ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 02 ກຸມພາ 2024 ຢູ່ທີ່ ຫ້ອງປະຊຸມຊັ້ນ 4 ກະຊວງຍຸຕິທໍາ ກົມກົດໝາຍ ໄດ້ຈັດກອງປະຊຸມ ຮັບຮອງ “ຮ່າງ” ຂໍ້ຕົກລົງວ່າດ້ວຍຜູ້ຄວບຄຸມຊັບສິນ ໂດຍການເປັນປະທານຂອງ ທ່ານ ໄພວີ ສີບົວລິພາ ລັດຖະມົນຕີ ກະຊວງຍຸຕິທໍາ, ມີບັນດາທ່ານ ຮອງລັດຖະມົນຕີ, ຫົວໜ້າ-ຮອງຫົວໜ້າກົມ, ສູນແກ້ໄຂຂໍ້ຂັດແຍງທາງດ້ານເສດຖະກິດ, ພະແນກການ, ພາກສ່ວນທີ່ກ່ຽວຂ້ອງ ເຂົ້າຮ່ວມ 32 ທ່ານ.
ຮ່າງຂໍ້ຕົກລົງວ່າດ້ວຍຜູ້ຄວບຄຸມຊັບສິນ ໄດ້ກໍານົດຫຼັກການ ແລະ ລະບຽບການ ກ່ຽວກັບຜູ້ຄວບຄຸມຊັບສິນ ແລະ ວິສາຫະກິດທີ່ໃຫ້ບໍລິການຄວບຄຸມຊັບສິນ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດ ຢ່າງເປັນລະບົບ, ມີປະສິດທິພາບ ແລະ ປະສິດທິຜົນ ແນໃສ່ຮັບປະກັນ ໃຫ້ຜູ້ຄວບຄຸມຊັບສິນ ທີ່ມີຄວາມຮູ້, ຄວາມສາມາດປະກອບສ່ວນເຂົ້າໃນການຈັດຕັ້ງປະຕິບັດກົດໝາຍ. ເພື່ອເຮັດໃຫ້ຮ່າງຂໍ້ຕົກລົງສະບັບນີ້ມີເນື້ອໃນຄົບຖ້ວນ, ສົມບູນ ແລະ ຮັດກຸມຂຶ້ນຕື່ມ ຜູ້ເຂົ້າຮ່ວມປະຊຸມຍັງໄດ້ສົນທະນາ ແລະ ແລກປ່ຽນຄວາມຄິດເຫັນ ຢ່າງກົງໄປກົງມາ ດ້ວຍຄວາມຮັບຜິດຊອບສູງ. ກອງປະຊຸມໃນຄັ້ງນີ້ ໄດ້ດຳເນີນເປັນເວລາ 1 ວັນ.
ໂດຍ: ໄໝສີສົດ ສິນພອນເພັດ