ກອງປະຊຸມໂຄສະນາເພື່ອສົ່ງເສີມໂພສະນາການຂອງແມ່-ເດັກແລະການລ້ຽງດູເດັກອ່ອນ ແລະ ເດັກນ້ອຍ ຈັດຂຶ້ນໃນຕອນເຊົ້າ ວັນທີ 5 ກັນຍາ 2023 ຫ້ອງວ່າການເມືອງວັງວຽງ ແຂວງວຽງຈັນ ມີ ທ່ານ ສຳພັນ ມະນີຈັນ ຮອງຫົວຫນ້າ ພະແນກ ຖວທ ແຂວງວຽງຈັນ ທ່ານ ສົມສະຫວາດ ພົງສາ, ຫົວຫນ້າກົມສື່ມວນຊົນກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ທ່ານ ໄຊມ້ອນ ນາເຊີ້ ຫົວຫນ້າພະແນກໂຄສະນາ ແລະ ສື່ສານມວນຊົນຂອງອົງການຢູນີເຊັບ ປະຈໍາ ສປປ ລາວ ມີວິຊາການຈາກສູນໂພຊະນາການ ແລະ ສູນສະຖິຕິ ແລະ ຂໍ້ມູນຂ່າວສານກະຊວງສາທາລະນະສຸກ, ຄະນະອໍານວຍການວິທະຍຸ-ໂທລະພາບ, ສື່ມວນຊົນ ຈາກສູນກາງ ແລະແຂວງຕ່າງໆທົ່ວປະເທດເຂົ້າຮ່ວມ.
ທ່ານ ສົມສະຫວາດ ພົງສາ, ຫົວຫນ້າກົມສື່ມວນຊົນ ກະຊວງຖະແຫຼງຂ່າວ,ວັດທະນະທຳ ແລະທ່ອງທ່ຽວ ກ່າວວ່າ : “ຈຸດປະສົງກອງປະຊຸມຄັ້ງນີ ເພື່ອສົນທະນາວິທີການທີ່ມີປະສິດຕິຜົນໃນການເຜີຍແຜ່ຂໍ້ມູນຂ່າວສານ ກ່ຽວກັບໂພຊະນາການແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ຜ່ານສື່ຕ່າງໆລວມທັງວິທະຍຸ-ໂທລະພາບ ແລະສື່ສັງຄົມອອນລາຍ ເພື່ອເພີ່ມທະວີການຄຸ້ມຄອງຂອງ ໂພຊະນາການແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ.
ພວກເຮົາຫວັງວ່າການມີສ່ວນຮ່ວມຂອງສື່ມວນຊົນຈະປະກອບສ່ວນຢ່າງມີປະສິດທິຜົນເຂົ້າໃນການຊຸກຍູ້ການປ່ຽນແປງພຶດຕິກຳ ດ້ານການກິນຢູ່ເພື່ອໃຫ້ມີໂພຊະນາການທີ່ດີໃນທົ່ວປະເທດ ໃຫ້ເດັກມີສຸຂະພາບສົມບູນແຂງແຮງ.
ທ່ານ ໄຊມ້ອນ ນາເຊີ້, ຫົວຫນ້າ ພະເເນກສື່ສານ ຂອງ ອົງການຢູນິເຊັບ ປະຈຳ ສປປ ລາວ, ກ່າວວ່າ: ” ສື່ມວນຊົນສາມາດໃຫ້ທັງຄວາມຮູ້ເເກ່ຊຸມຊົນ,ເສີມສ້າງຄວາມເຂົ້າໃຈ ແລະຊຸກຍູ້ການປະຕິບັດຕົວຈິງໃນຊຸມຊົນ. ໃນຂະນະທີ່ພວກເຮົາວາງເເຜນວຽກງານໂພຊະນາການ, ສື່ມວນຊົນຍັງຈະສືບຕໍ່ເປັນພັນທະມິດທີ່ສຳຄັນໃນການເຜີຍແຜ່ຍຸດທະສາດ ທີ່ອີງໃສ່ຫຼັກຖານເພື່ອຊ່ວຍໃຫ້ພວກເຮົາສາມາດເພີ່ມທະວີຄວາມພະຍາຍາມຂອງພວກເຮົາໃນການສ້າງການປ່ຽນເເປງທີ່ມີຄວາມໝາຍໃນຊີວິດ ເເລະ ໂພຊະນາການຂອງເດັກນ້ອຍໃນທົ່ວ ສປປລາວ”
ນອກຈາກກອງປະຊຸມນີ້ເເລ້ວ, ທີມງານສື່ມວນຊົນໄວໜຸ່ມລາວ, ພາຍໃຕ້ການຊີ້ນຳຂອງວິທະຍຸກະຈາຍສຽງແຫ່ງຊາດລາວ, ຍັງໄດ້ຈັດງານປຶກສາຫາລືຮ່ວມກັບບັນດາໄວໜຸ່ມ ກ່ຽວກັບພຶດຕິກໍາການກິນຂອງໄວໜຸ່ມ, ເພື່ອກະກຽມໃຫ້ການຈັດງານດັ່ງກ່າວ ເຊິ່ງຈະຈັດຂຶ້ນໃນທ້າຍເດືອນກັນຍານີ້.
