ໃນວັນທີ 18 ມັງກອນ 2023 ທີ່ ແຂວງຊຽງຂວາງ, ກົມເສດຖະກິດ, ກະຊວງການຕ່າງປະເທດ ຮ່ວມກັບ ສູນຮ່ວມມືອາຊຽນ-ຍີ່ປຸ່ນ (AJC) ໄດ້ຈັດກອງປະຊຸມສໍາມະນາ ໃນຫົວຂໍ້: “ ຄວາມສໍາຄັນ ແລະ ບົດບາດຂອງ ສປປ ລາວ ໃນການເຊື່ອມໂຍງເສດຖະກິດພາກພື້ນ ແລະ ສາກົນ ໃນສະພາບການປັດຈຸບັນ ” ທີ່ຫ້ອງວ່າການແຂວງ ຊຽງຂວາງ ພາຍໃຕ້ການເປັນປະທານຮ່ວມຂອງ ທ່ານ ບຸນໂຮມ ເທດທານີ, ຮອງເລຂາພັກແຂວງ, ປະທານສະພາປະຊາຊົນແຂວງ ແລະ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໂດຍມີຜູ້ເຂົ້າຮ່ວມຈາກບັນດາພະແນກການກ່ຽວຂ້ອງ, ພາກທຸລະກິດ, ວິທະຍາໄລພາຍໃນແຂວງ ຈໍານວນ 50 ກວ່າທ່ານ.
ຈຸດປະສົງຂອງການຈັດກອງປະຊຸມສໍາມະນາໃນຄັ້ງນີ້ ແມ່ນເພື່ອສົ່ງເສີມທັກສະທາງດ້ານຄວາມຮູ້ ແລະ ຄວາມເຂົ້າໃຈກ່ຽວກັບບົດບາດ ແລະ ຄວາມສຳຄັນຂອງ ສປປ ລາວ ໃນວຽກງານການເຊື່ອມໂຍງເສດຖະກິດ ພາກພື້ນ ແລະ ສາກົນ. ໂດຍສະເພາະທ່າອ່ຽງ ແລະ ສິ່ງທ້າທາຍຕ່າງໆ ທີ່ສົ່ງຜົນກະທົບທາງດ້ານການຄ້າພາຍໃນ ແລະ ການສົ່ງອອກ, ວຽກງານດຶງດູດການລົງທຶນຕ່າງປະເທດ, ການຄ້າຊາຍແດນກັບປະເທດເພື່ອນບ້ານ, ວຽກງານສົ່ງເສີມການທ່ອງທ່ຽວຕໍ່ສະພາບການທີ່ເສດຖະກິດມີຄວາມຝືດເຄືອງໃນປັດຈຸບັນ ໃຫ້ແກ່ບັນດາພະນັກງານ ພາກລັດ ທັງຂັ້ນສູນກາງ ແລະ ທ້ອງຖິ່ນ, ຂະແໜງການສຶກສາ ແລະ ພາກທຸລະກິດຂອງແຂວງ. ເພື່ອຈະໄດ້ພ້ອມກັນ ກໍານົດທິດທາງ ແລະ ວິທີແກ້ໄຂຮ່ວມກັນໃນຕໍ່ໜ້າແນໃສ່ການຊຸກຍູ້ເສດຖະກິດ ຂອງ ສປປ ລາວໃຫ້ຟື້ນໂຕກັບຄືນສູ່ສະພາບປົກກະຕິໂດຍໄວ.
ໃນກອງປະຊຸມສຳມະນາຄັ້ງນີ້ ບັນດາຜູ້ເຂົ້າຮ່ວມໄດ້ຮັບຟັງການບັນຍາຍຈາກນັກວິທະຍາກອນທີ່ມາຈາກ ກະຊວງການຕ່າງປະເທດ, ກະຊວງອຸດສາຫະກໍາ ແລະ ການຄ້າ, ກະຊວງແຜນການ ແລະ ການລົງທຶນ, ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ພະແນກອຸດສາຫະກໍາ ແລະ ການຄ້າ ແຂວງຊຽງຂວາງ ໃນຫຼາຍຫົວຂໍ້ທີ່ປິ່ນອ້ອມຫົວຂໍ້ຫຼັກຂອງກອງປະຊຸມສໍາມະນາ, ຊຶ່ງໄດ້ປຶກສາຫາລື ແລະ ແລກປ່ຽນຄໍາຄິດເຫັນຢ່າງກົງໄປກົງມາ ກ່ຽວກັບການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນ ຂອງ ສປປ ລາວ ໃນສະພາບປັດຈຸບັນ ແລະ ໄດ້ມີການສະເໜີແນະບາງວິທີການ ແລະ ມາດຕະການໃນການສືບຕໍ່ດໍາເນີນນະໂຍບາຍດັ່ງກ່າວໃນຕໍ່ໜ້າ ໂດຍສະເພາະແມ່ນການປະກອບສ່ວນຂອງຂະແໜງການກ່ຽວຂ້ອງຂັ້ນທ້ອງຖິ່ນ ແລະ ການພັດທະນາຂີດຄວາມສາມາດຂອງພະນັກງານ ເພື່ອປັບຕົວເຂົ້າກັບສະພາບເສດຖະກິດໃນປັດຈຸບັນ ແລະ ໃຫ້ທັນຍຸກສະໄໝແຫ່ງການເຊື່ອມໂຍງກໍຄື ຍຸກສະໄຫມແຫ່ງການປະຕິວັດອຸດສະຫະກຳຄັ້ງທີ 4 ລວມທັງການນໍາເອົາເນື້ອໃນ ແລະ ຂໍ້ມູນໃນກອງປະຊຸມສໍາມະນາຄັ້ງນີ້ໄປຜັນຂະຫຍາຍເຂົ້າໃນຂົງເຂດວຽກງານຂອງຕົນ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
Loading...