ໃນວັນທີ 07-09 ພະຈິກ 2023, ກະຊວງການຕ່າງປະເທດ ຮ່ວມກັບ ໜ່ວຍງານກອງທຶນຮ່ວມມືອາຊຽນ-ຈີນ ທີ່ມີສໍານັກງານຕັ້ງຢູ່ ຈາກາກຕາ, ອິນໂດເນເຊຍ ໄດ້ຈັດກອງປະຊຸມສໍາມະນາ ກ່ຽວກັບ ການສົ່ງເສີມກອງທືນການຮ່ວມມືອາຊຽນ-ຈີນ ແລະ ການສ້າງເອກະສານໂຄງການຮ່ວມມື ອາຊຽນ-ຈີນ ທີ່ ແຂວງ ຫຼວງພະບາງ. ໃຫ້ກຽດກ່າວເປີດ ກອງປະຊຸມສໍາມະນາຄັ້ງນີ້ໂດຍແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ, ທັງເປັນ ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ, ທ່ານ Fu Fengshan, ອຸປະທູດຊົ່ວຄາວ ຂອງ ສໍານັກງານ ສປ. ຈີນ ປະຈໍາ ອາຊຽນ ທີ່ ຈາກາກຕາ ແລະ ທ່ານ Dameria Rimta Silangit, ຫົວໜ້າພະແນກຄຸ້ມຄອງໂຄງການ ແລະ ການຮ່ວມມືດ້ານແຜນການ, ກອງເລຂາອາຊຽນ. ກອງປະຊຸມສໍາມະນາຄັ້ງນີ້ ມີຜູ້ເຂົ້າຮ່ວມປະມານ 60 ທ່ານ ຈາກ 17 ກະຊວງ.
ຈຸດປະສົງຂອງກອງປະຊຸມສໍາມະນາຄັ້ງນີ້ ແມ່ນເພື່ອສົ່ງເສີມຄວາມເຂົ້າໃຈ ກ່ຽວກັບ ບົດບາດຂອງກອງທຶນຮ່ວມມື ອາຊຽນ-ຈີນ ໃຫ້ແກ່ພະນັກງານຈາກກະຊວງຂະແໜງການທີ່ກ່ຽວຂ້ອງຂອງ ສປປ ລາວ ໂດຍສະເພາະແມ່ນ ການສ້າງຄວາມເຂົ້າໃຈກ່ຽວກັບ ຮູບແບບ, ຂັ້ນຕອນ ແລະ ວິທີການ ຂອງການສ້າງບົດສະເໜີໂຄງການຮ່ວມມື ແລະ ບົດລາຍງານໂຄງການ ພາຍໃຕ້ກອງທຶນຮ່ວມມືອາຊຽນ-ຈີນ ໂດຍແນໃສ່ສ້າງຄວາມເຂັ້ມແຂງໃຫ້ຜູ້ເຂົ້າຮ່ວມໃນການຂຽນບົດສະເໜີໂຄງການຮ່ວມມືອາຊຽນ-ຈີນ ພາຍໃຕ້ກອງທຶນຮ່ວມມືດັ່ງກ່າວ.
ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ຮັບຟັງການບັນຍາຍ ກ່ຽວກັບ ການພົວພັນຮ່ວມມືອາຊຽນ-ຈີນ ໃນຕະຫຼອດໄລຍະ 30 ປີ ທີ່ຜ່ານມາ ລວມທັງ ການກະກຽມການເປັນປະທານອາຊຽນຂອງ ສປປ ລາວ ໃນປີ 2024 ບັນຍາຍໂດຍຜູ້ຕາງໜ້າຈາກກົມອາຊຽນ, ກະຊວງການຕ່າງປະເທດ ແລະ ການບັນຍາຍກ່ຽວກັບພາລະບົດບາດ ແລະ ຄວາມຮັບຜິດຊອບຂອງຄະນະກຳມະການຜູ້ຕາງໜ້າຖາວອນ ປະຈໍາ ອາຊຽນ ທີ່ ຈາກາກຕາ ໃນຖານະທີ່ເປັນໜ່ວຍງານທີ່ຮັບຜິດຊອບ ການປະເມີນ ແລະ ຮັບຮອງບົດສະເໜີໂຄງການຮ່ວມມືອາຊຽນ-ຈີນ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
