ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກອງປະຊຸມສຳມະເຜີຍແຜ່ຜົນສຳເລັດ ຂອງກອງປະຊຸມ ໜຶ່ງແລວ ໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 2 ແລະ ຄວາມຄືບໜ້າການຈັດຕັ້ງປະຕິບັດວຽກງານ ການເຊື່ຶອມໂຍງເສດຖະກິດກັບພາກພື້ນ ແລະ ສາກົນ ຂອງ ສປປ ລາວ

ໃນ​​ວັນ​ທີ 07 ຕຸລາ 2019, ​ກະຊວງການຕ່າງປະເທດ ຮ່ວມກັບ ແຂວງສະຫວັນນະເຂດ ໄດ້​ຈັດກອງ​ປະຊຸມ​ສຳມະນາ​ເຜີຍ​ແຜ່​ຜົນສຳ​ເລັດ​ ຂອງ​ກອງ​ປະຊຸມ ໜຶ່ງ​ແລວ ໜຶ່ງ​ເສັ້ນທາງ ​ເພື່ອ​ການ​ຮ່ວມ​ມືສາກົນ ຄັ້ງທີ 2 ​ແລະ ຄວາມ​ຄືບໜ້າການຈັດຕັ້ງປະຕິບັດ​ວຽກງານ​ການ​ເຊື່ຶອມ​ໂຍງ​ເສດຖະກິດກັບ​ພາກພື້ນ ​ແລະ ສາກົນ ຂອງ ສປປ ລາວ ທີ່ ຫ້ອງວ່າ ການ​ແຂວງ​ສະຫວັນ​ນະ​ເຂດ, ພາຍໃຕ້ການເປັນ​ປະທານ​ຮ່ວມ ຂອງ ທ່ານ ທອງ​ຜ່ານ ສະຫວັນ​ເພັດ, ຮອງລັດຖະມົນຕີກະຊວງ​ການ​ຕ່າງປະ​ເທດ ແລະ ທ່ານ ທອນແກ້ວ ພຸດທະໄກຍະລາດ, ຮອງ​ເຈົ້າແຂວງສະຫວັນ​ນະ​ເຂດ, ໂດຍມີຜູ້ຕາງໜ້າ ຈາກ​ບັນດາຂະ​ແຫນງ​ການ​ ຂອງ​ສູນ​ກາງ ແລະ ຈາກ 04 ​ແຂວງ​ພາກກາງ (​ແຂວງວຽງຈັນ, ​ແຂວງ​ບໍລິ​ຄໍາ​ໄຊ, ​ແຂວງ​ຄຳ​ມ່ວນ, ​ແຂວງ​ສະຫວັນ​ນະ​ເຂດ) ​ແລະ 04 ພາກ​ໃຕ້ (ສາລະ​ວັນ,ຈຳປາ​ສັກ,​ແຂວງ​ເຊ​ກອງ,​ແຂວງ​ອັດ​ຕະປື) ເຂົ້າຮ່ວມ.

