ຕອນເຊົ້າ ວັນທີ 13 ພະຈິກ 2020, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ໄດ້ເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ສ.ເກົາຫລີ ຄັ້ງທີ 2 ໂດຍການເປັນປະທານຮ່ວມລະຫວ່າງ ພະນະທ່ານ ຫງວຽນ ຊວນ ຟຸກ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມຫວຽດນາມ ແລະ ພະນະທ່ານ ມູນ ແຈ ອິນ, ປະທານາທິບໍດີ ແຫ່ງ ສາທາລະນະລັດ ເກົາຫລີ ໂດຍມີຄະນະຜູ້ແທນຈາກປະເທດສະມາຊິກ ຄື: ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ສ.ເກົາຫລີ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ໄດ້ທົບທວນຄືນໝາກຜົນການຮ່ວມມືແມ່ນໍ້າຂອງ-ສ.ເກົາຫລີ ໃນໄລຍະຜ່ານມາ ໂດຍສະເພາະ ການຈັດຕັ້ງປະຕິບັດຖະແຫລງການແມ່ນໍ້າຂອງ-ແມ່ນໍ້າຮານ ທີ່ຖືກຮັບຮອງໃນກອງປະຊຸມສຸດຍອດແມ່ນໍ້າຂອງ-ສ.ເກົາຫລີ ຄັ້ງປະຖົມມະເລີກ ທີ່ ປູຊານ, ສ.ເກົາຫລີ ໃນທ້າຍປີ 2019 ຜ່ານມາ ແລະ ແຜນປະຕິບັດງານ 3 ປີ (2017-2020) ຂອງຂອບການຮ່ວມມືແມ່ນໍ້າຂອງ-ສ.ເກົາຫລີ, ເຊິ່ງກອງປະຊຸມໄດ້ຕີລາຄາວ່າ ຂອບການຮ່ວມມືດັ່ງກ່າວ ໄດ້ມີທ່າກ້າວຂະຫຍາຍຕົວຢ່າງໄວວາ ພາຍໃຕ້ 3 ເສົາຄໍ້າຂອງການຮ່ວມມື ແລະ 7 ຂົງເຂດບຸລິມະສິດ ຄື: ວັດທະນະທໍາ ແລະ ການທ່ອງທ່ຽວ; ການພັດທະນາຊັບພະຍາກອນມະນຸດ; ກະສິກໍາ ແລະ ພັດທະນາຊົນນະບົດ; ພັດທະນາພື້ນຖານໂຄງລ່າງ; ຂໍ້ມູນຂ່າວສານ ແລະ ເຕັກໂນໂລຊີ; ສິ່ງແວດລ້ອມ; ແລະ ສິ່ງທ້າທາຍແບບໃໝ່ ລວມທັງການຈັດຕັ້ງປະຕິບັດໂຄງການຊ່ວຍເຫຼືອຈາກກອງທຶນຮ່ວມມືແມ່ນໍ້າຂອງ-ສ.ເກົາຫລີ ເຊິ່ງຜ່ານມາ ສປປ ລາວ ໄດ້ຮັບຈຳນວນ 4 ໂຄງການ ມູນຄ່າ 1.500.000ໂດລາສະຫະລັດ ຄື: ໂຄງການເພີ່ມຄວາມອາດສາມາດຂອງ ປະຊາຊົນ ແລະ ບັນດາເມືອງທຸກຍາກຂອງ ສປປ ລາວ; ໂຄງການສ້າງແຜນແມ່ບົດ ແລະ ຄວາມອາດສາມາດ ເພື່ອພັດທະນາພື້ນຖານໂຄງລາງດ້ານອຸຕຸນິຍົມ-ອຸທົກກະສາດ ໃນອ່າງແມ່ນໍ້າຂອງ;ໂ ຄງການຮ່ວມມືດ້ານການແລກປ່ຽນການຄຸ້ມຄອງ-ບໍລິຫານໂຄງການຊ່ວຍເຫຼືອໃນພາກພື້ນແມ່ນໍ້າຂອງ; ໂຄງການບໍລິຫານຄຸນນະພາບດິນ, ນໍ້າ ແລະ ສານອາຫານ ເພື່ອເພີ່ມທະວີລາຍຮັບໃຫ້ຊາວກະສິກອນໃນເຂດແຫ້ງແລ້ງໃນ ສປປ ລາວ. ພ້ອມດຽວກັນນັ້ນ, ກອງປະຊຸມໄດ້ເຫັນດີເປັນເອກະພາບໃນການຍົກລະດັບການຮ່ວມມືຂຶ້ນສູ່ຄູ່ຮ່ວມມືຍຸດທະສາດ ເພື່ອປະຊາຊົນ, ຄວາມຈະເລີນຮຸ່ງເຮືອງ ແລະ ສັນຕິພາບ.
