ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມເຈົ້າໜ້າທີ່ອາວຸດໂສອາຊຽນ+3ຄັ້ງທີ່ 1(1stASEAN+3 Task Force Meeting2024)ໄດ້ຈັດຂຶ້ນໃນລະຫວ່າງວັນທີ 25-26 ມັງກອນ 2024, ທີ່ ໂຮງແຮມຫຼວງພະບາງວິວ, ແຂວງຫຼວງພະບາງ, ໂດຍການເປັນປະທານຮ່ວມ ຂອງ4 ພາກສ່ວນ ຄື:ທ່ານ ວົງຄໍາແຫງ ວົງທະຈັກ, ຫົວໜ້າກົມການເງິນຕ່າງປະເທດ, ກະຊວງການເງິນ ສປປ ລາວ ແລະ ທ່ານ ຈິນວອນ ບອມ, ກະຊວງເສດຖະກິດ ແລະ ການເງິນ ສ. ເກົາຫຼີ, ທ່ານ ນາງ ແພງສີ ແພງເມືອງ ຫົວໜ້າກົມຮ່ວມມືສາກົນ ທະນາຄານແຫ່ງ ສປປ ລາວ ແລະ ທ່ານ ຊູຮຸນ ຢຸນ, ທະນາຄານແຫ່ງ ສ.ເກົາຫຼີ. ກອງປະຊຸມດັ່ງກ່າວ ມີຜູ້ເຂົ້າຮ່ວມຈາກ ກະຊວງ ການເງິນ ແລະ ທະນາຄານກາງ ຂອງບັນດາປະເທດສະມາຊິກອາ ຊຽນ+3, ກອງເລຂາອາຊຽນແລະ ອົງການຕິດຕາມເສດຖະກິດມະຫາພາກອາຊຽນ+3 (AMRO).
ໃນໂອກາດນີ້, ທ່ານ ວົງຄຳແຫງ ວົງທະຈັກ, ຫົວໜ້າກົມການ ເງິນຕ່າງປະເທດ, ກະຊວງການເງິນ, ໄດ້ກ່າວຕ້ອນຮັບບັນດາຜູ້ຕາງໜ້າ ASEAN+3, ພ້ອມທັງຍ້ອງຍໍຊົມເຊີຍຜົນສໍາເລັດຂອງອິນໂດເນເຊຍ ແລະ ຍີ່ປຸ່ນ ໃນນາມເປັນເຈົ້າພາບ ແລະ ປະທານປີ 2023. ໃນປີ 2024 ນີ້ ຈະໄດ້ສືບຕໍ່ປຶກສາຫາລືບັນດາຂໍ້ລິເລີ່ມໃໝ່ ແລະ ຮັບຟັງການລາຍງານຄວາມຄືບໜ້າ ຂອງການຮ່ວມມືການເງິນອາຊຽນ+3 ໃນໄລຍະຜ່ານມາ.ນອກຈາກນັ້ນ, ຫົວໜ້າກົມການເງິນຕ່າງປະເທດ ຍັງໄດ້ກ່າວເຖິງຄວາມສຳຄັນດ້ານປະ ຫວັດສາດມໍລະດົກໂລກຂອງນະຄອນຫຼວງພະບາງ ແລະ ແນະນຳກ່ຽວກັບ ປີທ່ອງທ່ຽວລາວ 2024.
ກອງປະຊຸມໃນມື້ທຳອິດ ໄດ້ປຶກສາຫາລື ກ່ຽວກັບ ກົນໄກການຈັດສັນເງິນທຶນໃນລະດັບພາກພື້ນ, ໂດຍສະເພາະ ການຫັນ Rapid Finance Facility (RFF) ໃຫ້ເປັນກົນໄກການສະ ໜອງທຶນຮີບດ່ວນ ເພື່ອແກ້ໄຂສະພາບຄ່ອງທາງດ້ານເສດຖະ ກິດ, ການເຊື່ອມຈອດໂຄງສ້າງການສະໜອງທຶນໃໝ່ ແລະ ການນຳໃຊ້ Freely Usable Currencies (FUCs). ພ້ອມນັ້ນ, ຍັງໄດ້ປຶກສາຫາລື ກ່ຽວກັບ ການຈັດຕັ້ງປະຕິບັດ ແລະ ການປັບ ປຸງວຽກງານ CMIM, ໂດຍສະເພາະ ການທົດລອງກູ້ຢືມໃນກອງທຶນ CMIM ຄັ້ງທີ 15; ຮັບຟັງການລາຍງານຄວາມຄືບໜ້າຂອງ (Asian Bond Market Initiative – ABMI) ຈາກ ທະນາ ຄານພັດທະນາອາຊີ (ADB);ລາຍງານກ່ຽວກັບວຽກງານທີ່ຕິດ ພັນກັບການສະໜອງທຶນເພື່ອຫຼຸດຜ່ອນຄວາມສ່ຽງຕໍ່ໄພພິບັດ (Disaster Risk Financing Initiative);
ພ້ອມນັ້ນ, ທະນາຄານໂລກ (WB) ຍັງໄດ້ລາຍງານກ່ຽວກັບການສະໜອງທຶນສໍາລັບວຽກງານໄພພິບັດທາງທໍາມະຊາດໃນຂົງເຂດກະສິກໍາ, ເຊິ່ງທະນາຄານໂລກ ມີແຜນຈັດກອງປະຊຸມສຳມະນາ 2 ຄັ້ງຄື: ໃນຮູບແບບທາງໄກ (ເວັບມີນາ) 1 ຄັ້ງແລະແບບເຫັນໜ້າ 1 ຄັ້ງ.
