ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງຫຼວງພະບາງ ຊຸດທີ II ຈະຈັດຂຶ້ນລະຫວ່າງ 25-26 ກໍລະກົດ

ຕອນບ່າຍວັນທີ່ 19 ກໍລະກົດ 2024 ນີ້ ທ່ານ ສີວອນ ວົງຄຳຈັນ ກຳມະການພັກແຂວງ, ຄະນະປະຈຳ, ເລຂາທິການ ສະພາປະຊາຊົນແຂວງຫຼວງພະບາງ ໄດ້ຖະແຫຼງຂ່າວຕໍ່ສື່ມວນຊົນ ວ່າ: ກອງປະຊຸມສະໄໝສາມັນ ເທື່ອທີ 7 ຂອງ ສະພາປະຊາຊົນຂັ້ນແຂວງ ຊຸດທີ II ຈະໄດ້ຈັດຂຶ້ນໃນວັນທີ 25 ຫາ 26 ກໍລະກົດ 2024 ນີ້ ຢູ່ຫ້ອງປະຊຸມໃຫຍ່ ຫ້ອງວ່າການແຂວງ.

ກອງປະຊຸມ ຈະຮັບຟັງການລາຍງານ, ການພິຈາລະນາ ແລະຮັບຮອງເອົາ ບັນຫາສຳຄັນພື້ນຖານຂອງແຂວງ ຈຳນວນໜື່ງ ໃນນັ້ນ ວຽກງານອົງການປົກຄອງແຂວງ ຈະໄດ້ຮັບຟັງລາຍງານ ໂດຍຫຍໍ້ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະ ກິດ-ສັງຄົມ ແລະ ແຜນງົບປະມານຂອງແຂວງ 6 ເດືອນຕົ້ນປີ ແລະ ແຜນການ 6 ເດືຶອນທ້າຍປີ 2024; ຮັບຟັງລາຍງານ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024; ຮັບຟັງການລາຍງານ ການຈັດຕັ້ງປະຕິບັດ ແຜນງົບປະມານ ຂອງແຂວງ 6 ເດືອນຕົ້ນປີ ແລະແຜນການ 6 ເດືອນທ້າຍປີ 2024; ຮັບຟັງລາຍງານ ການຈັດຕັ້ງປະຕິບັດວຽກງານ ການຄຸ້ມຄອງການຂຸດ ຄົ້ນແຮ່ທາດ ຢູ່ແຂວງຫຼວງພະບາງ 6 ເດືອນຕົ້ນປີ ແລະແຜນ ການ 6 ເດືອນທ້າຍປີ 2024; ຮັບຟັງລາຍງານ ການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກ ຍາກ ຂອງແຂວງ 6 ເດືອນຕົ້ນປີ ແລະແຜນການ 6 ເດືອນທ້າຍປີ 2024; ວຽກງານອົງການຕຸລາການ ຈະໄດ້ຮັບຟັງລາຍງານ ກ່ຽວ ກັບ ການຕິດຕາມກວດກາ ການດໍາເນີນຄະດີ ຂອງເຈົ້າໜ້າທີ່ສຶບສວນ-ສອບສວນ, ສານປະຊາຊົນ, ອົງການໄອຍະການປະຊາຊົນ ແລະອົງການຈັດຕັ້ງປະຕິບັດຄໍາຕັດສິນຂອງສານ 6 ດືອນຕົ້ນປີ ແລະແຜນການ 6 ເດືອນທ້າຍປີ 2024, ວຽກງານສະພາປະຊາ ຊົນແຂວງ ຈະໄດ້ຮັບຟັງລາຍງານ ການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະແຜນການ 6 ເດືອນທ້າຍປີ 2024 ຂອງ ສະພາປະຊາຊົນແຂວງຫຼວງພະບາງ; ຮັບຟັງການປະກອບຄໍາຄິດຄໍາເຫັນຈາກ ຄະນະປະຈໍາສະພາປະຊາຊົນແຂວງ ຕໍ່ວຽກງານຕ່າງໆ ຂອງອົງການປົກຄອງແຂວງ ແລະ ອົງການຕຸລາການທີ່ໄດ້ລາຍງານ ຢູ່ໃນກອງປະຊຸມຄັ້ງນີ້.

ທ່ານກ່າວຕື່ມວ່າ: ໃນໄລຍະກະກຽມ ແລະ ດຳເນີນກອງປະຊຸມ, ຄະນະປະຈຳສະພາປະຊາຊົນແຂວງ ໄດ້ແຕ່ງຕັ້ງໃຫ້ມີໜ່ວຍງານສະເພາະ ເພື່ອຮັບຜິດ ຊອບວຽກງານ ໂທລະສັບສາຍດ່ວນ ເບີໂທ 071 156 ເພື່ອຮັບເອົາຄຳສະເໜີ ແລະ ການສະແດງຄວາມ ຄິດເຫັນ ໂດຍກົງຈາກປະຊາຊົນ ທີ່ຈະນຳສົ່ງໄປຍັງຫ້ອງປະຊຸມ ແລ້ວລາຍງານຕໍ່ບັນດາທ່ານຜູ້ແທນກອງປະຊຸມ ຈາກນັ້ນ ຈະໄດ້ສົມທົບກັບພາກສ່ວນທີ່ກ່ຽວຂ້ອງ ຂອງອົງການປົກຄອງແຂວງ ໃນການຄົ້ນຄວ້າ ແລະ ຫາວິທີທາງແກ້ໄຂໃຫ້ຖືກຕ້ອງຕາມລະ ບຽບ ແລະກົດໝາຍ.