໄດ້ຍົກໃຫ້ເຫັນການປະກອບສ່ວນຢ່າງຕັ້ງໜ້າ ຂອງ ສປປ ລາວ ໃນການຮ່ວມມື ແລະ ການປະຕິບັດພັນທະສາກົນ ລວມທັງຄວາມໝາຍໝັ້ນ ໃນການເລັ່ງລັດການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ທ່າມກາງສະພາບການໂລກໃນປັດຈຸບັນທີ່ຜັນແປຢ່າງໄວວາ ແລະ ສັບສົນ ໂດຍຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ຍຸດທະສາດດ້ານການເງິນ ໂດຍມີການສະໜັບສະໜູນ ແລະ ການຮ່ວມມືຈາກສາກົນ ກໍ່ຄື ຄູ່ຮ່ວມພັດທະນາ.
ກອງປະຊຸມໄດ້ຮັບຟັງການນຳສະເໜີ ບົດ 6 ຫົວບົດ ໂດຍສະເພາະຄວາມຄືບໜ້າ, ສິ່ງທ້າທາຍ, ບົດຮຽນທີ່ຖອດຖອນໄດ້ ແລະ ແຜນການໃນຕໍ່ໜ້າ ຂອງການຈັດ ຕັ້ງປະຕິບັດວຽກ ປພຍ, ແຜນພັດທະນາເສດຖະກິດ-ສັງຄົມ ແຫ່ງຊາດ ສະບັບທີ 9, ການເກັບກຳຂໍ້ມູນຕົວຊີ້ບອກ ປພຍ ແຕ່ລະເປົ້າໝາຍຂອງສູນສະຖິຕິແຫ່ງ ຊາດ, ສະພາບການຈັດຕັ້ງປະຕິບັດ ປພຍ ທີ 18 ຊີວິດປອດໄພຈາກລະເບີດບໍ່ທັນແຕກ ເຊິ່ງເປັນເປົ້າໝາຍ ປພຍ ສະເພາະຂອງ ສປປ ລາວ ແລະ ການກະກຽມຮ່າງບົດລາຍງານແຫ່ງຊາດແບບສະໝັກໃຈ ຂອງ ສປປ ລາວ ສະບັບທີ 3 (VNR3) ເພື່ອນຳສະເໜີຕໍ່ກອງປະຊຸມເວທີປຶກສາຫາລືດ້ານການເມືອງລະດັບສູງ ທີ່ ສຳນັກງານໃຫຍ່ອົງການ ສປຊ ທີ່ນິວຢອກ, ສ.ອາເມລິກາ ໃນເດືອນ ກໍລະກົດ 2024. ບັນດາຜູ້ເຂົ້າຮ່ວມກໍ່ໄດ້ປຶກສາຫາລື ແລະ ແລກປ່ຽນບົດຮຽນປະສົບ ການ, ຕີລາຄາຈຸດດີ, ສິ່ງທ້າທາຍໃນການຈັດຕັ້ງປະຕິບັດ ປພຍ ແລະ ວຽກງານປິ່ນອ້ອມອື່ນໆທີ່ກ່ຽວຂ້ອງຂອງແຕ່ລະຂະແໜງການ ໃນຕະຫຼອດໄລຍະສົກປີ 2023 ກໍ່ຄືການກຳນົດທິດທາງ ແລະ ວາງແຜນ ສໍາລັບໄລຍະສົກປີ 2024 ໂດຍສະເພາະການປັບປຸງກົນໄກການເຮັດວຽກຂອງຄະນະຈຸດປະສານ ປພຍ, ການປະສານງານລະຫວ່າງບັນດາ ກະຊວງທີ່ຮັບຜິດຊອບແຕ່ລະ ປພຍ ແລະ ການຮ່າງບົດລາຍງານ VNR ສະບັບທີ 3.
ກອງປະຊຸມໃນຄັ້ງນີ້ ໄດ້ຈັດຂຶ້ນໂດຍໄດ້ຮັບທຶນສະໜັບສະໜູນຈາກອົງການ ອຸຍນີເຊັບ ປະຈຳ ສປປ ລາວ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