ກອງປະຊຸມໃຫຍ່ຄັ້ງທີ່ VIII ຂອງອົງການພຸດທະສາສະໜາສຳພັນລາວ ແຂວງຫຼວງພະບາງ ໄດ້ໄຂຂື້ນ ໃນວັນທີ່ 8-9 ກັນຍາ2020 ທີ່ສະໂມສອນຂອງຫ້ອງວ່າການນະຄອນ ຫຼວງພະບາງ ມີພະຫຼັກແກ້ວມະຫາສຸເມນທາທິບໍດີ ພະອາຈານ ມະຫາບຸນມາ ສີມມາພົມ ຮັກສາການປະທານອົງການພຸດທະສາສະໜາສຳພັນລາວ (ອພສ), ພ້ອມດ້ວຍພະເຖລານຸເຖລະ ແລະຜູ້ແທນຟ່າຍສົງ ແລະຝ່າຍຄາລະວາດເຂົ້າຮ່ວມ.

ວາລະກອງປະຊຸມ ພະຣັກຄຳຣັດຕະນະບໍດີເຖຣະ ສາທຸ ອ່ອນແກ້ວ ກິດຕິພັດໂທ ກຳມະການສູນກາງແນວລາວສ້າງຊາດ, ກຳມະການສູນກາງອົງການພຸດທະສາສະໜາສຳພັນລາວ, ເຈົ້າຄະນະສົງ ອົງການພຸດທະສາສະໜາສຳພັນລາວ ແຂວງຫຼວງພະບາງ ໄດ້ກ່າວໄຂກອງປະຊຸມວ່າ: ກອງປະຊຸມຄັ້ງນີ້ ເພື່ອປະເມີນຜົນງານການເຄື່ອນໄຫວວຽກງານຂອງ ອົງການພຸດທະສາສະໜາສຳພັນລາວແຂວງຫຼວງພະບາງໃນ 5 ປີຜ່ານມາພ້ອມທັງຈະໄດ້ຮັບຟັງການປະກອບຄຳເຫັນ ຈາກພາກສ່ວນກ່ຽວຂ້ອງ ຂອງເມືອງ-ນະ ຄອນຕໍ່ວຽກງານອົງການພຸດທະສາສະໜາສຳພັນລາວແຂວງຫຼວງພະບາງ ແລະຈະມີການຮັບຮອງເອົາການປະກອບບຸກຄະລາກອນພຣະສົງ ອົງທີ່ມີຄວາມຮູ້ ຄວາມສາມາດ ແລະມີມາດຖານເງື່ອນໄຂຄົບຖ້ວນ ເຂົ້າເປັນຄະນະບໍລິຫານງານ ອົງການພຸດທະສາສະໜາສຳພັນລາວແຂວງຫຼວງພະບາງ ຕື່ມອີກ.

ຈາກນັ້ນ ຮອງເຈົ້າຄະນະສົງ ອົງການພຸດທະສາສະໜາສຳພັນລາວ ແຂວງຫຼວງພະບາງ ໄດ້ຂື້ນຜ່ານບົດສະຫຼຸບວຽກງານໃນ 5 ປີຜ່ານມາ ແລະທິດທາງແຜນການໃນ 5 ປີຕໍ່ໜ້າ, ເພື່ອໃຫ້ພາກສ່ວນກ່ຽວຂ້ອງທີ່ເຂົ້າຮ່ວມ ໄດ້ພ້ອມກັນປະກອບຄຳເຫັນ ຕໍ່ບົດສະຫຼຸບ ແລະທິດທາງແຜນການໃຫ້ມີເນື້ອໃນຄົບຖ້ວນ-ສົມບູນ.

Cr: ອາພຸດເດດ ບຸບຜາ

Loading...