ສະພາປະຊາຊົນແຂວງ (ສພຂ)ໄຊສົມບູນ ຊຸດທີ II ໄດ້ເປີດກອງປະຊຸມສະໄໝສາມັນ ເທື່ອທີ 7 ໃນຕອນເຊົ້າຂອງວັນທີ 31 ກໍລະກົດ 2024, ທີ່ສະໂມສອນເມືອງອະນຸວົງ ໂດຍການເປັນປະທານຂອງ ທ່ານ ແດງ ປະທຸມທອງ ປະທານສະພາປະຊາຊົນແຂວງໄຊສົມບູນ ເປັນກຽດເຂົ້າຮ່ວມຂອງ ທ່ານ ພອຍຄຳ ຮ່ງບຸນຍວງ ເຈົ້າແຂວງໄຊສົມບູນ, ມີບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແລະ ສະມາຊິກສະພາປະຊາຊົນແຂວງພ້ອມດ້ວຍການນຳພັກ-ລັດຂັ້ນສູງຂອງແຂວງ, ແຂກຈາກສູນກາງແລະແຂກຖືກຊີນເຂົ້າຮ່ວມ.
ໃນໂອກາດກ່າວສູນທອນພົດ ທ່ານ ແດງ ປະທຸມທອງ ໄດ້ຍົກໃຫ້ເຫັນເຖິງສະພາບການຢູ່ພາຍໃນພາກພື້ນ ແລະ ສາກົນທີ່ມີການຜັນແປໄປຢ່າງສະຫຼັບຊັບຊ້ອນ ໂດຍສະເພາະແມ່ນສະພາບຄວາມຫຍຸ້ງຍາກ ທາງດ້ານເສດຖະກິດ-ການເງິນ, ອັດຕາແລກປ່ຽນເໜັງຕີງແຮງ, ເງິນກີບອ່ອນຄ່າເຮັດໃຫ້ລາຄາສິນຄ້າ ແລະ ຄ່າຄອງຊີບ, ລາຄານ້ຳມັນເຊື້ອໄຟຖີບຕົວສູງຂຶ້ນແຕ່ພາຍໃຕ້ການນໍາພາ-ຊີ້ນຳຂອງການນຳແຂວງ ຕະຫຼອດທຸກພາກສ່ວນໃນສັງຄົມເຮັດໃຫ້ແຂວງໄຊສົມບູນ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດມີການສືບຕໍ່ຂະຫຍາຍຕົວ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກສູງຂຶ້ນເປັນກ້າວໆ.
ກອງປະຊຸມສະໄໝສາມັນ ເທື່ອທີ 7 ຄັ້ງນີ້ຈະໄດ້ຮັບຟັງການລາຍງານ, ການພິຈາລະນາ, ການຮັບຮອງເອົາບັນຫາສໍາຄັນພື້ນຖານຂອງແຂວງຄື: ຮັບຟັງບົດລາຍງານໂດຍສັງເຂບຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດວຽກງານພົ້ນເດັ່ນຂອງແຂວງໄຊສົມບູນ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024, ບົດລາຍງານແຜນການແລະ ການລົງທຶນແຂວງກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024, ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງປະຈໍາ 6 ເດືອນຕົ້ນປີແລະທິດທາງແຜນການ 6 ເດືອນທ້າຍປີ 2024, ບົດລາຍງານກ່ຽວກັບຈັດຕັ້ງປະຕິບັດວຽກງານພັດທະນາຊົດນະບົດ ແລະ ແກ້ໄຂຄວາມທຸກຍາກຂອງແຂວງໄຊສົມບູນ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕາມມະຕິຮັບຮອງຂອງສະພາປະຊາຊົນແຂວງ ສະບັບເລກທີ 78/ສພຂ, ລົງວັນທີ 13 ມີນາ 2024, ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດດໍາລັດ 414/ລບ ໃນໄລຍະຜ່ານມາແລະວາງແຜນທິດທາງແຜນການໃນຕໍ່ໜ້າ, ບົດລາຍງານຂອງພະແນກພະລັງງານແລະບໍ່ແຮ່ແຂວງໄຊສົມບູນ ກ່ຽວກັບການຈັດຕັ້ງປະຕິບັດບັນດາໂຄງການລົງທຶນແຮ່ທາດ ໃນໄລຍະຜ່ານມາແລະທິດທາງແຜນການໃນຕໍ່ໜ້າ, ການລາຍງານວຽກງານຂອງກອງທຶນພັດທະນາ ໄຊສົມບູນ ປະຈຳ 6 ເດືອນຕົ້ນປີ ແລະ ທິດທາງແຜນການປະຈຳ 6 ເດືອນທ້າຍປີ 2024, ການລາຍງານການຈັດຕັ້ງປະຕິບັດການເຄື່ອນໄຫວວຽກງານ ໄລຍະແຕ່ກອງປະຊຸມສະໄໝສາມັນ ເທື່ອທີ 6 ຫາກອງປະຊຸມສະໄໝສາມັນ ເທື່ອທີ 7 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງໄຊສົມບູນ ຊຸດທີ II ແລະກອງປະຊຸມຍັງຈະໄດ້ອອກມະຕິຮັບຮອງເອົາວຽກງານທີ່ສຳຄັນ ຈຳນວນ 4 ສະບັບ ພ້ອມນີ້ກອງປະຊຸມຍັງຈະໄດ້ຮັບຟັງການອະທິບາຍ, ຊີ້ແຈງຈາກການນໍາຂອງແຂວງ ແລະ ພະແນກການກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາ ສສຊ-ສສຂ ຕື່ມອີກ. ກອງປະຊຸມຄັ້ງນີ້ດໍາເນີນເປັນເວລາ 3 ວັນ ຈຶ່ງຈະສຳເລັດ. ທ່ານສາມາດຕິດຕາມ, ສົ່ງຄໍາຄິດເຫັນ ແລະ ຄໍາສະເໜີມາຍັງກອງປະຊຸມ ໄດ້ໂດຍຜ່ານໂທລະສັບສາຍດ່ວນໝາຍເລກ 026 156 ໄດ້ໃນໄລຍະກອງປະຊຸມ.
ບ.ກ: ຄຳສາວເລືອງຄຳທິບ; ຂ່າວ: ພຸດທະສອນເວດສະວົງ
