ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກອງປະຊຸມສຳມະນາ 60 ປີ ແຫ່ງການພົວພັນການທູດ ລະຫວ່າງ ລາວ-ອິນໂດເນເຊຍ

ໃນຕອນເຊົ້າຂອງວັນທີ 6 ຕຸລາ 2017, ກະຊວງການຕ່າງປະເທດ ຮ່ວມກັບ ສະຖານທູດອິນໂດເນເຊຍ ປະຈຳ ສປປ ລາວ ໄດ້ຈັດກອງປະຊຸມສຳມະນາ 60 ປີ ແຫ່ງການພົວພັນການທູດ ລະຫວ່າງ ສປປ ລາວ-ສ. ອິນໂດເນເຊຍ ພາຍໃຕ້ຫົວຂໍ້: “ຄວາມກ້າວໜ້າ ແລະ ສິ່ງທ້າທາຍໃນການພົວພັນສອງຝ່າຍ ລະຫວ່າງ ສປປ ລາວ ແລະ ສ. ອິນໂດເນເຊຍ: ປັດຈຸບັນ ແລະ ອະນາຄົດ”, ທີ່ ໂຮງແຮມແລນມາກ, ເຊິ່ງໃຫ້ກຽດບັນຍາຍໂດຍ ທ່ານ ເດສຣາ ເປີກາຢາ (Desra Percaya), ຮອງລັດຖະມົນຕີ ຜູ້ຮັບຜິດຊອບວຽກງານການຕ່າງປະເທດໃນຂົງເຂດອາຊີປາຊີຟິກ ແລະ ອາຟຣິກາ,ກະຊວງການຕ່າງປະເທດ  ອິນໂດເນເຊຍ ແລະ ທ່ານ ບຸນເຫຼືອ ພັນດານຸວົງ, ຫົວໜ້າຫ້ອງການກະຊວງການຕ່າງປະເທດລາວ, ມີບັນດາຜູ້ຕາງໜ້າຈາກສະຖານທູດ ອິນໂດເນເຊຍ ແລະ ບັນດາທູດຕ່າງປະເທດ ປະຈຳລາວ, ຕາງໜ້າສະມາຄົມມິດຕະພາບ ລາວ-ອິນໂດເນເຊຍ, ຫົວໜ້າກົມ, ຮອງກົມ, ຂັ້ນພະແນກ ແລະ ພະນັກງານວິຊາການກະຊວງການຕ່າງປະເທດ, ກະຊວງອ້ອມຂ້າງສູນກາງ ແລະ ນັກສຶກສາຈາກມະຫາວິທະຍາໄລແຫ່ງຊາດ ເຂົ້າຮ່ວມ 300 ຄົນ.

ການສຳມະນາໃນຄັ້ງນີ້ ໄດ້ທົບທວນຄືນເຖິງ ຜົນສຳເລັດຂອງການພົວພັນຮ່ວມມື ລະຫວ່າງ ສປປ ລາວ ແລະ ສ. ອິນໂດເນເຊຍ ຕະຫຼອດໄລຍະ 60 ປີ, ນັບຕັ້ງແຕ່ສ້າງຕັ້ງສາຍພົວພັນການທູດນຳກັນ ໃນວັນທີ 30 ສິງຫາ 1957 – 30 ສິງຫາ 2017 ທີ່ໄດ້ຮັບການຊຸກຍູ້ສົ່ງເສີມ ແລະ ເປີດກວ້າງການຮ່ວມມືເປັນກ້າວໆມາ, ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນຂັ້ນສູງຂອງສອງປະເທດ ຢ່າງເປັນປົກກະຕິ ເພື່ອເສີມຂະຫຍາຍການພົວພັນຮ່ວມມືສອງຝ່າຍອັນເປັນມູນເຊື້ອ ແລະ ຄວາມເຂົ້າອົກເຂົ້າໃຈກັນເຊິ່ງກັນ ແລະ ກັນ. ການຮ່ວມມືສອງຝ່າຍ ກໍ່ມີບາດກ້າວຂະຫຍາຍຕົວຂຶ້ນເລື້ອຍໆ, ເຊິ່ງເຫັນໄດ້ຈາກການສ້າງຕັ້ງຄະນະກຳມະການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ອິນໂດເນເຊຍ ໃນປີ 2004, ເພື່ອຊຸກຍູ້ ແລະ ສົ່ງເສີມການຮ່ວມມືໃນດ້ານຕ່າງໆໃຫ້ຂະຫຍາຍຕົວ ແລະ ມີປະສິດທິຜົນດີຂຶ້ນກວ່າເກົ່າ ເປັນຕົ້ນແມ່ນ ການຮັດແໜ້ນການຮ່ວມມືທາງດ້ານການຄ້າ-ການລົງທຶນ, ການທະນາຄານ, ວຽກງານປ້ອງກັນປະເທດ, ການສຶກສາ, ໂທລະຄົມມະນາຄົມ ແລະ ການສື່ສານ, ດ້ານໂຍທາທິການ ແລະ ຂົນສົ່ງ, ແລະ ຕະຫຼອດໄລຍະຜ່ານມາ, ສອງຝ່າຍໄດ້ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ. ພ້ອມກັນນີ້, ທັງສອງຝ່າຍໄດ້ຍົກໃຫ້ເຫັນເຖິງບາງສິ່ງທ້າທາຍ ທີ່ສອງປະເທດ ຕ້ອງໄດ້ພ້ອມກັນປັບປຸງແກ້ໄຂໃຫ້ດີຂຶ້ນກວ່າເກົ່າ ເປັນຕົ້ນແມ່ນ ຂົງເຂດການຮ່ວມມືທາງດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ.

ຜູ້ເຂົ້າຮ່ວມການສຳມະນາໃນຄັ້ງນີ້, ຍັງໄດ້ເຂົ້າຊົມງານວາງສະແດງຮູບພາບ ກ່ຽວກັບ ການພົວພັນຮ່ວມມືສອງຝ່າຍ ລາວ-ອິນໂດເນເຊຍ ຕະຫຼອດໄລຍະ 60 ປີ ຜ່ານມາ.