ໃນວັນທີ 17 ມິຖຸນາ 2024, ກະຊວງການຕ່າງປະເທດ ໄດ້ຈັດກອງປະຊຸມສໍາມະນາວຽກງານ ຕ້ານການຄ້າມະນຸດ ສໍາລັບພະນັກງານກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບາງກະຊວງທີ່ກ່ຽວຂ້ອງທີ່ຖືກເເຕ່ງຕັ້ງ ຫຼື ມີເປົ້າໝາຍຈະຖືກເເຕ່ງຕັ້ງໄປປະຈໍາການຢູ່ສໍານັກງານ ເເຫ່ງ ສປປ ລາວ ປະຈໍາຢູ່ຕ່າງປະເທດ ໂດຍມີ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດເຂົ້າຮ່ວມກ່າວເປີດກອງປະຊຸມ ແລະ ມີນັກວິທະຍາກອນທີ່ມາຈາກ ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງແຮງງານ ແລະ ສະຫວັດດີການສັງຄົມ, ສູນກາງສະຫະພັນແມ່ຍິງລາວ ແລະ ອົງການໄອຍະການປະຊາຊົນສູງສຸດ ເຂົ້າຮ່ວມບັນຍາຍ ໃນຫຼາຍຫົວຂໍ້ທີ່ກ່ຽວຂ້ອງກັບວຽກງານຕ້ານການຄ້າມະນຸດ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງ ໃຫ້ແກ່ພະນັກງານ-ລັດຖະກອນ ຂອງກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ບາງກະຊວງທີ່ກ່ຽວຂ້ອງ ທີ່ຖືກເເຕ່ງຕັ້ງ ຫຼື ມີເປົ້າໝາຍຈະຖືກເເຕ່ງຕັ້ງໄປປະຈໍາການຢູ່ສໍານັກງານ ຜູ້ຕາງໜ້າຖາວອນ ເເຫ່ງ ສປປ ລາວ ປະຈໍາຢູ່ຕ່າງປະເທດ ກ່ຽວກັບການຈັດຕັ້ງປະຕິບັດສົນທິສັນຍາ ທີ່ ສປປ ລາວ ເປັນພາຄີ ແລະ ນິຕິກຳພາຍໃນທີ່ກ່ຽວຂ້ອງກັບການຕ້ານອາຊະຍາກຳຂ້າມຊາດ ໂດຍສະເພາະການຕ້ານການຄ້າມະນຸດ, ການຮ່ວມມືກັບສາກົນຂອງ ສປປ ລາວ ກໍຄືກົນໄກການປະສານງານ ລະຫວ່າງພາກສ່ວນທີ່ກ່ຽວຂ້ອງຂອງ ສປປ ລາວ ໃນການປົກປ້ອງ ແລະ ຊ່ວຍເຫຼືອ ຜູ້ຖືກເຄາະຮ້າຍຈາກການຄ້າມະນຸດ.
ນອກຈາກນີ້, ຜູ້ເຂົ້າຮ່ວມກອງປະຊຸມ ຍັງໄດ້ແລກປ່ຽນປະສົບການ ແລະ ຖອດຖອນບົດຮຽນຕົວຈິງຮ່ວມກັນ ເພື່ອເຮັດໃຫ້ການຕິດຕໍ່ປະສານງານ ລະຫວ່າງພາກສ່ວນທີ່ ກ່ຽວຂ້ອງມີຄວາມວ່ອງໄວ, ທັນເຫດການ, ມີປະສິດທິພາບ ແລະ ປະສິດທິຜົນສູງກວ່າເກົ່າ.
ໃນກອງປະຊຸມສຳມະນາຄັ້ງນີ້, ນັກວິທະຍາກອນ ຍັງໄດ້ຍົກໃຫ້ເຫັນເຖິງສະພາບລວມ ຂອງຂະບວນການຄ້າມະນຸດໃນ ສປປ ລາວ ແລະ ສາກົນ, ຊຶ່ງເປັນໜຶ່ງໃນອາຊະຍາກຳຂ້າມຊາດ ທີ່ມີການຈັດຕັ້ງທີ່ເປັນໄພຂົ່ມຂູ່ຮ້າຍເເຮງແກ່ມວນມະນຸດ. ການຄ້າມະນຸດ ແມ່ນມີຫຼາຍຮູບແບບ ແລະ ຫຼາຍວິທີການ, ໂດຍມີລັກສະນະເປັນເຄືອຂ່າຍຂ້າມຊາດ ເພື່ອຂູດຮີດເເຮງງານ ແລະ ຂູດຮີດທາງເພດ.
ໃນໄລຍະຜ່ານມາ, ລັດຖະບານລາວ ໄດ້ໃຫ້ຄວາມສຳຄັນຕໍ່ການເເກ້ໄຂບັນຫາດັ່ງກ່າວ, ໂດຍໄດ້ອະນຸມັດງົບປະມານຈໍານວນຫຼວງຫຼາຍ ໃນແຕ່ລະປີເຂົ້າໃນວຽກງານ ເພື່ອຕ້ານການຄ້າມະນຸດ ແລະ ໄດ້ກໍານົດໃຫ້ການຄ້າມະນຸດເປັນການກະທຳຜິດທາງອາຍາ ແລະ ໄດ້ຮັບຮອງເອົາແຜນງານແຫ່ງຊາດ ວ່າດ້ວຍການສະກັດກັ້ນ ແລະ ຕ້ານການຄ້າມະນຸດ ເປັນເເຕ່ລະໄລຍະນັບເເຕ່ປີ 2016 ເປັນຕົ້ນມາ.
ທີ່ມາ: ກົມການຂ່າວ, ກະຊວງການຕ່າງປະເທດ
