ໃນຕອນເຊົ້າຂອງ ວັນທີ 26 ກັນຍາ 2024, ທີ່ນະຄອນຫຼວງວຽງຈັນ. ກົມຄຸ້ມຄອງການປ່ຽນແປງດິນຟ້າອາກາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມ ເຜີຍແຜ່ວຽກງານສິນເຊື່ອກາກບອນ ແລະ ຕະຫຼາດສິນເຊື່ອກາກບອນ ລະດັບຊາດ ຄັ້ງທີ 1 ໂດຍການເປັນປະທານຮ່ວມ ຂອງທ່ານ ອໍາໄພວັນ ອຸດົມເດດ ຮອງຫົວໜ້າກົມ ຄຸ້ມຄອງ ການປ່ຽນແປງດິນຟ້າອາກາດ, ທ່ານ ນາງ ເບນນິຕ້າ ສົມເມີວິວ (Benita Sommervill), ເອກອັກຄະລັດຖະທູດ ອົດສະຕາລີ ປະຈໍາ ສປປ ລາວ, ທ່ານ ໂຣວັນ ເຟຣເຊີ ຫົວໜ້າສະຖາບັນການເຕີບໂຕສີຂຽວສາກົນ (GGGI) ປະຈຳ ສປປ ລາວ, ແລະ ບັນດາພາກສ່ວນທີ່ກ່ຽວຂ້ອງຈາກສູນກາງ ແລະ ຂະແໜງການທີ່ກ່ຽວຂ້ອງພ້ອມດ້ວຍບັນດາບໍລິສັດຈໍານວນໜຶ່ງເຂົ້າຮ່ວມ.
ຈຸດປະສົງ ຂອງ ກອງປະຊຸມໃນຄັ້ງນີ້ ແມ່ນເພື່ອ 1) ເຜີຍແຜ່ແຜນການ ແລະ ລະບຽບການຂອງລັດຖະບານ ກ່ຽວກັບ ຕະຫຼາດກາກບອນ, ຍົກລະດັບຄວາມຮັບຮູ້ຂອງຄູ່ຮ່ວມມືສອງຝ່າຍ ແລະ ຫຼາຍຝ່າຍ ລວມທັງ ຜູ້ພັດທະນາໂຄງການເພື່ອການປະສານງານທີ່ດີໃນການເຂົ້າຮ່ວມຕະຫຼາດ; 2) ເປີດໂອກາດໃຫ້ຄູ່ຮ່ວມມືສອງຝ່າຍ ໄດ້ແລກປ່ຽນແນວທາງຍຸດທະສາດຂອງຕົນກ່ຽວກັບການຊື້-ຂາຍກາກບອນ ລະຫວ່າງປະເທດພາຍໃຕ້ສັນຍາປາຣີ ເພື່ອຮັບປະກັນການເຄື່ອນໄຫວຂອງຕະຫຼາດ; 3) ເປີດໂອກາດໃຫ້ຜູ້ພັດທະນາໂຄງການ ໃນການສະແດງຜົນງານ ແລະ ພົບປະກັບພາກສ່ວນຕ່າງໆ ເພື່ອອຳນວຍຄວາມສະດວກໃຫ້ແກ່ການເຄື່ອນໄຫວຂອງຕະຫຼາດ; 4) ເປີດໂອກາດໃຫ້ພາກສ່ວນກ່ຽວຂ້ອງທີ່ມີຄວາມສົນໃຈ ໄດ້ປຶກສາຫາລືກັນກ່ຽວກັບໂອກາດ, ສິ່ງທ້າທາຍ ແລະ ອຸປະສັກຕ່າງໆ. ລວມທັງບົດຮຽນທີ່ຖອດຖອນໄດ້ ເພື່ອສາມາດເຊື່ອມສານເຂົ້າໃນການພັດທະນານະໂຍບາຍໃນອະນາຄົດ.
ໃນໂອກາດນີ້ກອງປະຊຸມໄດ້ຮັບຟັງ ການປະກອບຄໍາຄິດຄໍາເຫັນ ແລະ ຕັ້ງຄໍາຖາມ ແລກປ່ຽນຄໍາເຫັນເຊິ່ງກັນ ພ້ອມດ້ວຍໃຫ້ທັດສະນະດ້ານຂໍ້ມູນ, ຂໍ້ແນະນໍາ ຮ່ວມກັນ ຢ່າງຕັ້ງໜ້າ, ລວມທັງໃຫ້ຂໍ້ສັງເກດ ຕໍ່ກອງປະຊຸມເຜີຍແຜ່ວຽກງານສິນເຊື່ອກາກບອນ ແລະ ຕະຫຼາດສິນເຊື່ອກາກບອນ ໃນຄັ້ງນີ້ ໃຫ້ມີບັນຍາກາດທີ່ຟົດຟື້ນ. ໃນທ້າຍກອງປະຊຸມ ທ່ານປະທານ ກໍ່ໄດ້ສະຫຼູບ ແລະ ຮຽກຮ້ອງມາຍັງ ບັນດາທ່ານທັງໝົດ ຈົ່ງພ້ອມກັນຢ່າງຕັ້ງໜ້າ, ເອົາໃຈໃສ່ຮ່ວມກັນໃນການຫຼູດຜ່ອນການປ່ອຍທາດອາຍເຮືອນແກ້ວ ອອກສູ່ບັນຍາກາດ ພ້ອມກັບສົ່ງເສີມ ແລະ ຄຸ້ມຄອງ ການຊື້-ຂາຍສິນເຊື່ອກາກບອນ ໃຫ້ເປັນລະບົບລວມສູນ ແລະ ເປັນການສົ່ງເສີມຕະຫຼາດກາກບອນ ພາຍໃນປະເທດ ໃຫ້ມີຄວາມເປັນລະບຽບ, ຊັດເຈນ, ໂປ່ງໃສ ແລະ ເຂົ້າໃຈງ່າຍຍິ່ງຂຶ້ນ, ພ້ອມທັງ ເປັນເຄື່ອງມື ໃຫ້ລັດຖະບານ ສາມາດຄຸ້ມຄອງ ການຊື້-ຂາຍສິນເຊື່ອກາກບອນ ທັງຕະຫຼາດພາຍໃນ ແລະ ສາກົນໃນຕໍ່ໜ້າ.
ທີ່ມາ: ກຊສ
