ກອງປະຊຸມເຈົ້າໜ້າທີ່ອາວຸໂສ ເສດຖະກິດອາຊຽນເພື່ອກະກຽມໃຫ້ເເກ່ການຈັດກອງປະຊຸມລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 30 ຈັດຂື້ນໃນວັນທີ 8 ມີນາ 2024 ຢູ່ຫ້ອງປະຊຸມໂຮງເເຮມພູເເມນ ນະຄອນຫລວງພະບາງ ເເຂວງຫລວງພະບາງ ພາຍໃຕ້ການເປັນປະທານຂອງທ່ານ ໄຊຊະນະ ໄຊຍະກອນ ຫົວຫນ້າກົມເຈລະຈາ ການຄ້າ ເເລະ ການຮ່ວມມືເສດະກິດສາກົນ ກະຊວງອຸດສະຫະກໍາເເລະການຄ້າ ທັງເປັນ ຫົວຫນ້າເຈົ້າຫນ້າທີ່ອາວຸໂສເສດຖະກິດອາຊຽນຄັ້ງທີ30 ຂອງລາວ ມີກອງເລຂາອາຊຽນ,ເຈົ້າຫນ້າທີ່ອາວຸໂສເສດະກີດອາຊຽນທີ່ມາຈາກ 10ປະເທດສະມາຊິກອາຊຽນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມໄດ້ພ້ອມກັນປຶກສາຫາລືກ່ຽວກັບວຽກງານດ້ານຕ່າງໆໂດຍສະເພາະ ຄວາມຄືບໜ້າໃນການກະກຽມຮັບຮອງແຜນວຽກບູລິມະສິດຂອງເສົາຄໍ້າເສດຖະກິດ ພາຍໃຕ້ການເປັນປະ ທານອາຊຽນຂອງ ລາວ ເພື່ອສະເໜີຕໍ່ກອງປະຊຸມລັດຖະມົນຕີພິຈາລະນາຮັບຮອງ, ການຈັດຕັ້ງປະຕິບັດແຜນວຽກບູລິມະສິດປະຈໍາປີ 2024, ຄວາມຄືບໜ້າການເຈລະຈາຍົກລະດັບສັນຍາການຄ້າດ້ານສິນຄ້າອາຊຽນ, ການເຈລະຈາຂອບສັນຍາວ່າດ້ວຍການຄ້າດີຈີຕອນອາຊຽນ, ບັນດາຂໍ້ລິເລີ່ມເພື່ອຄວາມຍືນຍົງຂອງອາຊຽນ, ຄວາມຄືບໜ້າໃນການເຈລະຈາຂອບວຽກວ່າດ້ວຍການອໍານວຍຄວາມສະດວກດ້ານການບໍລິການໃນອາຊຽນ ເພື່ອສະ
ເໜີໃຫ້ລັດຖະມົນຕີພິຈາລະນາຮັບຮອງ, ຄວາມຄືບໜ້າໃນການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025 ແລະ ການສ້າງວິໄສທັດປະຊາຄົມອາຊຽນ 2045 ແລະ ແຜນຍຸດທະສາດໃນການຈັດຕັ້ງປະຕິບັດລວມເຖີງວຽກງານສໍາຄັນທີ່ກ່ຽວຂ້ອງຈໍານວນຫນື່ງ.
ທ່ານ ໄຊຊະນະ ໄຊຍະກອນ ຫົວຫນ້າກົມເຈລະຈາ ການຄ້າ ເເລະ ການຮ່ວມມືເສດະກິດສາກົນ ທັງເປັນ ຫົວຫນ້າເຈົ້າຫນ້າທີ່ອາວຸ ໂສເສດຖະກິດອາຊຽນຄັ້ງທີ30 ຂອງລາວ ມີຄໍາເຫັນວ່າ:ກອງປະຊຸມຄັ້ງນີ້ໄດ້ດໍາເນີນໄປດ້ວຍຜົນສໍາເລັດຢ່າງຈົບງາມພາຍຫລັງດໍາເນີນມາເປັນເວລາເຄີງມື້ ຈຸດປະສົງເພື່ອປຶກສາຫາລື ກະກຽມດ້ານເນື້ອ ໃນ ແລະ ພິທີການໃຫ້ແກ່ກອງປະຊຸມ ລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 30 ທີ່ຈະຈັດຂຶ້ນໃນວັນທີ 9 ມີນາ 2024 ພ້ອມທັງເປັນການສົ່ງເສີມການທ່ອງ ທ່ຽວລາວ ເວົ້າລວມ, ເວົ້າສະເພາະ ກໍ່ຄືເເຂວງຫລວງພະບາງໃຫ້ມີບັນຍາກາດຟົດຟື້ນ ໃນໂອກາດປີທ່ອງທ່ຽວລາວ 2024 ຕື່ມອີກ.
ຂ່າວ: ເດດອາລຸນ ແກ້ວວິໄລ
