ກົມໂຄສະນາເຜີຍເຜີຍກົດໝາຍ ກະຊວງຍຸຕິທຳ ສົມທົບກັບພະແນກຍຸຕິທໍາແຂວງ ບໍ່ແກ້ວເຄື່ອນໄຫວ ແນະນຳ, ຕິດຕາມ ແລະ ຊຸກຍູ້ວຽກງານປະເມີນການໂຄສະນາເຜີຍແຜ່ກົດໝາຍ ຂອງຂະແໜງຍຸຕິທຳ ໃນລະຫວ່າງວັນທີ 30 ກໍລະກົດ ຫາ 1 ສິງຫາ 2024 ນຳພາໂດຍ ທ່ານ ນາງ ສີສຸດາ ໂສພາວັນດີ ຫົວໜ້າກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ, ເຂົ້າຮ່ວມມີບັນດາ ທ່ານຮອງຫົວໜ້າກົມ ທີ່ມາຈາກກະຊວງຍຸຕິທຳ; ຮອງຫົວໜ້າພະແນກຍຸຕິທຳແຂວງ ແລະ ຄະນະຮັບຜິດຊອບປະເມີນການໂຄສະນາເຜີຍແຜ່ກົດໝາຍ ຂັ້ນແຂວງ ແລະ ຂັ້ນເມືອງ ຂອງ ແຂວງ ບໍ່ແກ້ວ, ແຂວງຫຼວງນໍ້າທາ, ອຸດົມໄຊ, ຜົ້ງສາລີ ແລະ ຄະນະຮັບຜິດຊອບທີ່ມາຈາກສູນກາງ ເຂົ້າຮ່ວມ ທັງໝົດ 240 ທ່ານ ຍິງ 68 ທ່ານ.
ຈຸດປະສົງ ເພື່ອເຜີຍແຜ່ຄຳແນະນຳ ສະບັບເລກທີ 487/ກຍ, ລົງວັນທີ 10 ເມສາ 2024 ກ່ຽວກັບການປະເມີນການໂຄສະນາເຜີຍແຜ່ກົດໝາຍຂອງຂະແໜງຍຸຕິທໍາ; ແນະນໍາການນໍາໃຊ້ແບບພິມ ແລະ ວິທີການສຳພາດກຸ່ມເປົ້າໝາຍ; ແນະນຳວິທີການນຳວິທີການພິມຜົນການປະເມີນເຂົ້າໃນລະບົບຖານຂໍ້ມູນ ພ້ອມທັງທົດລອງປ້ອນຂໍ້ມູນຕົວຈິງເຂົ້າໃນລະບົບ. ຫຼັງຈາກນັ້ນ, ຄະນະຮັບຜິດຊອບປະເມີນການໂຄສະນາເຜີຍແຜ່ກົດໝາຍ ຂັ້ນແຂວງບໍ່ແກ້ວ ກໍໄດ້ໂຄສະນາເຜີຍແຜ່ກົດໝາຍ ພ້ອມທັງປະເມີນຄວາມຮັບຮູ້ກົດໝາຍຂອງພະນັກງານ-ລັດຖະກອນ, ທະຫານ, ຕຳຫຼວດ, ນັກທຸລະກິດ ແລະ ປະຊາຊົນ ຢູ່ແຂວງບໍ່ແກ້ວ. ສ່ວນຄະນະຮັບຜິດຊອບປະເມີນການໂຄສະນາເຜີຍແຜ່ກົດໝາຍ ຂອງສາມແຂວງ ເຂົ້າຮ່ວມກອງປະຊຸມໃນຄັ້ງນີ້ ແມ່ນຈະໄດ້ສືບຕໍ່ໂຄສະນາເຜີຍແຜ່ກົດໝາຍ ແລະ ປະເມີນຄວາມຮັບຮູ້ກົດໝາຍໃຫ້ແກ່ກຸ່ມເປົ້າໝາຍທີ່ຢູ່ພາຍໃນແຂວງ ແລະ ເມືອງຂອງຕົນ.
ກອງປະຊຸມໃນຄັ້ງນີ້ໄດ້ດຳເນີນເປັນເວລາ 3 ວັນ ຈຶ່ງຈະສຳເລັດ ຊຶ່ງໄດ້ຮັບການສະໜັບສະໜູນຈາກໂຄງການລາວ/037.
ຂ່າວ-ພາບ: ບຸນຖອມ ພະສະແຫວງ