ນອກຈາກນັ້ນ, ກອງປະຊຸມຍັງໄດ້ປຶກສາຫາລືທິດທາງຮ່ວມມືໃນຕໍ່ໜ້າ ກໍຄືການຈັດຕັ້ງຜັນຂະຫຍາຍແຜນປະຕິບັດງານ ໄລຍະ 5 ປີ ສະບັບໃໝ່ (2021-2025) ເປັນຕົ້ນແມ່ນການຮ່ວມມືໃນການຟື້ນຟູເສດຖະກິດ-ສັງຄົມໃນພາກພື້ນແມ່ນໍ້າຂອງ-ສ.ເກົາຫລີ ພາຍຫລັງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19; ການພັດທະນາພື້ນຖານໂຄງລ່າງ ແລະ ຊັບພະຍາກອນມະນຸດໃນຂະແໜງການສາທາລະນະສຸກ; ເພີ່ມທະວີການຮ່ວມມືດ້ານການຄ້າ ແລະ ການລົງທຶນ ແລະ ສຸມໃສ່ການພັດທະນາແບບຍືນຍົງ ບົນພື້ນຖານເປົ້າໝາຍການພັດທະນາແບບຍືນຍົງຂອງສະຫະປະຊາຊາດ.
ຕອນທ້າຍ, ກອງປະຊຸມ ໄດ້ຮັບຮອງເອົາຖະແຫລງການຮ່ວມກອງປະຊຸມສຸດຍອດແມ່ນໍ້າຂອງ-ສ.ເກົາຫລີ ຄັ້ງທີ2ເພື່ອເປັນເອກະສານພື້ນຖານໃນການຈັດຕັ້ງຜັນຂະຫຍາຍການຮ່ວມມືຕາມລະດັບຄາດໝາຍ.
ຫຼັງຈາກສຳເລັດກອງປະຊຸມສຸດຍອດແມ່ນໍ້າຂອງ-ສ.ເກົາຫລີ ໃນຕອນເຊົ້າຂອງມື້ດຽວກັນ, ພະນະທ່ານທອງລຸນສີສຸລິດ, ນາຍົກລັດຖະມົນຕີແຫ່ງ ສ ປປ ລາວ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນຄັ້ງທີ 12 ໂດຍການເປັນປະທານຮ່ວມລະຫວ່າງພະນະທ່ານ ຫງວຽນ ຊວນ ຟຸກ, ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມຫວຽດນາມ ແລະ ພະນະທ່ານ ຊູງະ ໂຢຊິຮິເດະ,ນາຍົກລັດຖະມົນຕີ ແຫ່ງ ຍີ່ປຸ່ນ ໂດຍມີຄະນະຜູ້ແທນຈາກປະເທດສະມາຊິກ ຄື: ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ຍີ່ປຸ່ນ ເຂົ້າຮ່ວມ.

 

ກອງປະຊຸມໄດ້ທົບທວນຄືນໝາກຜົນຂອງການຮ່ວມມື ລະຫວ່າງ ປະເທດແມ່ນ້າຂອງ ແລະ ຍີ່ປຸ່ນ ໃນໄລຍະຜ່ານມາ ກໍຄືການຈັດຕັ້ງຜັນຂະຫຍາຍຖະແຫລງການຮ່ວມຂອງກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 11, ຍຸດທະສາດ ໂຕກຽວ 2018, ເອກະສານຂໍ້ລິເລີ່ມແມ່ນໍ້າຂອງ-ຍີ່ປຸ່ນ ສຳລັບ ການພັດທະນາແບບຍືນຍົງເຖິງປີ 2030 ແລະ ບັນດາແຜນງານ ແລະ ໂຄງການຕ່າງໆ. ໃນໄລຍະຜ່ານມາ, ຂອບການຮ່ວມມືແມ່ນໍ້າຂອງ-ຍີ່ປຸ່ນ ແມ່ນມີຄວາມຄືບໜ້າຫຼາຍດ້ານໂດຍສະເພາະ ການພັດທະນາພື້ນຖານໂຄງລ່າງ, ພັດທະນາຊັບພະຍາກອນມະນຸດ, ການພັດທະນາແບບຍືນຍົງ ແລະ ການຮ່ວມມືກັບບັນດາອົງການຈັດຕັ້ງຕ່າງໆໃນພາກພື້ນ, ເຊິ່ງເຫັນວ່າ ຂອບການຮ່ວມມືດັ່ງກ່າວເປັນເວທີໜຶ່ງທີ່ດີ ສໍາລັບ ບັນດາປະເທດແມ່ນໍ້າຂອງ ແລະ ຍີ່ປຸ່ນ ໃນການຮັດແຫນ້ນການຮ່ວມມື ແລະ ສ້າງຄວາມເຂັ້ມແຂງໃຫ້ພາກພື້ນແມ່ນໍ້າຂອງໃຫ້ກາຍເປັນພາກພື້ນທີ່ເຂັ້ມແຂງທາງດ້ານເສດຖະກິດ ແລະ ສາມາດເຊື່ອມຈອດກັບພາກພື້ນອື່ນໆ ກໍ່ຄື ອາຊຽນໄດ້ເປັນຢ່າງດີ.
