ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງບໍລິຄໍາໄຊ ຊຸດທີ II ອັດລົງດ້ວຍຜົນສໍາເລັດພາຍຫລັງດຳເນີນມາເປັນໄລຍະເວລາ 3 ວັນເຕັມ.
ຕະຫຼອດໄລຍະດໍາເນີນກອງປະຊຸມຜູ້ແທນກອງປະຊຸມ ໄດ້ຍົກສູງຄວາມຮັບຜິດຊອບ ໃນການຄົ້ນຄວ້າ, ປະກອບຄໍາຄິດຄໍາເຫັນຢ່າງມີເຫດມີຜົນ, ມີຈຸດສຸມ ແລະ ເລິກເຊິ່ງຕໍ່ບັນດາເນື້ອໃນທີ່ນໍາມາຄົ້ນຄວ້າ, ພິຈາລະນາໃນກອງປະຊຸມຄັ້ງນີ້ ເຫັນວ່າມີຄວາມຖືກຕ້ອງ, ສອດຄ່ອງຕາມແນວທາງນະໂຍບາຍຂອງພັກ, ກົດໝາຍຂອງລັດ. ພ້ອມນີ້ ກອງປະຊຸມ ຍັງໄດ້ເປັນເອກະພາບສູງ ແລະ ຮັບຮອງເອົາບັນຫາສໍາຄັນຕ່າງໆຂອງແຂວງດັ່ງລຸ່ມນີ້:
1. ຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2024.
2. ຮັບຮອງເອົາບົດລາຍງານຂອງພະແນກພະລັງງານ ແລະ ບໍ່ແຮ່ແຂວງ ກ່ຽວກັບການຈັດຕັ້ງປະຕິບັດບັນດາໂຄງການລົງທຶນແຮ່ທາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.
3. ຮັບຮອງເອົາບົດລາຍງານການຈັດຕັ້ງປະຕິບັດວຽກງານແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ທິດທາງແຜນການ ຮອດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ.
4. ຮັບຮອງເອົາບົດລາຍງານການປະເມີນຜົນການຈັດຕັ້ງປະຕິບັດ ຂໍ້ຕົກລົງຂອງທ່ານເຈົ້າແຂວງ ຈຳນວນ 2 ສະບັບຄື: ຂໍ້ຕົກລົງ ສະບັບເລກທີ 237/ຂບຊ, ລົງວັນທີ 28 ມີນາ 2018 ວ່າດ້ວຍການຄຸ້ມຄອງ ແລະ ພັດທະນາດິນກະສິກໍາ ໃນຂົງເຂດຊົນລະປະທານ ແລະ ຂໍ້ຕົກລົງ ສະບັບເລກທີ 150/ຂບຊ, ລົງວັນທີ 17 ມີນາ 2022 ວ່າດ້ວຍການມີສ່ວນຮ່ວມຂອງສັງຄົມໃນວຽກງານສຶກສາ.
5. ຮັບຮອງເອົາຂໍ້ຕົກລົງຂອງທ່ານເຈົ້າແຂວງ ຈຳນວນ 3 ສະບັບຄື: ຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງໂຄງການເຂດປ່າປ້ອງກັນແຫຼ່ງນໍ້າເຂດອ່າງຮັບນໍ້າຍ້ວງຕອນໃຕ້, ຂໍ້ຕົກລົງຂອງເຈົ້າແຂວງ ວ່າດວ້ຍກອງທຶນໄພພິບັດຂັ້ນແຂວງ ແລະ ຂໍ້ຕົກລົງວ່າດ້ວຍເຂດສະຫງວນດິນແຄມນໍ້າທົ່ວແຂວງ.
ຜ່ານການຖ່າຍທອດສົດ ແລະ ເປິດສາຍດ່ວນ ໃນໄລຍະດຳເນີນກອງປະຊຸມ, ໄດ້ມີຄຳສະເໜີຂອງປະຊາຊົນ ຜ່ານສາຍດ່ວນ 17 ສາຍ ລວມມີ 19 ເລື່ອງ.
ຂ່າວ-ພາບ: ຄຳຟອງ
