ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 12 ມັງກອນ 2024, ທີ່ ນະຄອນປາກເຊ, ແຂວງຈໍາປາສັກ, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ວຽກງານການຕ່າງປະເທດ ໃຫ້ແກ່ພະນັກງານກ່ຽວຂ້ອງຈາກບັນດາແຂວງພາກກາງ ແລະ ພາກໃຕ້, ໂດຍການເຂົ້າຮ່ວມເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ມີທ່ານຫົວໜ້າຫ້ອງການກະຊວງ, ຄະນະກົມ, ວິຊາການຂອງກະຊວງການຕ່າງປະເທດທີ່ກ່ຽວຂ້ອງ ຂື້ນເຜີຍແຜ່ບັນດາຫົວຂໍ້ຕ່າງໆທີ່ຕິດພັນກັບວຽກງານຂອງຕົນ ແລະ ມີຄະນະຜູ້ແທນຈາກບັນດາແຂວງພາກກາງ ແລະ ພາກໃຕ້ ເຂົ້າຮ່ວມລວມທັງໝົດ 46 ທ່ານ.
ໃນໂອກາດດນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ຍົກໃຫ້ເຫັນເຖິງສະພາບການພາກພື້ນ ແລະ ສາກົນ ທີ່ກໍາລັງມີການຜັນແຜຢ່າງໄວວາ ແລະ ສະຫຼັບສັບຊ້ອນ, ເຊິ່ງມີທັງກາລະໂອກາດ ແລະ ສິ່ງທ້າທາຍໃຫ້ແກ່ ສປປ ລາວ, ໃນຂະນະດຽວກັນວຽກງານການຕ່າງປະເທດ ກໍ່ກໍາລັງເຕີບໃຫຍ່ ແລະ ມີຄວາມຕິດພັນກັບທຸກຂະແໜງການແຕ່ສູນກາງຮອດທ້ອງຖິ່ນໃນທົ່ວປະເທດ, ໂດຍສະເພາະການເປັນປະທານອາຊຽນ ຄັ້ງທີ 3 ຂອງ ສປປ ລາວ ໃນປີ 2024 ນີ້. ບັນດາພະແນກການຕ່າງປະເທດ ໄດ້ມີບົດບາດສໍາຄັນໃນການເປັນເສນາທິການໃຫ້ການນຳແຂວງ ໃນການຜັນຂະຫຍາຍ ແລະ ຈັດຕັ້ງປະຕິບັດວຽກງານການຕ່າງປະເທດຢູ່ບັນດາແຂວງຂອງຕົນ, ພ້ອມກັນນັ້ນກໍເປັນຂົວຕໍ່ການເຄື່ອນໄຫວວຽກງານການຕ່າງປະເທດ ລະຫວ່າງ ສູນກາງ ແລະ ທ້ອງຖິ່ນ. ດັ່ງນັ້ນ, ກອງປະຊຸມຄັ້ງນີ້ ຈຶ່ງມີຈຸດປະສົງເພື່ອເພີ່ມຂີດຄວາມສາມາດໃຫ້ພະນັກງານທີ່ຮັບຜິດຊອບວຽກງານພົວພັນຮ່ວມມືກັບຕ່າງປະເທດຢູ່ບັນດາແຂວງ ໃຫ້ມີຄວາມເຂັ້ມແຂງທາງດ້ານວິຊາການພົວພັນຕ່າງປະເທດ ເປັນແຕ່ລະໄລຍະ ແລະ ການເຄື່ອນໄຫວວຽກງານການຕ່າງປະເທດໃຫ້ມີຄວາມເປັນເອກະພາບກັນທົ່ວປະເທດ, ທັງເປັນໂອກາດອັນດີ ທີ່ໄດ້ປຶກສາຫາລື, ແລກປ່ຽນຂໍ້ມູນ ແລະ ຄໍາຄິດເຫັນຕ່າງໆ ລະຫວ່າງ ກະຊວງການຕ່າງປະເທດ ກັບ ບັນດາແຂວງພາກພາກກາງ ແລະ ພາກໃຕ້ ໃຫ້ວຽກງານການຕ່າງປະເທດ ມີຄວາມໂລ່ງລ່ຽນ, ສ້າງຄວາມເຂົ້າໃຈເລິກເຊິ່ງ ແລະ ແກ້ໄຂບັນຫາຂ້ອງຄາຕ່າງໆ ແນໃສ່ເຮັດໃຫ້ການປະສານສົມທົບໃນການເຄື່ອນໄຫວວຽກງານການຕ່າງປະເທດ ໃຫ້ມີປະສິດທິພາບ ແລະ ປະສິດທິຜົນຂຶ້ນກວ່າເກົ່າ.
ກອງປະຊຸມໄດ້ມີການຂຶ້ນນໍາສະເໜີບົດ ແລະ ມີການແລກປ່ຽນຄໍາຄິດເຫັນຂອງບັນດາຜູ້ເຂົ້າຮ່ວມ ຢ່າງກົງໄປກົງມາ ໃນຫຼາຍຫົວຂໍ້ສໍາຄັນ ເປັນຕົ້ນ: ການວິເຄາະຕີລາຄາສະພາບການສາກົນທີ່ພົ້ນເດັ່ນ ແລະ ທ່າຂະຫຍາຍໃນຕໍ່ໜ້າ; ການປັບປຸງຂອດປະສານງານລະຫວ່າງ ກະຊວງ ແລະ ທ່ອງຖິ່ນ; ວຽກງານຄຸ້ມຄອງພະນັກງານທ້ອງຖິ່ນ ທີ່ເຮັດວຽກນໍາອົງການຈັດຕັ້ງສາກົນ; ການພົວພັນຮ່ວມມືສອງຝ່າຍກັບບັນດາປະເທດທີ່ມີຊາຍແດນຕິດຈອດກັບບັນດາແຂວງພາກກາງ ແລະ ພາກໃຕ້; ການຕິດຕາມ, ລາຍງານ ແລະ ຕອບໂຕ້ຂ່າວໂຈມຕີ ສປປ ລາວ ຂອງສື່ອອນລາຍ ທີ່ພົວພັນກັບຕ່າງປະເທດ; ການໂຄສະນາເຜີຍແຜ່ຜົນການເຄື່ອນໄຫວວຽກງານການຕ່າງປະເທດຂອງສູນກາງ ແລະ ທ້ອງຖິ່ນ; ການຄຸ້ມຄອງການເຄື່ອນໄຫວວຽກງານການຂ່າວຂອງຕ່າງປະເທດຢູ່ ສປປ ລາວ; ການຄຸ້ມຄອງຄົນຕ່າງປະເທດທີ່ມາເຄື່ອນໄຫວຢູ່ ສປປ ລາວ; ການອອກໜັງສືຜ່ານແດນໃຫ້ພົນລະເມືອງລາວ ແລະ ອື່ນໆ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