ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກອງປະຊຸມເຊື່ອມຊຶມລັດຖະບັນຍັດການໃຫ້ອະໄພຍະໂທດ

ກອງປະຊຸມ​ເຊື່ອມ​ຊຶມ ລັດຖະບັນຍັດ ວ່າ​ດ້ວຍ​ການ​ອະ​ໄພ​ຍະ​ໂທດ ​​ໄດ້​ໄຂ​ຂຶ້ນ​ໃນ​ຕອນ​ເຊົ້າຂອງ​ວັນ​ທີ 09 ເມສາ 2018 ທີ່​ຫໍ​ປະຊຸມ​ແຫ່ງ​ຊາດ ພາຍ​ໃຕ້​ການ​ເປັນ​ປະທານ​ຂອງ ທ່ານ ສອນ​​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ, ປະທານ​ຄະນະ​ກຳມະການ​ອະ​ໄພ​ຍະ​ໂທດ​ ລະດັບ​ຊາດ ເຊິ່ງມີບັນດາທ່ານຄະນະກຳມະການ​ອະ​ໄພ​ຍະ​ໂທດ​ ລະດັບ​ຊາດ, ລະດັບກະຊວງ ​ແລະ ລະດັບ​ແຂວງ-​ນະຄອນຫຼວງວຽງຈັນ ​ເຂົ້າຮ່ວມ.

​ໃນກອງ​ປະຊຸມ​ຄັ້ງ​ນີ້, ​ໄດ້​ພ້ອມ​ກັນ​ເຊື່ອມ​ຊຶມ ​ເນື້ອ​ໃນ​ລັດຖະບັນຍັດ ຂອງ​ປະທານ​ປະ​ເທດ ວ່າ​ດ້ວຍ​ການ​ອະ​ໄພ​ຍະ​ໂທດ ​ແລະ ບັນດາ​ນິຕິ​ກຳ​ທີ່​ກ່ຽວຂ້ອງ​ກັບ​ການ​ອະ​ໄພ​ຍະ​ໂທດ, ​ແລກປ່ຽນຄຳ​ຄິດ​ຄຳ​ເຫັນ​ ເພື່ອສ້າງ​ຄວາມ​ຮັບ​ຮູ້ ​ແລະ ​ເປັນ​ເອກະ​ພາບ ​ໃນ​ການຈັດຕັ້ງປະຕິບັດ​ລັດຖະບັນຍັດ​ດັ່ງກ່າວ. ນອກ​ນີ້, ​ໃນ​ກອງ​ປະຊຸມ ຍັງ​ໄດ້​ແຈ້ງ​ໃຫ້​ຊາບ ກ່ຽວກັບ​ຜົນ​ຂອງ​ກອງ​ປະຊຸມ​ສະຫຼຸບວຽກງານ​ອະ​ໄພ​ຍະ​ໂທດ ປະຈຳ​ປີ 2017 ທີ່​ໄດ້​ມີ​ການ​ສັງ​ເກດ​ຕີ​ລາຄາ​ດ້ານ​ດີ, ຈຸດ​ອ່ອນ​ຂໍ້ຄົງຄ້າງ, ບົດຮຽນທີ່​ຖອດ​ຖອນ​ໄດ້ ​ແລະ ການ​ກຳນົດ​ແຜນ​ສຳລັບ​ປີ 2018 ​ເຊິ່ງ​ໃນ​ປີ 2017 ທີ່​ຜ່ານ​ມາ ໄດ້ມີ​ການຄົ້ນຄວ້າການໃຫ້ອະໄພຍະໂທດ ແກ່ນັກໂທດທົ່ວປະເທດທັງໝົດ 1.800 ກວ່າຄົນ, ຍິງ 400 ຄົນ, ຕ່າງປະເທດ 39 ຄົນ, ຍິງ 10 ຄົນ. ໃນນີ້, ໄດ້​ເຫັນ​ດີໃຫ້ອະໄພຍະໂທດ ​ໃນ​ການຫຼຸດຜ່ອນໂທດ 1.500 ກວ່າຄົນ, ຍິງ 340 ຄົນ, ຕ່າງປະເທດ 33 ຄົນ, ຍິງ 10 ຄົນ ແລະ ໃຫ້ອະໄພຍະໂທດປ່ອຍຕົວ 333 ຄົນ, ຍິງ 60 ຄົນ ​ແລະ ຕ່າງປະເທດ 06 ຄົນ. ສາມາດເກັບຄ່າປັບ​ໄໝທາງອາຍາໄດ້ 2,7 ຕື້ກວ່າກີບ, ຖອກເຂົ້າງົບປະມານ​ແລ້ວ 1,2 ຕື້ກວ່າກີບ. ສຳລັບແຜນການປະຈໍາປີ 2018 ຂອງຄະນະກໍາມະການອະໄພຍະໂທດ ລະດັບຊາດ ​ແມ່ນ​ຈະ​ໄດ້​ສຸມ​ໃສ່ປັບປຸງ, ນໍາສະເໜີ ແລະ ປະກາດໃຊ້ ລັດຖະບັນຢັດວ່າດ້ວຍ ການໃຫ້ອະໄພຍະໂທດ ຂອງປະທານປະເທດ ແລະ ການຈັດຕັ້ງເຜີຍແຜ່ເຊື່ອມຊຶມນິຕິກໍາດັ່ງກ່າວ ໃຫ້​ມວນ​ຊົນ​ໄດ້​ຮັບ​ຮູ້ ​ແລະ ​ເຂົ້າ​ໃຈ ຢ່າງກວ້າງຂວາງ ແລະ ທົ່ວເຖິງ.

