ມື້ທີ່ 5 ຂອງການດໍາເນິນກອງປະຊຸມສະໄຫມສາມັນເທື່ອທີ່ 4 ຂອງສະພາແຫ່ງຊາດ ຊຸດທີ IX ວັນທີ 9 ທັນວາ 2022 ດໍາເນິນພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຜູ້ແທນກອງປະຊຸມໄດ້ຮັບຟັງ ແລະປະກອບຄໍາເຫັນເຂົ້າໃສ່ບົດລາຍງານການສ້າງວິຊາຊີບ ການພັດທະນາສີມືແຮງງານແລະສ້າງວຽກເຮັດງານທຳໃຫ້ປະຊາຊົນເພື່ອແກ້ໄຂການຫວ່າງງານ ທີ່ສະເຫນີໂດຍທ່ານນາງໃບຄຳ ຂັດຕິຍະ ລັດຖະມົນຕີກະຊວງແຮງງານແລະສະຫວັດດິການສັງຄົມ.
ທ່ານນາງ ໃບຄໍາ ຂັດຕິຍະ ລັດຖະມົນຕີກະຊວງແຮງງານ ແລະສະຫວັດດິການສັງຄົມ ໄດ້ຜ່ານບົດລາຍງານກ່ຽວກັບການສ້າງວິຊາຊີບ ການພັດທະນາສີມືແຮງງານ ແລະການສ້າງວຽກເຮັດງານທຳໃຫ້ປະຊາຊົນເພື່ອແກ້ໄຂການຫວ່າງງານ ເປັນຕົ້ນ ການສ້າງອາຊີບ ການພັດທະນາສີມືແຮງງານ, ການສ້າງວຽກເຮັດງານທໍາ ດ້ານສ້າງສີມືແຮງງານ ຈຸດອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະການຈັດຕັ້ງປະຕິບັດວຽກງານຕົວຈິງ,ທິດທາງແກ້ໄຂ ລວມເຖິງຄາດຫມາຍສູ້ຊົນໃນຕໍ່ຫນ້າ ໃນນີ້ສະເພາະການສ້າງວຽກເຮັດງານທຳ ແລະການສ້າງສີມືແຮງງານໄລຍະ 11 ເດືອນຜ່ານມາ ທ່ານ ນາງໃບຄຳ ຂັດຕິຍະ ໃຫ້ຮູ້ວ່າ : ເພື່ອສ້າງໂອກາດໃຫ້ຜູ້ອອກແຮງງານໄດ້ເຂົ້າເຖິງຕະຫລາດແຮງງານພາຍໃນ ແລະຕ່າງປະເທດ ສົ່ງເສິມໃຫ້ປະກອບອາຊີບອິດສະຫຼະ ໃນ11 ເດືອນມານີ້ ຂະແຫນງແຮງງານ ແລະສະຫວັດດິການສັງຄົມ ໄດ້ເອົາໃຈໃສ່ປະສົມປະສານກັບຂະແຫນງການສູນກາງທ້ອງຖິ່ນ ແລະອົງການຜູ້ຕາງຫນ້າຜູ້ອອກແຮງງານ ແລະອົງການຜູ້ຕາງຫນ້າຜູ້ໃຊ້ແຮງງານສ້າງນິຕິກຳ ,ນະໂຍບາຍຈໍານວນຫນຶ່ງເພື່ອເປັນບ່ອນອີງໃນການສົ່ງເສິມໃຫ້ຜູ້ອອກແຮງງານໄດ້ມີວຽກເຮັດງານທຳທີ່ຫມັ້ນຄົງ ມີລາຍໄດ້ທີ່ສົມເຫດສົມຜົນ ທັງເປັນການປົກປ້ອງສິດຜົນປະໂຫຍດຂອງຜູ້ອອກແຮງງານ ແລະຜູ້ໃຊ້ແຮງງານເປັນຕົ້ນ ດໍຳລັດວ່າດ້ວຍຂໍ້ມູນຂ່າວສານຕະຫລາດແຮງງານຍຸດທະສາດແຫ່ງຊາດ ເພື່ອສົ່ງເສິມການມີວຽກເຮັດງານທຳໃນຊົນນະບົດ, ດຳລັດວ່າດ້ວຍການຈັດສົ່ງຜູ້ອອກແຮງງານລາວໄປເຮັດວຽກຢູ່ຕ່າງປະເທດ ຂໍ້ຕົກລົງວ່າດ້ວຍການຄຸ້ມຄອງວິສະຫະກິດບໍລິການຈັດຫາງານ ຂໍ້ຕົກລົງວ່າດ້ວຍການຂຶ້ນທະບຽນຜູ້ຫວ່າງງານ, ສໍາຫລັບສະມາຊິກປະກັນສັງຄົມ, ຄົ້ນຄວ້າປັບປຸງຄ່າແຮງງານຂັ້ນຕ່ຳ ຈາກ 1.100 ກີບ ມາເປັນ 1.200 ກີບ ໃນເດືອນສິງຫາປີ 2022 ແລະ 1.300 ກີບໃນເດືອນພຶດສະພາປີ 2023. ພ້ອມກັນນັ້ນ ຍັງໄດ້ພະຍາຍາມສ້າງ ແລະພັດທະນາລະບົບຂໍ້ມູນຂ່າວສານຕະຫລາດແຮງງານ ດ້ວຍການເຊື່ອມຖານຂໍ້ມູນ ຄວາມຕ້ອງການ ແລະຄວາມສາມາດໃນການສະຫນອງກັບບັນດາກະຊວງ ຂະແຫນງການເສດຖະກິດ ແລະພາກລັດວິສະຫະກິດ ແລ້ວນຳໃຊ້ເວັບໄຊ ສະຖິຕິແຮງງານ ແລະສະຫວັດດິການສັງຄົມ ແລະເວັບໄຊຂໍ້ມູນຂ່າວສານຕະຫລາດແຮງງານ ທີ່ມີເຄືອຂ່າຍແຕ່ຂັ້ນກະຊວງຮອດຂັ້ນເມືອງ ໄດ້ລິເລີ່ມຮ່ວມມືກັບພາກທຸລະກິດ ຄົ້ນຄວ້າສ້າງຖານຂໍ້ມູນແບບທັນສະໄຫມ ຂະຫຍາຍ ແລະສະຫນອງອຸປະກອນຮັບໃຊ້ໃນການບໍລິການຢູ່ຈຸດບໍລິການຈັດຫາງານຢູ່ 17 ແຂວງໃນຂອບເຂດທົ່ວປະເທດໃຫ້ມີຄວາມເຂັ້ມແຂງຂຶ້ນກວ່າເກົ່າ.
ພາຍຫລັງ ລັດຖະມົນຕີກະຊວງແຮງງານ ແລະສະຫວັດດິການສັງຄົມ ໄດ້ຂຶ້ນຜ່ານລາຍງານກ່ຽວກັບການສ້າງວິຊາຊີບການພັດທະນາສີມືແຮງງານ ໃນການສ້າງວຽກເຮັດງານທຳໃຫ້ປະຊາຊົນ ເພື່ອແກ້ໄຂການຫວ່າງງານສຳເລັດ ທ່ານໄຊສົມພອນ ພົມວິຫານ ປະທານສະພາແຫ່ງຊາດໃນນາມ ປະທານກອງປະຊຸມ ໄດ້ສະເຫນີໃຫ້ຕາງຫນ້າຄະນະສະພາແຫ່ງຊາດປະກອບຄວາມເຫັນ ໃສ່ບົດລາຍງານດັ່ງກ່າວ ເພື່ອເປັນທິດທາງໃນການປັບປຸງ ແລະຈັດຕັ້ງປະຕິບັດວຽກງານນີ້ໃຫ້ມີປະສິດທິພາບ ແລະປະສິດທິຜົນຫລາຍຂຶ້ນ ,ຈາກນັ້ນສະມາຊິດສະພາແຫ່ງຊາດຈາກເຂດເລືອກຕັ້ງຕ່າງໄດ້ປະກອບຄໍາຄິດຄໍາເຫັນເຂົ້າໃສ່ບົດລາຍງານດັ່ງກ່າວ.