ໃນກອງປະຊຸມ​ສຳ​ມະ​ນາຄັ້ງນີ້ ຜູ້ເຂົ້າຮ່ວມ​ໄດ້ຮັບຟັງການເຜີຍແຜ່​​ຜົນສຳເລັດ ຂອງການເຄື່ອນໄຫວວຽກງານເຊື່ອມໂຍງເສດຖະກິດກັບພາກພື້ນ ແລະ ສາກົນ ຂອງ ສປປ ລາວ ໂດຍສະເພາະແມ່ນ ຄວາມ​ຄືບໜ້າການຈັດຕັ້ງປະຕິບັດ​ຂອບການຮ່ວມມື ໜຶ່ງແລວ ໜຶ່ງເສັ້ນທາງ​ ​ແລະ ຜົນສຳ​ເລັດ​ຂອງ​ກອງ​ປະຊຸມໜຶ່ງ​ແລວ ໜຶ່ງ​ເສັ້ນທາງ​ເພື່ອ​ການ​ຮ່ວມ​ມື​ສາກົນ ຄັ້ງທີ 2, ​ປະຈຸ​ບັນ​ ​ຂໍ້​ລິ​ເລີ່​ມດັ່ງກ່າວ​ໄດ້ຮັບ​ການສະໜັບສະໜູນຈາກ 150 ປະເທດ ລວມເຖິງບັນດາອົງການຈັດຕັ້ງສາກົນ. ​​ໃນ​ນີ້ຜົນສຳ​ເລັດ​ອັນ​ພົ້ນ​ເດັ່ນ ​ແມ່ນ​ຜົນສຳ​ເລັດ​ລະຫວ່າງ​ ສປປ ລາວ  ​ແລະ ສປ ຈີນ ​ທີ່ໄດ້ສໍາເລັດ​ການ​ເຈລະຈາ ​ແລະ ໄດ້ລົງນາມ​ເນື້ອ​ໃນ​ເອກະສານ​ທີ່​ສຳຄັນຫລາຍ​ສະບັບ​ເປັນຕົ້ນ ​ແມ່ນແຜນແມ່ບົດການສ້າງຄູ່ຮ່ວມຊາຕາກຳລາວ-ຈີນ, ສັນຍາ ສາມ​ຝ່າຍ 01 ສະບັບ ​ແລະ  ສັນຍາສອງຝ່າຍ ອີກ 10 ສະບັບ ​ເຊຶ່ງເປັນການເສີມຂະຫຍາຍສາຍພົວພັນການຮ່ວມມືລະຫວ່າງສອງປະເທດ ໃຫ້ນັບມືນັບກ້ວາງອອກ ແລະ ເຂົ້າສູ່ລວງເລີກເທື່ອລະກ້າວ ເພື່ອໃຫ້ກາຍເປັນຄູ່ຮ່ວມມືທີ່ໃກ້ຊິດຢ່າງແທ້ຈິງ. ນອກຈາກ​ນີ້, ຍັງ​ມີຄວາມ​ຄືບໜ້າການຈັດຕັ້ງປະຕິບັດ​ຂອບການຮ່ວມມືອື່ນໆ​ເຊັ່ນ: ຂອບການຮ່ວມມື 4 ປະ​ເທດ​ກຳປູ​ເຈຍ-ລາວ-ມຽນມາ-ຫວຽດນາມ (CLMV), ຂອບ​ຍຸດ​ທະ​ສາດ​ການ​ຮ່ວມ​ມື​ດ້ານ​ເສດຖະກິດ​ແມ່​ນໍ້າ​ອີຣາວະ​ດີ-​ແມ່​ນໍ້າ​ເຈົ້າ​ພະຍາ-​ແມ່​ນໍ້າຂອງ (ACMECS), ຂອບ​ການ​ຮ່ວມື​ແມ່​ນໍ້າຂອງ​-​ແມ່​ນໍ້າ​ລ້ານ​ຊ້າງ (MLC) ແລະ ​ເວທີ​ການ​ຮ່ວມ​ມື​ອາຊີ​ຕາ​ເວັນ​ອອກ-ອາ​ເມຣິກາລາຕີນ (FEALAC). ຈຸດປະສົງ ເພື່ອເຮັດ​ໃຫ້​ບັນດາ​ພະນັກງານ​ ຈາກ​ບັນດາ​ຂະ​ແຫນງ​ການ ​ແລະ ອຳນາດ​ການ​ປົກຄອງ​ທ້ອງ​ຖິ່ນ ​ໄດ້​ຮັບ​ຊາບ ກ່ຽວກັບ ການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນ ຂອງ ພັກ ແລະ ລັດຖະບານ ຂອງພວກເຮົາ ​ໃນຂອບການຮ່ວມມືຕ່າງໆ. ຜູ້ເຂົ້າຮ່ວມກອງປະຊຸມສຳມະນາ ຍັງໄດ້​ມີການແລ​ກປ່ຽນຄຳຄິດເຫັນ ດ້ວຍບັນຍາກາດອັນຟົດຟື້ນ ແລະ ແບບກົງໄປກົງມາ ​ຕໍ່ບັນດາສິ່ງທ້າທາຍ, ກາລະ​​ໂອກາດ ​ແລະ ການກະກຽມຄວາມພ້ອມໃນດ້ານຕ່າງໆ ແນໃສ່ການ​ຍາດ​ແຍ່ງ​ຜົນ​ປະ​ໂຫຍ​ດຈາກ​ບັນດາ​ຂອບ​ການ​ຮ່ວມ​ມື​ດັ່ງກ່າວ ​ເພື່ອ​ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ.

ໃນ​ໂອ​ກາ​ດກອງປະຊຸມດັ່ງກ່າວ, ທ່ານ ທອງ​ຜ່ານ ​ສະຫວັນ​ເພັດ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ​ຍັງໄດ້​​ເໜັ້ນໜັກ​ເຖິງຄວາມ​ສຳຄັນ ຂອງການຈັດຕັ້ງປະຕິບັດແນວທາງນະໂຍບາຍການຕ່າງປະເທດ ຂອງ ສປປ ລາວ ​ເວົ້າລວມ, ເວົ້າສະເພາະ ການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນ​ ​ພ້ອມ​ທັງຮຽກຮ້ອງ​ໃຫ້​ບັນດາ​ຂະ​ແໜງການ​ເປັນ​ເຈົ້າ​ການ ​ເອົາ​ໃຈ​ໃສ່ ແລະ ເພີ່ມທະວີການປັບປຸງກົນໄກການຈັດຕັ້ງປະຕິບັດ ໃຫ້ມີປະສິດທິຜົນຫຼາຍກວ່າເກົ່າ ເພື່ອໃຫ້ສອດຄ່ອງກັບສະພາບຕົວຈິງ ຂອງແຕ່ລະໄລຍະ.

ຂ່າວຈາກ: ກົມການຂ່າວ, ກະຊວງການຕ່າງປະເທດ.