​​ໃນ​ຕອນ​ທ້າຍ​ຂອງ​ກອງ​ປະຊຸມ, ທ່ານ ສອນ​ໄຊ ສີ​ພັນ​ດອນ ກໍ່​ໄດ້​ກ່າວ​ວ່າ: ຜົນສໍາເລັດຂອງ​ກອງ​ປະຊຸມ​ເທື່ອນີ້ ເປັນພຽງຜົນສໍາເລັດຢູ່ໃນຂັ້ນຕົ້ນເທົ່ານັ້ນ ເພາະວ່າວຽກງານອະໄພຍະໂທດ ແມ່ນວຽກງານນະໂຍບາຍດ້ານມະນຸດສະທຳຂອງພັກ ​ແລະ ລັດຖະບານ, ແມ່ນພາລະບົດບາດ, ສິດ ແລະ ໜ້າທີ່ຂອງປະທານປະເທດ ທີ່ກຳນົດໄວ້ໃນມາດຕາ 67 ຂໍ້ 12 ຂອງລັດຖະທໍາມະນູນແຫ່ງ ສປປ ລາວ ​ແລະ ​ໃນປີ 2018 ລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບທຳອິດ ທີ່ໄດ້ຮັບຮອງ ແລະ ລົງນາມ ຈາກປະທານປະເທດ ຢ່າງ​ເປັນ​ທາງ​ການ ຊຶ່​ງ​ເປັນນິຕິກຳທາງດ້ານກົດໝາຍທີ່ສຳຄັນ, ເປັນບ່ອນອີງໃຫ້ແກ່ການເຄື່ອນໄຫວ ຈັດຕັ້ງປະຕິບັດວຽກງານຄົ້ນຄວ້າ ສະເໜີໃຫ້ອະໄພຍະໂທດ ​ເນື່ອງ​ໃນ​ໂອກາດ​ວັນຊາດ​ທີ 2 ທັນວາຂອງແຕ່ລະປີ. ຍ້ອນເຫັນໄດ້ຄວາມສໍາຄັນດັ່ງກ່າວ, ຄະນະກໍາມະການອະໄພຍະໂທດ ລະດັບຊາດ ຈຶ່ງໄດ້ຈັດ​ກອງ​ປະ​ຊຸມ​ເພື່ອ​ພ້ອມກັນມາເຊື່ອມຊຶມລັດຖະບັນຍັດດັ່ງກ່າວ ​ແນ​ໃສ່ສ້າງຄວາມຮັບຮູ້ເຂົ້າໃຈ​ເປັນ​ເອກະ​ພາບ ​ໃນ​ການຈັດຕັ້ງປະຕິບັດຕົວ​ຈິງ. ພ້ອມ​ນີ້, ທ່ານ​ຮອງ​ນາຍົກລັດຖະມົນຕີ ຍັງ​ໄດ້ຮຽກຮ້ອງ​ໃຫ້ນຳເອົາເນື້ອໃນຈິດໃຈຂອງກອງປະຊູມຄັ້ງນີ້ ໄປຈັດຕັ້ງປະຕິບັດໃຫ້ປະກົດຜົນເປັນຈິງ ​ແລະ ​ເໜັ້ນ​ຕື່ມ​ບາງ​ບັນຫາ​ ດັ່ງ​ນີ້:

