ວັນທີ 30 ກໍລະກົດ 2024 ນີ້, ກອງປະຊຸມສະໄໝສາມັນ ເທື່ອທີ 7 ສະພາປະຊາຊົນ ແຂວງຫົວພັນ ຊຸດທີ II ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານ ຂອງທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນແຂວງຫົວພັນ, ມີທ່ານ ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ທ່ານ ຄຳແພງ ວິລະພັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການກົດໝາຍສະພາແຫ່ງຊາດ, ມີບັນດາທ່ານການນຳພັກ-ລັດ, ອາດີດການນຳພັກ-ລັດ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມ.
ກອງປະຊຸມສະໄໝສາມັນ ເທື່ອທີ 7 ສະພາປະຊາຊົນ ແຂວງຫົວພັນ ຊຸດທີ II ຈະໄດ້ພິຈາລະນາ ແລະ ຕົກລົງ 8 ບັນຫາສໍາຄັນພື້ນຖານ ຂອງແຂວງ ຄື: ບົດລາຍງານ ເຈົ້າແຂວງ ກ່ຽວກັບການເຄື່ອນໄຫວວຽກງານທີ່ພົ້ນເດັ່ນ ປະຈໍາ 6 ເດືອນ ຕົ້ນປີ ແລະ ທິດທາງຈຸດສຸມ ປະຈຳ 6 ເດືອນ ທ້າຍປີ 2024 ຂອງແຂວງຫົວພັນ; ບົດລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳ 6 ເດືອນ ຕົ້ນປີ ແລະ ທິດທາງແຜນການປະຈຳ 6 ເດືອນ ທ້າຍປີ 2024 ຂອງອົງການປົກຄອງແຂວງ; ບົດລາຍງານການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2024 ຂອງອົງການປົກຄອງແຂວງ; ບົດລາຍງານການຈັດຕັ້ງປະຕິບັດມະຕິກອງປະຊຸມສະພາປະຊາຊົນ ແຂວງຫົວພັນ ສະບັບເລກທີ 396/ສພຂ, ລົງວັນທີ 3 ສິງຫາ 2023 ກ່ຽວກັບການຈັດຕັ້ງປະຕິບັດການຄຸ້ມຄອງວຽກງານ ຊອກຄົ້ນ-ສໍາຫຼວດ, ການຂຸດຄົ້ນ-ປຸງແຕ່ງ ແລະ ການສົ່ງອອກແຮ່ທາດ ຂອງແຂວງຫົວພັນ; ບົດລາຍງານການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຫົວພັນ; ພິຈາລະນາ ແລະ ຮັບຮອງເອົາການປັບປຸງ ນິຕິກຳໃຕ້ກົດໝາຍ ຂອງແຂວງຫົວພັນ; ພິຈາລະນາ ແລະ ຮັບຮອງເອົາການເລືອກຕັ້ງບຸກຄະລາກອນ ຂອງສະພາປະຊາຊົນແຂວງຫົວພັນ ແລະ ພິຈາລະນາຮັບຮອງເອົາບົດລາຍງານ ການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຂອງສະພາປະຊາຊົນ ແຂວງຫົວພັນ. ນອກຈາກນັ້ນ, ກອງປະຊຸມຍັງຈະໄດ້ຮັບຟັງການຊີ້ແຈງ, ອະທິບາຍຂອງອົງການປົກຄອງແຂວງ ແລະ ພາກສ່ວນກ່ຽວຂ້ອງຈໍານວນໜຶ່ງຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ.
ໂອກາດມີຄຳເຫັນເປີດພິທີຢ່າງເປັນທາງການ, ທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນ ແຂວງຫົວພັນ ໄດ້ຮຽກຮ້ອງ ມາຍັງທຸກພາກສ່ວນທີ່ກ່ຽວຂ້ອງ ຈົ່ງສືບຕໍ່ໃຫ້ການຮ່ວມມື ແລະ ສະໜອງຂໍ້ມູນຕໍ່ບັນດາເນື້ອໃນ ທີ່ຈະນໍາເຂົ້າພິຈາລະນາ ແລະ ຮັບຮອງໃນກອງປະຊຸມ, ຮຽກຮ້ອງໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ນໍາໃຊ້ສິດປະຊາທິປະໄຕ ເສີມຂະຫຍາຍຫົວຄິດປະດິດສ້າງ ແລະ ເຊີດຊູ ຄວາມຮັບຜິດຊອບທາງດ້ານການເມືອງຂອງຕົນ ໃນການສຸມສະຕິປັນຍາເຂົ້າໃນການຄົ້ນຄວ້າຢ່າງເລິກເຊິ່ງ, ປະກອບສ່ວນໃນການປະກອບຄໍາຄິດ, ຄໍາເຫັນ ຕໍ່ທຸກບັນຫາຢ່າງຖີ່ຖ້ວນ, ສ້າງສັນ, ພາວະວິໄສ, ມີເຫດມີຜົນ, ຮັດກຸມ, ແທດເໝາະກັບຕົວຈິງ, ບົນພື້ນຖານແນວທາງຂອງພັກ, ລັດຖະທຳມະນູນ, ກົດໝາຍ ແລະ ສະພາບຄວາມເປັນຈິງທາງດ້ານເສດຖະກິດ-ສັງຄົມ ຂອງແຂວງຫົວພັນໃນປັດຈຸບັນ ພ້ອມກັນຊອກຫາວິທີທາງມາດຕະການ ແກ້ໄຂບັນດາບັນຫາທີ່ຍັງໜ້າເປັນຫ່ວງ, ຮີບດ່ວນ ແລະ ເຄັ່ງຮ້ອນ ຂອງສັງຄົມກໍຄືປະຊາຊົນບັນດາເຜົ່າຂອງພວກເຮົາໃນປັດຈຸບັນ ເພື່ອສ້າງຄວາມເປັນເອກະພາບກັບເນື້ອໃນທີ່ນຳມາພິຈາລະນາ, ຮັບຮອງໃນກອງປະຊຸມຄັ້ງນີ້ ໃຫ້ມີຄຸນນະພາບ ແລະ ສາມາດນຳໄປຈັດຕັ້ງປະຕິບັດຢ່າງເປັນຮູບປະທຳຢ່າງແທ້ຈິງ.
ກອງປະຊຸມສະໄໝສາມັນ ເທື່ອທີ 7 ສະພາປະຊາຊົນ ແຂວງຫົວພັນ ຊຸດທີ II ຈະດຳເນີນເປັນເວລາ 2 ວັນເຄີ່ງຈິ່ງຈະອັດລົງ. ເຊີ່ງທ່ານສາມາດສົ່ງຄຳຄິດເຫັນຜ່ານສາຍດ່ວນ 064 156 ໄດ້ຕະຫຼອດໄລຍະກອງປະຊຸມ.
ພາບ-ຂ່າວ: ວັນແສງ ສີວອນ
