ກົມໂຄສະນາ ສູນກາງແນວລາວສ້າງຊາດ ແລະ ບໍລິສັດ ກາຣູດາ ມີເດຍຈໍາກັດ ໄດ້ຈັດກອງປະຊຸມສໍາມະນາການຮ່ວມມື ແລະ ເປີດໂຕວາລະສານ ລາວສ້າງຊາດ ຂຶ້ນໃນຕອນແລງວັນທີ 22 ກໍລະກົດ 2024 ທິ່ໂຮງແຮມແລນມາກ ນະຄອນຫຼວງວຽງຈັນ, ຝ່າຍ ສປປ ລາວ ໂດຍການເປັນກຽດເຂົ້າຮ່ວມຂອງທ່ານ ນາງ ອິນລາວັນ ແກ້ວບຸນພັນ, ຮອງປະທານສຸນກາງແນວລາວສ້າງຊາດ; ມີຄະນະທີ່ປຶກສາວຽກງານຂົນຂວາຍປະຊາຊົນ ພ້ອມດ້ວຍພະນັກງານ ວິຊາການ ອ້ອມຂ້າງ ສູນກາງແນວລາວສ້າງຊາດ,
ຝ່າຍ ສປ ຈີນ ມີທ່ານ ຊຸຍ ດິງ ຄັງ ປະທານບໍລິສັດ ກາຣູດາມີເດຍ ຈໍາກັດ, ພ້ອມດ້ວຍຜູ້ຕາງໜ້າຈາກສະພາການຄ້າຈີນ ປະຈໍາລາວ, ສະພາການຄ້າ ຢຸນນານ ; ສະພາການຄ້າ ກວາງຊີ ປະຈໍາລາວ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ອິນລາວວັນ ແກ້ວບຸນພັນ ຮອງປະທານສຸນກາງແນວລາວສ້າງຊາດ ປະທານກອງປະຊຸມກ່າວວ່າ: ລາວ-ຈີນ, ຈີນ-ລາວ ແມ່ນຄູ່ຮ່ວມຊາຕາກໍາ, ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ: ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ພ້ອມນີ້, ທັງສອງປະເທດ ກໍໄດ້ຮ່ວມກັນຈັດຕັ້ງປະຕິບັດ ໃນຫຼາຍໆຂົງເຂດວຽກງານ ເວົ້າລວມ, ເວົ້າສະເພາະ ແນວລາວສ້າງຊາດ ຂອງພວກເຮົາ ກໍໄດ້ຮ່ວມມືກັບ ສະພາທີ່ປຶກສາການເມືອງ, ຄະນະກໍາມະການຊົນເຜົ່າ ແລະ ຄະນະກໍາມະການສາສະໜາ ເພື່ອຮ່ວມກັນບໍາລຸງສ້າງ ແລະ ແລກປ່ຽນວິຊາການ ໃນຂົງເຂດວຽກງານດັ່ງກ່າວ ຕະຫຼອດມາ. ເພື່ອເສີມຂະຫຍາຍການຮ່ວມມືລາວ-ຈີນ, ຈີນ-ລາວ ໃນຂົງເຂດແນວລາວສ້າງຊາດ ໃຫ້ນັບມືນັບເພີ່ມຂື້ນ;ໃນຕົ້ນເດືອນຜ່ານມານີ້, ສູນກາງແນວລາວສ້າງຊາດ ໄດ້ມອບໝາຍໃຫ້ກົມໂຄສະນາ ເຊັນບົດບັນທຶກຮ່ວມມືກັນ ກັບບໍລິສັດ ກາຣູດາມີເດຍ ຈໍາກັດ ເພື່ອພ້ອມກັນພັດທະນາວາລະສານ ລາວສ້າງຊາດ.
