ກອງປະຊຸມຮ່ວມມືສະກັດກັ້ນ ແລະ ຕ້ານຢາເສບຕິດ 06 ປະເທດພາກພື້ນແມ່ນໍ້າຂອງ.

ເພື່ອເສີມສ້າງມິດຕະພາບຄວາມເປັນນໍ້າໜຶ່ງໃຈດຽວ ຂອງບັນດາປະເທດພາຄີບົດບັນທຶກຄວາມເຂົ້າ ໃຈ ວ່າດ້ວຍການຮ່ວມມືເພື່ອຄວບຄຸມຢາເສບຕິດໃນອານຸພາກພື້ນແມ່ນໍ້າຂອງ, ວັນທີ 25 ມີຖຸນາ 2024, ທີ່ ເຂດເສດຖະກິດພິເສດ ສາມລ່ຽມຄໍາ, ແຂວງບໍ່ແກ້ວ ໄດ້ຈັດກອງປະຊຸມເຈົ້າຫນ້າທີ່ອາວຸໂສ ວ່າດ້ວຍການຮ່ວມມືສະກັດກັ້ນ ແລະ ຕ້ານຢາເສບຕິດຂອງ 6 ປະເທດ ລາວ,ກຳປູເຈຍ, ຫວຽດນາມ, ຈີນ, ໄທ, ມຽນມາ ພາກພື້ນແມ່ນ້ຳຂອງ ໂດຍການເປັນປະທານຂອງທ່ານ ພົນຕີ ຄໍາກິ່ງ ຜຸຍຫຼ້າມະນີວົງ, ຮອງລັດຖະມົນຕີ ກະຊວງປ້ອງກັນຄວາມສະຫງົບ, ທ່ານ ຄຳພະຍາ ພົມປັນຍາ ຮອງເຈົ້າແຂວງໆ ບໍ່ແກ້ວ , ຕ່າງໜ້າຈາກອົງການ ຄະນະຜູ້ແທນຈາກ UNODC ປະຈຳ ສປປລາວ ແລະ ບັນດາຜູ້ຕ່າງຫນ້າຈາກປະເທດພາກພື້ນແມ່ນ້ຳຂອງເຂົ້າຮ່ວມ.

ກອງປະຊຸມໃນຄັ້ງນີ້ເພື່ອເປັນການແລກປ່ຽນຂໍ້ມູນກ່ຽວກັບສະພາບບັນຫາຢາເສບຕິດ ແລະ ສິ່ງທ້າທາຍໃນການແກ້ໄຂບັນຫາຢາເສບຕິດໃນຂົງເຂດ 6 ປະເທດລຸ່ມແມ່ນ້ຳຂອງ, ພ້ອມກັນນີ້ກໍ່ເພື່ອເປັນການປະກອບສ່ວນ ເຂົ້າໃນການສະເຫລີມສະຫລອງວັນສາກົນຕ້ານຢາເສບຕິດ 26 ມີຖຸນາ ຄົບຮອບ 37 ປີ. ໃນກອງປະຊຸມຈະໄດ້ຮັບຟັງເຖິງບັນຫາຂອງບັນດາຜູ້ຕ່າງຫນ້າຂອງ 6 ປະເທດລຸ່ມແມ່ນ້ຳຂອງໃນການສະກັ້ນ ແລະ ຕ້ານຢາເສບຕິດ

ສປປ ລາວ ກໍຄື 1ໃນບັນດາປະເທດທີ່ໄດ້ຮັບຜົນກະທົບໂດຍກົງ ແລະ ປະເຊີນກັບໄພຂົ່ມຂູ່ ຈາກບັນຫາຢາເສບຕິດຢ່າງຫຼີກລ່ຽງບໍ່ໄດ້. ຍາມໃດລັດຖະບານ ກໍ່ເຫັນຄວາມສໍາຄັນ ແລະ ເອົາໃຈ ໃສ່ຢ່າງຈິງຈັງ, ຜ່ານມາກໍ່ໄດ້ມີການຮ່ວມມືກັບບັນດາປະເທດຕ່າງໆເຊິ່ງສະແດງອອກ: ໃນການເຂົ້າ ຮ່ວມເປັນພາຄີສົນທິສັນຍາສາກົນ ວ່າດ້ວຍການສະກັດກັ້ນຕ້ານຢາເສບຕິດ ແລະ ສານອອກລິດຕໍ່ ຈິດປະສາດ 3 ສະບັບ, ລົງນາມບົດບັນທຶກການຮ່ວມມືສອງຝ່າຍ ວ່າດ້ວຍການສະກັດກັ້ນ ຕ້ານຢາເສບຕິດກັບ 13 ປະເທດ, ລົງນາມໃນບົດບັນທຶກຄວາມເຂົ້າໃຈແບບສອງຝ່າຍກັບປະເທດ ໃກ້ຄຽງ-ຮ່ວມມືຫຼາຍຝ່າຍ, ພາກ ພື້ນອາຊຽນ, ພາກພື້ນແມ່ນໍ້າຂອງ, ການສ້າງ ແລະ ຮັບຮອງບັນດາກົດໝາຍ-ນິຕິກາກ່ຽວກັບການ ຕ້ານຢາເສບຕິດ ອື່ນໆ.

ການຮ່ວມມືຂອງບັນດາ ປະເທດອານຸພາກພື້ນແມ່ນໍ້າຂອງເປັນສິ່ງທີ່ຈຳເປັນ, ກອງປະຊຸມໃນຄັ້ງນີ້ ເປັນການສ້າງໂອກາດ ນໍາສະເໜີແລກປ່ຽນສະພາບປະສົບການ ແລະ ແນວຄວາມຄິດ ເພື່ອປະເມີນສະພາບການແກ້ໄຂ ສິ່ງທ້າທາຍໃນຕໍ່ໜ້າຮ່ວມກັນໃຫ້ມີໝາກມີຜົນ, ແນໃສ່ການສະກັດກັ້ນ ແລະ ແກ້ໄຂສະພາບບັນຫາ ຢາເສບຕິດ ທີ່ເປັນອຸປະສັກ ເປັນໄພອັນຕະລາຍຂົ່ມຂູ່ ແລະ ສົ່ງ ຜົນກະທົບຕໍ່ການພັດທະນາເສດ ຖະກິດ-ສັງຄົມ ໃຫ້ມີທ່າອ່ຽງ ທີ່ດີຂຶ້ນ ແລະ ສາມາດຈຳກັດການຂະຫຍາຍຕົວຂອງຢາເສບຕິດ ໃຫ້ມີລັກສະນະແຄບລົງ, ຊຶ່ງທັງໝົດນັ້ນປະເທດໜື່ງປະເທດດຽວແມ່ນບໍ່ສາມາດແກ້ໄຂໄດ້.

ສະນັ້ນ, ການຮ່ວມມືຊ່ວຍເຫຼືອກັນແມ່ນສິ່ງທີ່ຈຳເປັນເພື່ອຮັກສາ, ສົ່ງເສີມການສ້າງສະ ຖຽນລະພາບທາງດ້ານການເມືອງຄວາມເປັນລະບຽບຮຽບຮ້ອຍ ແລະ ຮັກສາຄວາມໝັ້ນຄົງໃນສັງຄົມ.