ສຳລັບ ສປປ ລາວ ກໍໄດ້ຮັບໂຄງການຊ່ວຍເຫຼືອຫລາຍໂຄງການ ເປັນຕົ້ນ: ໂຄງການສຳຫຼວດເກັບກຳຂໍ້ມູນເພື່ອພັດທະນາການເຊື່ອມຈອດ ວຽງຈັນ – ຮ່າໂນ່ຍ, ໂຄງການກໍ່ສ້າງຂົວຕາມເສັ້ນທາງເລກ 9, ໂຄງການສຶກສາແຜນແມ່ບົດລະບົບໄຟຟ້າຂອງລາວ, ໂຄງການນໍ້າງື່ມ 1, ແລະ ໂຄງການຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ.
ໃນໂອກາດນີ້, ກອງປະຊຸມໄດ້ຮ່ວມກັນວາງທິດທາງການຮ່ວມມືໃນຕໍ່ໜ້າ ໂດຍສະເພາະ ສືບຕໍ່ຈັດຕັ້ງປະຕິບັດແຜນງານ ແລະ ໂຄງການຕ່າງໆ ທີ່ໄດ້ຮັບຮອງເອົາແລ້ວນັ້ນໃຫ້ສໍາເລັດ ພາຍໃຕ້ ແຜນຍຸດທະສາດໂຕກຽວ 2018 ແລະຂໍ້ລິເລີ່ມແມ່ນໍ້າຂອງ-ຍີ່ປຸ່ນ ສໍາລັບເປົ້າໝາຍການພັດທະນາແບບຍືນຍົງເຖິງປີ 2030 ໃຫ້ເປັນຮູບປະທໍາເທື່ອລະກ້າວ. ນອກຈາກນີ້, ຍັງໄດ້ປຶກສາຫາລືກ່ຽວກັບການຂະຫຍາຍການຮ່ວມມືເພື່ອຟື້ນຟູເສດຖະກິດ-ສັງຄົມພາຍຫຼັງການລະບາດຂອງພະຍາດໂຄວິດ-19 ໂດຍສະເພາະທາງດ້ານສາທາລະນະສຸກແບບສຸກເສີນເພື່ອແລກປ່ຽນຂໍ້ມູນຂ່າວສານໃຫ້ທັນກັບເວລາ, ປະສົບການ ແລະການທົດລອງທີ່ດີເຂົ້າໃນການຫຼີກເວັ້ນ, ຈໍາກັດ, ປິ່ນປົວພະຍາດຕິດຕໍ່ທີ່ເປັນໄພຄຸກຄາມໃຫ້ແກ່ປະເທດຊາດກໍ່ຄືປະຊາຊົນ. ພ້ອມທັງໄດ້ປຶກສາຫາລືໃນການປັບປຸງຂະແໜງການວິສາຫະກິດຂະຫນາດນ້ອຍ, ກາງ ແລະໃຫຍ່ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ແລະສ້າງເງື່ອນໄຂທີ່ເອື້ອອຳນວຍໃຫ້ສາມາດເຂົ້າເຖິງແຫຼ່ງທຶນແລະເຕັກໂນໂລຊີທີ່ທັນສະໄຫມໄດ້.
ກອງປະຊຸມໄດ້ຮັບຮອງເອົາຖະແຫລງການຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 12 ເພື່ອເປັນເອກະສານອ້າງອີງພື້ນຖານໃນການຈັດຕັ້ງປະຕິບັດແຜນງານຕ່າງໆ ໃນຕໍ່ໜ້າ.
ໂດຍ: ກົມເສດຖະກິດ, ກະຊວງການຕ່າງປະເທດ

Loading...