ກອງປະຊຸມສະຫຼຸບວຽກງານໂຄງການອານຸລັກຮັກສາໝີ ແລະ ສູນຮັກສາພັນສັດປ່າ ຂອງແຂວງຫຼວງພະບາງ ໄລຍະ 3 ປະຈໍາປີ 2020 ແລະວາງແຜນການປີ 2021 ໄດ້ຈັດຂື້ນໃນວັນທີ 27 ມັງກອນນີ້ ທີ່ຫ້ອງປະຊຸມພະແນກກະສິກໍາ ແລະ ປ່າມໄມ້ ແຂວງ ໂດຍເປັນປະທານຂອງ ທ່ານ ນາງ ສີລິພອນ ສຸພັນທອງ ຮອງເຈົ້າແຂວງຫຼວງພະບາງ, ທ່ານ ສີວອນ ວົງຄຳຈັນ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີຕາງໜ້າກົມກ່ຽວຂ້ອງຂອງກະຊວງ, ຊ່ຽວຊານ, ຜູ້ຈັດການໂຄງການ ພ້ອມດ້ວຍພາກສ່ວນທີ່ກ່ຽວຂ້ອງຂອງແຂວງ ແລະນະຄອນ-ຫຼວງພະບາງ ເຂົ້າຮ່ວມ. ພິທີ ທ່ານ ແສງອາລຸນ ວົງໄຊ ຜູ້ຈັດການໂຄງການ ອານຸລັກສາໝີ ແລະ ສູນຮັກສາພັນສັດປ່າ ແຂວງຫຼວງພະບາງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານ ໃນໜຶ່ງປີຜ່ານມາ ແລະວາງທິດທາງ ແຜນການ ຄາດໝາຍຈຸດສຸມໃນໜຶ່ງປີຕໍ່ໜ້າ. ໂຄງການອານຸລັກໝີລາວ ໄດ້ຮັບການສ້າງຕັ້ງຂື້ນໃນປີ 2003 ໂດຍການຮ່ວມມື ລະຫວ່າງ ກອງທືນປົກປັກຮັກສາໝີ ກັບ ພະແນກກະສິກຳ ແລະ ປ່າໄມ້ແຂວງ ມາຮອດປັດຈຸບັນ ແມ່ນຢູ່ໃນໄລຍະທີ 3 ໂດຍກອງທືນປົກປ້ອງໝີເປັນຜູ້ໃຫ້ທືນ ດຳເນີນໂຄງການປະມານ 1.855.200 ໂດລາສະຫະລັດ ປະຕິບັດກິດຈະກຳຢູ່ 2 ແຫ່ງຄື: ສູນຊ່ວຍເຫຼືອໝີຕາດກວາງຊີ ແລະສູນຮັກສາພັນສັດປ່າ ບ້ານໜອງໂຕກ ນະຄອນ ຫຼວງພະບາງ ລວມມີເນື້ອທີ່ທັງໝົດ 26 ເຮັກຕາ ສ່ວນກິດຈະກຳທີພວມປະຕິບັດປະກອບມີ ໃຫ້ການດູແລ ເບິ່ງແຍງ ແລະອານຸລັກສັດ ຮ່ວມກັບພາກລັດຕອບສະໜອງດ້ານສັດຕະວະແພດ, ການປັບປຸງ ແລະກໍ່ສ້າງທີພັກອາໄສຂອງສັດ, ການສ້າງກິດຈະກຳການຮຽນຮູ້ກັບການອານຸລັດສັດປ່າ ແລະສິ່ງແວດລ້ອມ, ການພັດທະນາແຜນປະຕິບັດແຫ່ງຊາດ ເພື່ອປົກປັກຮັກສາໝີໃນປະເທດລາວ. ໂດຍໂຄງການໄດ້ສົ່ງເສີມ ແລະອຳນວຍຄວາມສະດວກໃຫ້ແກ່ອົງການປົກຄອງທ້ອງຖິ່ນ ຕໍ່ກັບວຽກງານສະກັດກັ້ນ ການຄ້າສັດຜິດກົດໝາຍທຸກຊະນິດ, ເປັນການສົ່ງເສີມຂະບວນການປູກຈິດສຳນຶກ ການອານຸລັກສິ່ງແວດລ້ອມໃຫ້ແກ່ຊຸມຊົນ, ທ້ອງຖິ່ນ ໃນການປັກປັກຮັກສາ ອານຸລັກສັດປ່າ ຕິດພັນກັບສະໜູນຄວາມພະຍາຍາມຂອງລັດຖະບານ ທີ່ຈະຢຸດຕິຟາມລ້ຽງໝີ-ລຸດຜ່ອນການລ້ຽງໝີ ແລະສັດປ່າ ແບບຊະຊາຍ ພ້ອມທັງເປັນການຊ່ວຍເຫຼືອທາງດ້ານເຕັກນິກ, ວິຊາການ ໃນການດູແລເບິ່ງແຍງໝີ ແລະສັດປ່າ ໃຫ້ຍືນຍົງ. ໂອກາດນີ້ ທ່ານ ນາງ ສີລິພອນ ສຸພັນທອງ ໄດ້ມີຄຳເຫັນເນັ້ນໃນພາກສ່ວນກ່ຽວຂ້ອງ ເປັນເຈົ້າການສືບຕໍ່ປົກປັກຮັກສາໝີ ແລະສັດປ່າ, ສືບຕໍ່ປະສານສົມທົບກັບພາກສ່ວນກ່ຽວຂ້ອງ ໃນການຕ້ານ ແລະສະກັດກັ້ນ ການຄ້າສັດຫວງຫ້າມທີຜິດກົດໝາຍ, ປຸກລະດົມ ແລະສຶກສາໃຫ້ຄວາມຮູ້ ກ່ຽວກັບການອານຸລັກໝີ ແລະສັດປ່າແກ່ປະຊາຊົນບັນດາເຜົ່າ ໃນທ້ອງຖິ່ນຮູ້ຈັກອານຸລັກຮັກສາສັດປ່າທີໃກ້ຈະສູນພັນ ເອົາໃຈໃສ່ຄຸ້ມຄອງ ແລະປະຕິບັດແຜນກິດຈະກຳທີ່ວາງໄວ້ໃຫ້ມີຜົນສຳເລັດ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ປະກອບຄຳເຫັນໃສ່ເນືອໃນບົດສະຫຼຸບ, ແຜນວຽກງານຈຸດສຸມ ໃຫ້ສອດຄ່ອງ ເພື່ອເປັນເອກະພາບຮັບຮອງເອົາແຜນການປີ 2021 ໃຫ້ມີຜົນສຳເລັດຕາມຄາດໝາຍທີ່ວາງໄວ້.
   
ຂ່າວ: ແຫຼ້ ສຸລີນພອນ
Loading...