ຕ້ອງ​ກຳ​ແໜ້ນ​ແນວທາງ​ນະ​ໂຍບາຍ​ຂອງ​ພັກ-ລັດ, ກຳ​ແໜ້ນລັດຖະທຳ​ມະນູນ ​ແລະ ກົດໝາຍ​ ເປັນຕົ້ນ​ແມ່ນ​ເນື້ອ​ໃນ​ຂອງ​ລັດຖະບັນຍັດ​ຂອງ​ປະທານ​ປະ​ເທດ ​ໂດຍ​ຈັດ​ຕັ້ງ​ໂຄສະນາ​ເຜີ​ຍ​ແຜ່​​ຢ່າງ​ທົ່ວ​ເຖິງ ​ແລະ ຈັດ​ຕັ້ງ​ປະຕິບັດ​ຢ່າງ​ຖືກຕ້ອງ.

ປະຕິບັດ​ລະບອບເຮັດ​ວຽກລວມສູນ ເປັນ​ເອກະ​ພາບ, ​ເປັນໝູ່ຄະນະ, ຮັບປະກັນ​ຄວາມ​ຖືກຕ້ອງ, ຍຸຕິ​ທຳ, ໂປ່​ງ​ໃສ ​ແລະ ທັນ​ເວລາ, ມີ​ການ​ລາຍ​ງານ​ຂໍ​ຄຳ​ເຫັນ ​ແລະ ສະຫຼຸບຖອດ​ຖອນ​ບົດຮຽນ​ເປັນ​ປົກກະຕິ.

ຕ້ອງ​ຮັບປະກັນ​ກົນ​ໄກ​ປະສານ​ສົມທົບ​ຢ່າງ​ກົມກຽວ ລະຫວ່າງ​ສາຍ​ຕັ້ງ​, ສາຍ​ຂວາງ, ​ເຮັດ​ໃຫ້​ວຽກງານ​ອະ​ໄພ​ຍະ​ໂທດ​ໄດ້​ຮັບ​ຜົນສຳ​ເລັດ​​ເປັນ​ຢ່າງ​ດີ, ຜ່ານ​ການຈັດ​ຕັ້ງ​ປະຕິບັດ ຕ້ອງ​ມີ​ການ​ຕິດຕາມ​ກວດກາ ​ແລະ ປະຕິບັດ​ນະ​ໂຍບາຍ​ຍ້ອງຍໍ​ຊົມ​ເຊີຍ​ບຸກຄົນ, ການຈັດ​ຕັ້ງ ທີ່​ປະຕິບັດໜ້າທີ​ສຳ​ເລັດ​ຜົນ ແລະ ດີ​ເດັ່ນ. ພ້ອມ​ນັ້ນ, ​ຕ້ອງ​ສຳຫຼວດກວດກາ​ບຸກຄົນ ​ແລະ ການຈັດ​ຕັ້ງ ​ທີ່​ບໍ່ສຳ​ເລັດໜ້າທີ່.

ບັນ​ຫາ​ງົບປະມານ​ຮັບ​ໃຊ້​ວຽກງານ​ອະ​ໄພ​ຍະ​ໂທດ​ ແມ່ນ​ຂຶ້ນກັບ​ຄວາມ​ຮັບຜິດຊອບ​ຂອງ​ບັນດາກະຊວງ, ອົງການ ​ແລະ ​ແຕ່ລະ​ທ້ອງ​ຖິ່ນ ຕາມ​ລະບຽບການ​​ເງິນ.

ອົງການ​ໄອ​ຍະ​ການ​ປະຊາຊົນ​ ເປັນ​ໃຈກາງ ​ແລະ ​ເປັນ​ເສນາ​ທິການ ​ໃຫ້​ແກ່​ຄະນະ​ກຳມະການ​ອະ​ໄພ​ຍະ​ໂທດ​ ລະດັບ​ຊາດ​ ກໍ່​ຄື​ຂັ້ນ​ທ້ອງ​ຖິ່ນ.