ໃນວັນທີ 14 ສິງຫາ 2024, ທີ່ ໂຮງແຮມ Pan Pacific Singapore ໄດ້ຈັດກອງປະຊຸມໂຕະມົນ ລະຫວ່າງ ບັນດາທູດປະເທດ ອາຊຽນ ແລະ ປະເທດກຸ່ມ BRICS ປະຈໍາສິງກະໂປ (Roundtable between ASEAN and BRICS Heads of Mission) ໂດຍມີບັນດາທູດ, ຜູ້ຕາງໜ້າບັນດາສະຖານທູດຈາກປະເທດອາຊຽນ ແລະ ກຸ່ມ BRICS, ຜູ້ຊ່ຽວຊານ ແລະ ບັນດາແຂກຈາກພາກສ່ວນຕ່າງໆເຂົ້າຮ່ວມ 120 ທ່ານ. ກອງປະຊຸມດັ່ງກ່າວ ໄດ້ດໍາເນີນໄປພາຍໃຕ້ 3 ວາລະຄື: 1/ ຍຸດທະສາດໂລກເພື່ອການຄ້າ ແລະ ຄວາມໝັ້ນຄົງທາງດ້ານສະບຽງອາຫານທີ່ຍືນຍົງ (Global Strategies for Sustainable Trade and Food Security); 2/ ການດັດປັບພຶດຕິກໍາທາງການຄ້າໃຫ້ຍືນຍົງ (Aligning Sustainable Trade Practices)
3/ ສິ່ງທ້າທາຍໃນອະນາຄົດ ຂອງການຮ່ວມມື ໃຕ້-ໃຕ້ (Future Challenges and South-South Collaboration). ພະນະທ່ານ ແສງແກ້ວ ປວງປະດິດ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສິງກະໂປ, ໃນນາມປະທານ ASEAN 2024 ແລະ ພະນະທ່ານ Nikolay Rishatovich KUDASHEV, ເອກອັກຄະລັດຖະທູດແຫ່ງ ສະ ຫະພັນຣັດເຊຍ ປະຈໍາ ສິງກະໂປ ໃນນາມປະທານ BRICS 2024 ໄດ້ຮັບກຽດຂຶ້ນກ່າວເປີດພິທີຢ່າງເປັນທາງການ ແລະ ປະກອບຄໍາເຫັນໃນວາລະທີ 1.
ບັນດາຜູ້ແທນກອງປະຊຸມ ໄດ້ແລກປ່ຽນຄວາມຄິດເຫັນຢ່າງກົງໄປກົງມາ ແລະ ສ້າງສັນ ຕາມວາລະຂອງກອງປະຊຸມ ໂດຍໄດ້ຍົກໃຫ້ເຫັນຄວາມໝາຍຄວາມສໍາຄັນ ຂອງ ການຄ້າທີ່ຍືນຍົງ ແລະ ຄວາມໝັ້ນຄົງທາງດ້ານສະບຽງອາຫານ, ການກໍານົດນະໂຍບາຍ, ຍຸດທະສາດ ແລະ ມາດຕະການທີ່ມີປະສິດທິພາບ ແລະ ເປັນຮູບປະທໍາ ຮ່ວມກັນ ລະຫວ່າງບັນດາປະເທດຕ່າງໆໃນໂລກ ໂດຍສະເພາະ ການຮ່ວມມືລະຫວ່າງ ບັນດາປະເທດອາຊຽນ ແລະ ກຸ່ມ BRICS, ອົງການຈັດຕັ້ງພາກພື້ນ ແລະ ສາກົນອື່ນໆ ເພື່ອເພີ່ມທະວີການຜະລິດສະບຽງອາຫານ ແລະ ຮັບປະ ກັນດ້ານໂພສະນາການ, ການປົກປ້ອງ ແລະ ຮັບປະກັນຕ່ອງໂສ້ການສະໜອງດ້ານສະບຽງອາຫານ ດ້ວຍຮູບການຕ່າງໆ, ການຮັບປະກັນສັນຕິພາບ ແລະ ສະຖຽນລະພາບ ກໍ່ຄື ຄວາມຕັດສິນໃຈທາງການເມືອງ ຂອງບັນດາປະເທດຕ່າງໆ ແລະ ອື່ນໆ ໂດຍຖືເປັນເງື່ອນໄຂພື້ນຖານເພື່ອຮັບປະກັນໃຫ້ແກ່ການຄ້າ ແລະ ຄວາມໝັ້ນຄົງດ້ານສະບຽງອາ ຫານ ທີ່ຍືນຍົງ, ໃນຂະນະດຽວກັນ ກໍ່ເສີມຂະຫຍາຍການຮ່ວມມື ແລະ ການປະສານງານສາກົນ ເພື່ອຮັບມືກັບສິ່ງທ້າທາຍຕ່າງໆໃນອະນາຄົດ ລວມທັງໂດຍຜ່ານຂອບການຮ່ວມມື ໃຕ້-ໃຕ້ ເພື່ອປະກອບສ່ວນເຂົ້າໃນການບັນລຸວາລະ 2030 ຂອງອົງການສະຫະປະຊາຊາດ ກ່ຽວກັບ ການພັດທະນາແບບຍືນຍົງ ກໍ່ຄື ສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການຮ່ວມມືເພື່ອການພັດທະນາແບບຍືນຍົງ ຂອງບັນດາປະຊາຊາດໃນໂລກ.
