ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫຍ່ຄັ້ງທີ VII ຂອງຜູ້ແທນອົງຄະນະພັກ ເມືອງ ແກ່ນທ້າວ ໄຂຂຶ້ນຢ່າງເປັນທາງການ

ກອງປະຊຸມໃຫຍ່ຄັ້ງທີ VII ຂອງອົງຄະນະພັກ ເມືອງ ແກ່ນທ້າວ, ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 21 ມັງກອນ 2020, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ອໍາຄາ ລັດສະໝີ, ວ່າການເລຂາພັກເມືອງ, ວ່າການເຈົ້າເມືອງ ແກ່ນທ້າວ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີຄະນະປະຈຳພັກແຂວງ, ປະທານສະພາປະຊາຊົນແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ ເຂົ້າຮ່ວມເກືອບ 200 ສະຫາຍ, ໃນນັ້ນມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 111 ສະຫາຍ, ຍິງ 13 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 1.460 ສະຫາຍ.

ໃນວາລະດໍາເນີນກອງປະຊຸມ ສະຫາຍ ອໍາຄາ ລັດສະໝີ ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງລາຍງານການເມືອງທັງສອງພາກຊຶ່ງໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ໂດຍຍົກໃຫ້ເຫັນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິບັດໜ້າວຽກງານຮອບດ້ານໄລຍະ 5 ປີຜ່ານມາ, ພ້ອມທັງໄດ້ກໍານົດທິດທາງ ແລະ ຄາດໝາຍສູ້ຊົນໃນຕໍ່ໜ້າ, 5 ປີຜ່ານມາທົ່ວເມືອງ ແມ່ນມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ໃນລະດັບ 8,2% ຕໍ່ປີ, ລວມຍອດຜະລິດຕະພັນພາຍໃນ ບັນລຸ 1.040,87 ຕື້ກີບ, ສະເລ່ຍລາຍຮັບຕໍ່ຫົວຄົນບັນລຸໄດ້ 24,52 ລ້ານກີບ, ຫຼືເທົ່າກັບ 2.885 ໂດລາ, ທຽງໃສ່ຄາດໝາຍປະຕິບັດໄດ້ 94,11%, ເພີ່ມຂຶ້ນ 870 ໂດລາ, ເທົ່າກັບ 32,12%, ການຜະລິດຂອງຊາວກະສິກອນໄດ້ຫັນປ່ຽນວິທີການຜະລິດແບບທໍາມະຊາດ, ພໍຢູ່ພໍກິນ ໄປສູ່ການຜະລິດເປັນສິນຄ້າຢ່າງກວ້າງຂວາງ, ເຮັດໃຫ້ມີຫຼາຍປັດໃຈໄດ້ເກີດຂຶ້ນ ເຊິ່ງສາມາດຕອບສະໜອງສະບຽງອາຫານໃຫ້ສັງຄົມຢ່າງພຽງພໍ, ອັນພົ້ນເດັ່ນແມ່ນໄດ້ມີຕົວແບບການຜະລິດເປັນສິນຄ້າເຊັ່ນ: ການປູກພືດເພື່ອສົ່ງອອກ ເປັນຕົ້ນແມ່ນ: ສາລີ, ໝາກເດືອຍ,​ ໝາກງາ, ມັນຕົ້ນ, ຖົ່ວຕ່າງໆ ແລະ ພືດອື່ນໆ, ສ່ວນການລ້ຽງສັດໃຫຍ່ກໍ່ຫັນໄປສູ່ການລ້ຽງແບບເປັນກຸ່ມເປັນຟາມຕິດພັນກັບການປູກຫຍ້າ, ໄດ້ຂະຫຍາຍຕາໜ່າງການສຶກສາລົງສູ່ຊົນນະບົດ, ແກ້ໄຂໄດ້ສະພາບນັກຮຽນອອກໂຮງຮຽນກາງປີ, ສ້າງໂອກາດໃຫ້ຜູ້ດ້ວຍໂອກາດຢູ່ຊົນນະບົດໄດ້ເຂົ້າຮຽນຢ່າງທົ່ວເຖິງ, ພ້ອມທັງສ້າງເປັນບ້ານສາທາລະນະສຸກແບບຢ່າງໄດ້ 100%, ຮັບຮອງເປັນບ້ານວັດທະນະທໍາ 97,87%, ບ້ານພັດທະນາ 72,34%, ຮອດປະຈຸບັນຄອບຄົວຄວາມທຸກຍາກຕາມດໍາລັດ 309, ຍັງ 2 ຄອບຄົວ, ເທົ່າກັບ 0,02%, ຈາກນັ້ນຜູ້ແທນກອງປະຊຸມຍັງຈະໄດ້ພ້ອມກັນຄົ້ນຄົ້ວ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກຄັ້ງທີ VII, ຄັດເລືອກເອົາຄະນະບໍລິຫານງານພັກເມືອງຊຸດໃໝ່, ຮັບຟັງການປະກອບຄໍາຄິດຄໍາເຫັນຂອງບັນດາຫ້ອງການ, ກົມກອງ ແລະ ຕົວແບບດ້ານຕ່າງໆ, ກອງປະຊຸມຍັງຈະໄດ້ຮັບຟັງການໂອ້ລົມຂອງ ສະຫາຍ ເລຂາພັກແຂວງ ແລະ ຈະໄດ້ດຳເນີນໄປເປັນເວລາ 2 ວັນຈຶ່ງຈະສຳເລັດ.

 

ຂ່າວ-ພາບໂດຍ: ອຸ່ນເຮືອນ ໂພທິລັກ ນັກຂ່າວ ຫ້ອງວ່າການ

ແຂວງ ໄຊຍະບູລີ