ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 23 ມັງກອນ 2024, ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 59 ໄດ້ໄຂຂຶ້ນຢ່າງເປັນທາງການ ທີ່ນະຄອນຫຼວງວຽງຈັນ, ສປປ ລາວ ໃຫ້ ກຽດເປັນປະທານ ໂດຍ ທ່ານ ຄົມ ດວງຈັນທາ ຫົວໜ້າກົມໂຄສະນາ ການທ່ອງທ່ຽວ,ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ຫົວໜ້າເຈົ້າໜ້າທີ່ອາວຸໂສທ່ອງທ່ຽວ ສປປ ລາວ ແລະ ຮອງປະທານໂດຍ ທ່ານ ດາໂຕະ ໂຣສລານ ທານ ສຣິ ອັບດູນ ຣາມານ, ຫົວຫນ້າຫ້ອງການ ( Secretary General of the Ministry of Tourism, Arts and Culture) ,ປະເທດ ມາເລເຊຍ. ພ້ອມນີ້ ຍັງມີບັນດາຫົວໜ້າເຈົ້າໜ້າ ທີ່ອາວຸໂສທ່ອງທ່ຽວ ພ້ອມດ້ວຍຄະນະ ທີ່ມາກຈາກບັນດາປະເທດ ສະມາຊິກ ອາຊຽນ ແລະ ຄະນະຜູ້ຈາກປະເທດຕີມໍ ເລສເຕ ໃນນາມຜູ້ສັງເກດການ ເຂົ້າຮ່ວມ.
ໃນໂອກາດນີ້, ທ່ານ ຄົມ ດວງຈັນທາ, ປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການ ແລະ ໃຫ້ຄຳ ເຫັນວ່າ: ຂ້າພະເຈົ້າ ຮູ້ສຶກເປັນກຽດ ແລະ ຍິນດີເປັນຢ່າງຍິ່ງ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງ ທ່ຽວ ແຫ່ງ ສປປ ລາວ ໄດ້ຮັບກຽດເປັນປະທານກອງປະຊຸມ ເຈົ້າໜ້າທີ່ອາວຸໂສທ່ອງທ໋ຽວອາຊຽນ ຄັ້ງທີ 59 ໃນໂອກາດ ທີ່ ສປປ ລາວ ເປັນເຈົ້າພາບຈັດກອງປະະຊຸມ ແລະ ງານມະຫາກຳທ່ອງທ່ຽວ ອາຊຽນ 2024,ພາຍໃຕ້ ຫົວຂໍ້ “ການທ່ອງທ່ຽວທີ່ມີຄຸນນະພາບ ແລະ ມີຄວາມຮັບ ຜິດຊອບ ເພື່ອຄວາມຍືນຍົງຂອງອາຊຽນ ຫຼື Quality and Responsible Tourism – Sustaining ASEAN Future”. ພ້ອມນີ້, ທ່ານຍັງເນັ້ນຕື່ມວ່າ ອາຊຽນ ໄດ້ຕີລາຄາສູງຕໍ່ການປະຕິບັດບັນດາໂຄງການ ແລະ ກິດຈະກຳຕ່າງໆ ຂອງແຜນຍຸດທະສາດການທ່ອງທ່ຽວອາຊຽນ 2016-2025 ທີ່ໄດ້ປະກອບສ່ວນສຳຄັນເຂົ້າໃນການພັດທະນາຂະແໜງການທ່ອງທ່ຽວອາຊຽນໃຫ້ກວ້າງຂວາງຂຶ້ນ ໂດຍສະເພາະແມ່ນໄລຍະທີ່ມີການເປີດປະເທດຄືນໃໝ່ ພາຍຫຼັງການແຜ່ລະລະບາດຂອງພະຍາດໂຄວິດ-19.
ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 59 ໄດ້ປຶກສາຫາລື ແລະ ລາຍງານຄວາມຄືບໜ້າ ກ່ຽວກັບການຈັດຕັ້ງປະຕິບັດແຜນຍຸດທະສາດການທ່ອງ ທ່ຽວອາຊຽນ 2016-2025; ບັນດາຂໍ້ຕົກລົງຕ່າງໆກ່ຽວກັບ ການທ່ອງທ່ຽວຂອງກອງປະຊຸມສຸດຍອດອາຊຽນຄັ້ງທີ 42 ແລະ 43; ກອງປະຊຸມຍັງຈະໄດ້ຮັບຟັງການ ລາຍ ງານ ຜົນຂອງກອງປະຊຸມຄະນະກຳມະການທ່ອງທ່ຽວອາຊຽນ ແລະ ບັນຫາອື່ນໆທີ່ກ່ຽວຂ້ອງກັບບັນດາຄູ່ຮ່ວມມືເຈ ລະຈາສາກົນ. ນອກນີ້, ກອງປະຊຸມກະກຽມ ແລະ ເອກະພາບກັນຕໍ່ກັບວາລະ ແລະ ຖະແຫຼງການຮ່ວມຂອງ ກອງ ປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27 ແລະ ກອງປະຊຸມປິ່ມອ້ອມ ກັບບັນດາຄູ່ຮ່ວມເຈລະຈາ.