ໃນການປະກອບຄໍາເຫັນຕໍ່ກອງປະຊຸມ, ພະນະທ່ານ ແສງແກ້ວ ປວງປະດິດ, ເອກ ອັກຄະລັດຖະທູດ ແຫ່ງ ສປປ ລາວ ໄດ້ຍົກໃຫ້ເຫັນແນວທາງນະໂຍບາຍ ຂອງພັກ ແລະ ລັດຖະບານ ສປປ ລາວ ທີ່ກ່ຽວຂ້ອງ ໂດຍສະເພາະແມ່ນການຈັດຕັ້ງປະຕິບັດເນື້ອໃນຈິດໃຈ ຂອງແຜນພັດທະນາເສດຖະກິດ-ສັງຄົມແຫ່ງຊາດ 2021-2025, ເຊິ່ງສຸມໃສ່ການສ້າງລະບົບສະ ບຽງອາຫານທີ່ຍືນ ໂດຍຖືເອົາຄວາມໝັ້ນຄົງດ້ານສະບຽງອາຫານ ແລະ ໂພສະນາການ ເປັນເປົ້າໝາຍຕົ້ນຕໍ; ການດໍາເນີນການປະຕິຮູບລະບົບສະບຽງອາຫານ ທີ່ກວມເອົາຫຼາຍຂົງເຂດເຊັ່ນ: ກະສິກໍາ ແລະ ປ່າໄມ້, ສາທາລະນະສຸກ, ການສຶກສາ, ການຄ້າ, ການປົກປ້ອງສັງຄົມ ແລະ ສິ່ງແວດລ້ອມ ໃນເຂດຕົວເມືອງ ແລະ ຊົນນະບົດ ເພື່ອຮັບປະກັນສະບຽງອາຫານທີ່ປອດໄພ ແລະ ມີໂພສະນາການສໍາລັບໝົດທຸກຄົນ, ຊຸກຍູ້ການຜະລິດສະບຽງອາຫານທີ່ເປັນມິດຕໍ່ສິ່ງແວດ ລ້ອມໃຫ້ໄດ້ຢ່າງພຽງພໍ, ຍົກສູງຊີວິດການເປັນຢູ່ໃຫ້ມີຄວາມເທົ່າທຽມ ແລະ ສ້າງຄວາມເຂັ້ມແຂງເພື່ອຕ້ານ ທານກັບຄວາມອ່ອນໄຫວ, ຄວາມສ່ຽງຈາກການກະ ທົບກະທັນຫັນ ແລະ ແຮງກົດດັນຕ່າງໆ ທີ່ອາດເກີດຂຶ້ນກັບລະ ບົບສະບຽງອາຫານ ຂອງ ສປປ ລາວ ເພື່ອເຮັດໃຫ້ລະບົບສະບຽງອາຫານຂອງ ສປປ ລາວ ມີຄວາມຍືນຍົງ.
ຄຽງຄູ່ກັບການຈັດກອງປະຊຸມໂຕະມົນຄັ້ງນີ້ ຍັງໄດ້ມີການຈັດງານວາງສະແດງ ກ່ຽວກັບ ອາຫານພື້ນເມືອງ ແລະ ເຄື່ອງດື່ມ ຂອງບັນດາປະເທດທີ່ເຂົ້າຮ່ວມ ເພື່ອເປັນການແລກປ່ຽນດ້ານວັດທະນະທໍາໃຫ້ແກ່ຜູ້ເຂົ້າຮ່ວມ ໄດ້ຮຽນຮູ້ ທາງດ້ານວັດທະນະທໍາ ແລະ ລົດຊາດອາຫານທີ່ຫຼາກຫຼາຍ ຂອງກັນ ແລະ ກັນ. ສະເພາະ ສະຖານທູດລາວເຮົາກໍ່ໄດ້ນໍາເອົາ ຊາ ແລະ ກາເຟປາກຊ່ອງ ມາວາງສະແດງເພື່ອໃຫ້ແຂກໄດ້ດື່ມໄດ້ຊີມ ແລະ ເຫັນວ່າໄດ້ຮັບຄໍາຍ້ອງຍໍຊົມ ເຊີຍຈາກແຂກຈໍານວນຫລາຍວ່າ ຊາ ແລະ ກາເຟ ລາວເຮົາ ແຊບ ແລະ ມີຄຸນນະພາບດີຫລາຍ.