ທ່ານຮອງປະທານສູນກາງແນວລາວສ້າງຊາດ ກ່າວເນັ້ນວ່າ: ວາລະສານ ແມ່ນພາຫະນະສື່ມວນຊົນປະເພດໜຶ່ງ ທີ່ມີຄວາມ ສໍາຄັນ ໃນການໂຄສະນາ, ການປຸກລະດົມຂົນຂວາຍ ແລະ ໃຫ້ສາລະສໍາຄັນ ທາງດ້ານການເມືອງແນວຄິດ, ສ່ອງແສງດ້ານວັດທະນະນທໍາ, ວິຖີຊີວິດ. ຍິ່ງໄປກວ່ານັ້ນ, ກໍໄດ້ນໍາເອົາແນວທາງນະໂຍບາຍຂອງພັກ-ລັດ, ຜົນງານການເຄື່ອນໄຫວທີ່ພົ້ນເດັ່ນ, ບົດຮຽນ, ຕົວແບບ, ລັດ ແລະ ກົດໝາຍ ແລະ ສາລະໜ້າຮູ້ອື່ນໆ ໃຫ້ຜູ້ອ່ານໄດ້ສຶກສາ, ຮຽນຮູ້ ແລະ ນໍາໄປຈັດຕັ້ງປະຕິບັດເຂົ້າໃນຊີວິດສັງຄົມ ຢ່າງກວ້າງຂວາງ. ເຫັນໄດ້ເຖິງຄວາມສໍາຄັນ ຂອງວາລະສານ ທີ່ເອື້ອອໍານວຍປະໂຫຍດໃຫ້ແກ່ມະຫາຊົນຢ່າງກວ້າງຂວາງ;
ມື້ນີ້, ຄະນະຮັບຜິດຊອບ ປັບປຸງວາລະສານ ລາວສ້າງຊາດ ຈິ່ງໄດ້ເຊື້ອເຊີນບັນດາທ່ານ ເພື່ອມາຮ່ວມກັນ ມີຄໍາຄິດຄໍາເຫັນ, ໃຫ້ຄໍາປຶກສາ ແລະ ເປັນສັກຂີພະຍານ ໃນການ ປັບປຸງວາລະສານ ລາວສ້າງຊາດ ຂອງພວກເຮົາໃນຄ້ງນີ້ຢ່າງພ້ອມພຽງ.
ກອງປະຊຸມຄັ້ງນີ້,ເພື່ອເປັນການເປີດໂຕ ວາລະສານ ລາວສ້າງຊາດ ສະບັບພິເສດ ກໍຄືສະບັບທີ່ທັງສອງພາກສ່ວນ ໄດ້ຮ່ວມກັນສ້າງຂຶ້ນ ເຊິ່ງເປັນສະບັບທໍາອິດ, ເປັນນິມິດໝາຍ ແລະເປັນໝາກຜົນແຫ່ງການຮ່ວມມື ຂອງທັງສອງຝ່າຍ ແລະ ຈະໄດ້ສືບຕໍ່ຮ່ວມກັນພັດທະນາ ວາລະສານ ລາວສ້າງຊາດ ໃຫ້ດີຂຶ້ນເປັນກ້າວໆ; ເປັນການໂຄສະນາເຜີຍແຜ່ໃຫ້ບັນດາທ່ານ ຮັບຮູ້ເຖິງເນື້ອໃນການຮ່ວມມື ລະຫວ່າງສູນກາງແນວລາວສ້າງຊາດ ແລະ ບໍລິສັດກາຣູດາມີເດຍ ຈໍາກັດ ກ່ຽວກັບການສ້າງ ແລະປັບປຸງວາລະສານ ລາວສ້າງຊາດ ໃຫ້ມີເນື້ອໃນ ອຸດົມສົມບູນ ແລະເຜີຍແຜ່ໄດ້ຢ່າງກວ້າງຂວາງສູ່ລະດັບສາກົນ; ເພື່ອສົ່ງເສີມການຈັດຕັ້ງຜັນຂະຫຍາຍ ສາຍພົວພັນຮ່ວມມື ລາວ-ຈີນ, ຈີນ-ລາວ ຕາມແຜນການຮ່ວມມື ໜຶ່ງແລວ ໜຶ່ງເສັ້ນທາງ ແລະ ການປະຕິບັດ ຄູ່ຮ່ວມຊາຕາກໍາລາວ-ຈີນ ເຊິ່ງສະບັບທໍາອິດຈະພິມເຜີຍແຜ່ ໃນເດືອນ ສິງຫາ 2024 ເພື່ອຕ້ອນຮັບກອງປະຊຸມສຸດຍອດອາຊຽນຄັ້ງທີ 44 ທີ່ ສປປ ລາວ ເປັນເຈົ້າພາບໃນທ້າຍປີ 2024ນີ້, ວາລະສານດັ່ງກ່າວ ຈະແຈກຢາຍເປັນຂອງຂ້ວນໃຫ້ແກ່ຜູ້ແທນ 10 ປະເທດອາຊຽນ+3 ທີເດີນທາງມາຮ່ວມກອງປະຊຸມດັ່ງກ່າວໂດຍຈະແປເປັນ 3 ພາສາຄື: ພາສາລາວ, ຈີນ ແລະພາສາອັງກິດ.
