ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຈຳປາສັກ ຊຸດທີ I ໄຂຂຶ້ນຢ່າງເປັນທາງການ

ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງ ຊຸດທີ I ໄດ້ໄຂຂື້ນຢ່າງເປັນທາງການໃນຕອນເຊົ້າຂອງວັນທີ 30 ກໍລະກົດ 2020 ນີ້, ຢູ່ທີ່ສະໂມສອນຫຼັກ 4 ຂອງແຂວງຈໍາປາສັກ ໂດຍການເປັນປະທານຂອງ ທ່ານ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງຈຳປາສັກພ້ອມຄະນະ, ເຂົ້າຮ່ວມມີ ທ່ານ ປອ ວິໄລວົງ ບຸດດາຄຳ ເລຂາພັກແຂວງ ເຈົ້າແຂວງຈຳປາສັກ, ມີອະດີດການນຳແຂວງ,ສະມາຊິກສະພາແຫ່ງຊາດເຂດເລືອກຕັ້ງທີ 15, ສະມະຊິກສະພາປະຊາຊົນແຂວງ, ບັນດາຫົວໜ້າພະແນກການ, ກົມກອງອ້ອມຂ້າງແຂວງ, ເມືອງ, ຕົວແທນທຸກອົງການຈັດຕັ້ງອ້ອມ ຂ້າງເຂົ້າຮ່ວມ. ທ່ານ ເມກສະຫວັນ ພົມພິທັກ ປະທານສະພາປະຊາຊົນແຂວງຈໍາປາສັກໄດ້ກ່າວໄຂກອງປະຊຸມຄັ້ງນີ້ ເຊິ່ງທ່ານໄດ້ກ່າວວ່າ: ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຊຸດທີ I ນີ້, ແມ່ນເພື່ອເປັນການຕິດຕາມກວດກາຄືນການພັດທະນາເສດຖະກິດ -ສັງຄົມ, ຂໍ້ສະດວກ, ຂໍ້ຫຍຸ້ງຍາກຂອງການພັດທະນາ ເພື່ອຊຸກຍູ້ໃຫ້ມີການແກ້ໄຂ ແລະ ພ້ອມກັນຈັດຕັ້ງປະຕິບັດໃນຕໍ່ໜ້າໃຫ້ສຳເລັດ, ກອງປະຊຸມຄັ້ງນີ້ຈະໄດ້ພິຈາລະນາວຽກງານຕໍຕົ້ນດັ່ງນີ້: 1. ຮັບຮອງເອົາບົດລາຍງານຂອງທ່ານເຈົ້າແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດຢູ່ແຂວງຈຳປາສັກ 6 ເດືອນຕົ້ນປີ 2020 ແລະ ທິດທາງວຽກງານຈຸດສຸມ 6 ເດືອນທ້າຍປີ 2020 ; 2. ພິຈາລະນາຮັບຮອງເອົາບົດລາຍງານຂອງຄະນະປະຈຳສະພາປະຊາຊົນແຂວງກ່ຽວກັບການເຄື່ອນໄຫວວຽກງານ 6 ເດືອນຕົ້ນປີ 2020 ແລະ ທິດທາງວຽກງານຈຸດສຸມ 6 ເດືອນທ້າຍປີ 2020 ແລະ ແຜນການເຄື່ອນໄຫວຮອດກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງຈຳປາສັກຊຸດທີ II 3. ພິຈາລະນາການເລືອກຕັ້ງກຳມະການຄະນະປະຈຳສະພາປະຊາຊົນແຂວງຕາມການສະເໜີຂອງຄະນະປະຈຳສະພາປະຊາຊົນແຂວງ 4 .ພິຈາລະນະຮັບຮອງຮ່າງແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມແຂວງຈຳປາສັກ ຈາກນີ້ກອງປະຊຸມຈະໄດ້ມີການຕອບຄໍາຖາມກ່ຽວກັບບັນຫາພົ້ນເດັ່ນທີ່ປະຊາຊົນໃຫ້ຄວາມສົນໃຈຕື່ມອີກ. ພາຍຫຼັງກອງປະຊຸມໄດ້ໄຂຂື້ນ ທ່ານ ປອ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມະມານແຫ່ງລັດ 6 ເດືອນຕົ້ນປີ 2020 ແລະ ທິດທາງ ຈຸດສຸມ 6 ເດືອນທ້າຍປີ 2020 , ທ່ານ ຄໍາສີ ປ່ຽງວໍລະວົງ ໄດ້ປະກອບຄໍາເຫັນໃສ່ບົດລາຍງານຂອງທ່ານເຈົ້າແຂວງຈຳປາສັກ ຈາກນີ້ແມ່ນຮັບຟັງລາຍງານກ່ຽວກັບຜົນການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງຈຳປາສັກວ່າດ້ວຍການຮັບຮອງເອົາບົດລາຍງານຂອງພະແນກກະສິກຳແລະປ່າໄມ້ແຂວງກ່ຽວກັບການບຸກລຸກເນື້ອທີ່ປ່າໄມ້ໃນເຂດປ່າສະຫງວນ ແລະ ເຂດປ່າຜະລິດເພື່ອປູກມັນຕົ້ນ,ຮັບຟັງການລາຍງານຂອງພະແນກສາທາລະນະສຸກກ່ຽວກັບຜົນໄດ້ຮັບໃນການຈັດຕັ້ງປະຕິບັດມາດຕະການໃນການປ້ອງກັນການແຜ່ລະບາດຂອງພະຍາດໂຄວິດ 19 ແລະ ພະຍາດຕາມລະດູການ, ແລະຮັບຟັງການລາຍງານຂອງພະແນກແຮງງານ ແລະ ສະຫວັດດີການສັງຄົມແຂວງ ກ່ຽວກັບມາດຕະການເພື່ອຮັບມື ແລະ ແກ້ໄຂບັນຫາ ວ່າງງານຂອງແຮງງານພາຍໃນແຂວງ ແລະ ແຮງງານທີ່ມາຈາກປະເທດເພື່ອນບ້ານ ແລະ ຄໍາເຫັນພະແນກການອື່ນໆ.ຈາກນີ້ຍັງຈະມີການຕັ້ງຄໍາຖາມເຈາະຈີ້ມຕໍ່ບັນຫາທີ່ ສສຂ ທີ່ມີຄວາມສົນໃຈອີກດ້ວຍ. ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຈຳປາສັກຊຸດທີ I ຈະດໍາເນີນໄປເປັນເວລາ 2 ວັນ ນັບແຕ່ວັນທີ 30- 31 ກໍລະກົດ 2020 ຈິ່ງຈະສໍາເລັດ.

ຂ່າວ: ຍໍພະກິ່ນ ແກ້ວຫາວົງ ພາບ: ເກດສະນາ ແກ້ວສຸວັນນະແສງ