ກອງປະຊຸມໃນມື້ທີສອງ ແມ່ນເປັນກອງປະຊຸມຄະນະກຳມະ ການເຮັດວຽກຂອງ ອົງການຕິດຕາມເສດຖະກິດມະຫາພາກອາຊຽນ+3(ASEAN+3 Macroeconomic Research Office – AMRO), ເຊິ່ງໄດ້ລາຍງານຜົນສຳເລັດຂອງAMRO ປີ 2023 ແລະ ປຶກສາຫາລືກ່ຽວກັບວຽກງານບໍລິຫານ, ແຜນງົບປະມານ ປະຈຳປີ 2024 ແລະ ການເພີ່ມບຸກຄະລາກອນໃນ ປີ 2025. ນອກຈາກນັ້ນ, ກອງປະຊຸມ ຍັງໄດ້ລົງເລິກກ່ຽວກັບ ວຽກງານຍຸດທະສາດ ແລະ ການຄຸ້ມຄອງ AMRO, ເຊິ່ງໄດ້ທົບທວນຄືນ ຂອບການລາຍງານຜົນການປະເມີນການເຮັດວຽກຂອງ AMRO, ພ້ອມທັງຮັບຟັງການລາຍງານການປະເມີນຜົນການຄັດເລືອກ DD3 ແລະ ຜົນການປະເມີນການເຮັດວຽກຂອງ DD3 ຂອງອົງການ AMRO.
ນອກຈາກນັ້ນ, ຄະນະຜູ້ແທນກະຊວງການເງິນ ສປປ ລາວ ຍັງໄດ້ພົບປະເຮັດວຽກ 3 ຝ່າຍຮ່ວມກັບສ.ເກົາຫຼີແລະອົງການ AMRO, ພົບປະເຮັດວຽກກັບກອງເລາຂາອາຊຽນ, ພົບປະສອງຝ່າຍກັບກະຊວງການເງິນສິງກະໂປແລະອິນໂດເນເຊຍເພື່ອປຶກສາ ຫາລືວຽກງານການຮ່ວມມືໃນຂອບອາຊຽນ+3 ແລະແຜນການຮ່ວມມືສອງຝ່າຍໃນອະນາຄົດ.
ໃນເວທີກອງປະຊຸມບັນດາປະເທດສະມາຊິກອາຊຽນ+3 ເຫັນວ່າມີຜົນປະໂຫຍດໃຫ້ແກ່ ບັນດາກະຊວງການເງິນ ແລະ ທະນາ ຄານກາງ ເຊິ່ງມີໂອກາດໄດ້ມາແລກປ່ຽນຄວາມຄິດເຫັນ ພ້ອມທັງຮ່ວມກັນສ້າງຍຸດທະສາດແຜນການຮ່ວມມືດ້ານການເງິນໃນແຕ່ ລະໄລຍະ, ເຊິ່ງພາຍຫຼັງການລະບາດຂອງພະຍາດໂຄວິດ-19 ແລະ ການຜັນແປຂອງໂລກ ເຫັນໄດ້ເຖິງຄວາມສຳຄັນຂອງການເພີ່ມທະວີການເຊື່ອມ ໂຍງ ແລະ ການຮ່ວມມືດ້ານການເງິນ ໂດຍສະ ເພາະການຫັນເປັນດີຈີຕອນ, ການນຳໃຊ້ສະກຸູນເງິນທ້ອງຖິ່ນໃນການຊໍາສະສາງ, ການສ້າງຄັງເພື່ອສະໜັບສະໜູນດ້ານທຶນຮອນແກ້ໄຂສະພາບຄ່ອງດ້ານການເງິນ ໃນກໍລະນີມີເຫດການສຸກເສີນ ແລະ ຂະຫຍາຍການຮ່ວມມືດ້ານການເງິນຄຸ້ມຄອງໄພພິບັດທີ່ອາດເກີດຂຶ້ນໃນອະນາຄົດ, ທັງສືບຕໍ່ສ້າງຄວາມເຂັ້ມແຂງ ໃຫ້ແກ່ອົງການ AMRO ເປັນອົງການເຮັດວຽກຊ່ວຍປະເທດສະມາຊິກອາຊຽນ+3 ໃນການວິໄຈ, ສັງລວມ ສະພາບເສດຖະກິດມະຫາພາກໃນແຕ່ລະປະເທດ ແລະ ທ່າອ່ຽງຂອງພາກພື້ນ ແລະ ສາກົນ ເພື່ອສະເໜີນະໂຍບາຍທີ່ເໝາະສົມໃຫ້ແກ່ບັນດາປະເທດສະມາ ຊິກ ໃນການສືບຕໍ່ຮັກສາສະຖຽນລະພາບທາງດ້ານເສດຖະກິດ- ການເງິນ ໃຫ້ມີການພັດທະນາຢ່າງມີຄວາມຍືນຍົງ.