ພ້ອມກັບຜົນສຳເລັດຂອງກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກຄອມມູນິດຫວຽດນາມໄດ້ໄຂຂຶ້ນຢູ່ນະຄອນຫຼວງຮ່າໂນ້ຍ ພາຍໄຕ້ຄຳຂວັນຄຳຂວັນທີ່ວ່າ: “ ຄວາມສາມັກຄີ – ປະຊາທິປະໄຕ – ມີລະບຽບວິໄນ – ການປະດິດສ້າງ – ການພັດທະນາ ”. ລວມຍອດຜະລິດຕະພັນພາຍໃນ (GDP) ເພີ່ມຂື້ນ 13 ເທົ່າພາຍຫຼັງ 35 ປີແຫ່ງການປ່ຽນແປງໃໝ່ ກອງປະຊຸມໃຫຍ່ຂອງພັກຄອມມູນິດຫວຽດນາມຄັ້ງນີ້ເປັນຂີດໝາຍ ແລະ ບາດກ້າວສຳຄັນໃນການປ່ຽນແປງໃໝ່ ເພື່ອເປັນທິດທາງໃຫ້ແກ່ສະໄໝຕໍ່ໄປ ໃນການປະຕິບັດໃຫ້ໄດ້ຮັບໄຊຊະນະ ກ່ຽວກັບເປົ້າໝາຍຍຸດທະສາດໃນການພັດທະນາ ປະເທດຊາດ ເຖິງປີ 2030 ແລະ ວິໄສທັດເຖິງປີ 2045. ພາຍຫຼັງ 35 ປີແຫ່ງການປະຕິບັດນະໂຍບາຍປ່ຽນແປງໃໝ່, 30 ປີແຫ່ງການປະຕິບັດແຜນຍຸດທະສາດການສ້າງສາປະເທດຊາດໃນໄລຍະຫັນປ່ຽນໄປສູ່ສັງຄົມນິຍົມ, ທິດສະດີກ່ຽວກັບເສັ້ນທາງປ່ຽນແປງໃໝ່, ກ່ຽວກັບລັດທິສັງຄົມນິຍົມ ແລະເສັ້ນທາງກ້າວສູ່ສັງຄົມນິຍົມຢູ່ຫວຽດນາມ ກໍາລັງໄດ້ຮັບການປັບປຸງ ແລະ ກ້າວເຂົ້າສູ່ຄວາມຈິງເທື່ອລະກ້າວ. ຫວຽດນາມໄດ້ຮັບຜົນສຳເລັດອັນໃຫຍ່ຫຼວງ, ມີຄວາມໝາຍທາງປະຫວັດສາດ, ໄດ້ຮັບການພັດທະນາຢ່າງແຂງແຮງແລະຮອບດ້ານກ່ວາເມື່ອທຽບໃສ່ໄລຍະກ່ອນການປະຕິບັດນະໂຍບາຍການປ່ຽນແປງໃໝ່. ລະດັບເສດຖະກິດຈາກ 27 ຕື້ໂດລາສະຫະລັດໃນປີ 1986 ໄດ້ເພີ່ມຂຶ້ນ 13 ເທົ່າເຖິງ 343 ຕື້ໂດລາສະຫະລັດ, ລວມຍອດຜະລິດຕະພັນພາຍໃນ (GDP) ສະເລ່ຍໃສ່ຫົວຄົນບັນລຸ 3,521 ໂດລາສະຫະລັດໃນທ້າຍປີ 2020. ໃນສະໄໝ XII ທີ່ຜ່ານມາ, ເປັນເວລາ 4 ປີຕິດຕໍ່ກັນ, ແຕ່ປີ 2016 – 2019, ຫວຽດນາມໄດ້ຢືນຢູ່ໃນອັນດັບ 10 ຂອງບັນດາປະເທດທີ່ເຕີບໃຫຍ່ສູງທີ່ສຸດໃນໂລກ, ແມ່ນໜຶ່ງໃນ 16 ປະເທດມີເສດຖະກິດພົ້ນເດັ່ນທີ່ສຸດ. ໂດຍສະເພາະ, ໃນປີ 2020 ທີ່ຜ່ານມາ, ໃນຂະນະທີ່ປະເທດສ່ວນໃຫຍ່ປະສົບກັບການເຕີບໃຫຍ່ທາງລົບ ຫຼື ຕົກເຂົ້າສູ່ສະພາວະຖົດຖອຍຍ້ອນຜົນກະທົບຈາກການລະບາດຂອງ COVID-19, ເສດຖະກິດຂອງຫວຽດນາມຍັງມີການເຕີບໂຕໃນທາງບວກ 2,91% ຍ້ອນການສະກັດກັ້ນຢ່າງທັນການ, ການຄວບຄຸມໂດຍພື້ນຖານ ແລະການປ້ອງກັນການແຜ່ລະບາດຂອງພະຍາດ COVID-19 ໃນເຂດຊຸມຊົນໄດ້ເປັນຢ່າງດີ ເຊິ່ງປະກອບສ່ວນເຮັດໃຫ້ GDP ໃນໄລຍະ 2016-2020 ເພີ່ມຂື້ນໂດຍສະເລ່ຍ 5,9%/ປີ, ເປັນໜຶ່ງໃນກຸ່ມປະເທດທີ່ມີລະດັບການເຕີບໂຕສູງທີ່ສຸດໃນພາກພື້ນ ແລະ ໃນໂລກ. ດ້ວຍຜົນສຳເລັດດັ່ງກ່າວ, ຫວຽດນາມໄດ້ຮັບການຍອມຮັບຈາກທົ່ວໂລກວ່າ: ເປັນຈຸດພົ້ນເດັ່ນໃນການຈັດຕັ້ງປະຕິບັດ ” ເປົ້າໝາຍຄູ່ ” ທັງຄວບຄຸມ ແລະ ປ້ອງກັນພະຍາດລະບາດ COVID-19 ຢ່າງສຳເລັດຜົນ; ທັງຟື້ນຟູ ແລະ ພັດທະນາເສດຖະກິດ, ຮັບປະກັນຊີວິດແລະ ຄວາມປອດໄພຂອງປະຊາຊົນ. ຄຽງຄູ່ກັນນັ້ນ, ວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນສືບຕໍ່ບັນລຸໄດ້ບັນດາໝາກຜົນມີ່ສຳຄັນ, ໂດຍພິເສດ, ໃນປີ 2020, ຫວຽດນາມໄດ້ປະຕິບັດສຳເລັດບົດບາດເປັນປະທານສະມາຄົມອາຊຽນ (ASEAN) ແລະ ກໍາລັງມີການເຄື່ອນໄຫວເພື່ອປະກອບສ່ວນຢ່າງຕັ້ງໜ້າ ໃນຖານະເປັນສະມາຊິກບໍ່ປະຈໍາຂອງສະພາຄວາມໝັ້ນຄົງສະຫະປະຊາຊາດ ໄລຍະ2020-2021. * ສືບຕໍ່ນຳພາປະເທດຊາດກ້າວສູ່ສັງຄົມນິຍົມ ເພື່ອສູ້ຊົນໃນກາງສະຕະວັດທີ XXI, ຫວຽດນາໄດ້ກາຍເປັນປະເທດທີ່ພັດທະນາ, ປະຕິບັດຕາມແນວທາງສັງຄົມນິຍົມ, ໃນກອງປະຊຸມໃຫຍ່ຄັ້ງນີ້, ບັນດາຜູ້ແທນສຸມໃສ່ຄົ້ນຄ້ວາ, ປຶກສາຫາລື ແລະ ຮັບຮອງເອົາບົດລາຍງານສະຫລຸບ ການປະຕິບັດ ມະຕິ ຂອງ ກອງປະຊຸມໃຫຍ່ ຄັ້ງທີ XII ໄປຄຽງຄູ່ກັບ ການຕິລາຄາ ໃນໄລຍະ 35 ປີ ໃນການດຳເນີນການ ປ່ຽນແປງໃໝ່, 30 ປີ ແຫ່ງການ ປະຕິບັດເປົ້າໝາຍ ໃນປີ 1991 ແລະ 10 ປີ ການດຳເນີນ ປະຕິບັດ (ການເພີ່ມຕື່ມ, ການພັດທະນາ ໃນປີ 2011), ຍຸດທະສາດ ການພັດທະນາ ເສດຖະກິດ-ສັງຄົມ ໃນໄລຍະ 10 ປີ ຄື ປີ 2011-2020; ການສະເໜີ ທິດທາງ, ໜ້າທີ່ການພັດທະນາ ເສດຖະກິດ-ສັງຄົມ ໃນໄລຍະ 5 ປີ ຄື ປີ 2021-2025 (ເພື່ອລະນຶກເຖິງ 50 ປິ ແຫ່ງການ ປົດປ່ອຍພາກໃຕ້ຫວຽດນາມ, ຄວາມເອກະພາບທົ່ວປະເທດ), ການກຳນົດ ເປົ້າໝາຍ, ທິດທາງ ເຖິງປີ 2030( ເພື່ອລະນຶກເຖິງ 100 ປີ ແຫ່ງການສ້າງຕັ້ງພັກຄອມມູນິດຫວຽດນາມ) ແລະ ວິໄສທັດ ໃນການພັດທະນາ ປະເທດຊາດເຖິງ ປີ 2045 (ເພື່ອລະນຶກເຖິງ 100 ປີ ແຫ່ງການສ້າງຕັ້ງປະເທດຫວຽດນາມ ສາທາລະນະລັດ ປະຊາທິປະໄຕ ຫວຽດນາມ ເຊິ່ງປະຈຸບັນ ແມ່ນສາທາລະນະລັດ ສັງຄົມນິຍົມຫວຽດນາມ). ເຊື່ອໝັ້ນວ່າ, ພາຍໃຕ້ການນຳພາ ແລະ ຊີ້ນຳອັນສະຫຼາດສ່ອງໃສ, ຖຶ້ກຕ້ອງ ແລະ ປະດິດສ້າງຂອງຕົນ, ພັກກອມມູນິດຫວຽດນາມຈະຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຢ່າງສຳເລັດຜົນ; ສືບຕໍ່ນຳພາທົ່ວກອງທັບ ແລະ ທົ່ວປວງຊົນຫວຽດນາມ ນຳເອົາຜົນສຳເລັດທີ່ບັນລຸໄດ້ໃນຊຸມປີມໍ່ໆມານີ້, ປະຕິບັດສຳເລັດທຸກເປົ້າໝາຍທີ່ວາງອອກ ເພື່ອສ້າງປະເທດຫວຽດນາມໃຫ້ຮັ່ງມີ, ເຂັ້ມແຂງ, ສັງຄົມຍຸຕິທຳ ແລະ ມີຄວາມສີວິໄລ ເພື່ອຄວາມຜາສຸກຂອງປະຊາຊົນ; ສ້າງເປັນບ່ອນອີງເພື່ອກ້າວສູ່ລັດທິສັງຄົມນິຍົມ.

   

ໃນຖານະເປັນສອງປະເທດບ້ານໃກ້ເຮືອນຄຽງທີ່ມີພູຜາ ແລະ ແມ່ນ້ຳຕິດກັນ, ສາຍພົວພັນມິດຕະພາບອັນພິເສດລະຫວ່າງລາວ – ຫວຽດນາມໄດ້ຜ່ານຜ່າສິ່ງທ້າທາຍຫຼາຍຢ່າງ, ເຕັມໄປດ້ວຍການເສຍສະຫຼະ ແລະ ຄວາມລຳບາກ. ພວກເຮົາມີຄວາມພາກພູມໃຈເມື່ອຮູ້ວ່າ, ໃນຫຼາຍທົດສະວັດ, ສອງພັກ, ສອງລັດ ແລະ ປະຊາຊົນຂອງສອງປະເທດລາວ ແລະ ຫວຽດນາມ ຍາມໃດກໍ່ຢືນຄຽງບ່າຄຽງໄຫຼ່ໃນການຕໍ່ສູ້ຕ້ານຈັກກະພັດຕ່າງປະເທດເພື່ອຍາດເອົາເອກະລາດແຫ່ງຊາດ ແລະ ສືບຕໍ່ຮ່ວມແຮງຮ່ວມໃຈໃນພາລະກິດສ້າງສາລັດທິສັງຄົມນິຍົມ. ໃນຕະຫຼອດໄລຍະ 45 ປີແຫ່ງການສ້າງສາແລະພັດທະນາປະເທດຊາດໂດຍສັນຕິວິທີ, ສອງພັກ ແລະ ສອງປະເທດສືບຕໍ່ມີການຮ່ວມມືຮອບດ້ານໃນທຸກຂົງເຂດ. ສອງຝ່າຍຈັດຕັ້ງຄະນະຜູ້ແທນໄປຢ້ຽມຢາມເຊິ່ງກັນແລະກັນຢ່າງເປັນປະຈຳ, ຮ່ວມມືກັນຢ່າງແໜ້ນແຟ້ນໃນຂົງເຂດທິດສະດີ ແລະ ພາກປະຕິບັດຕົວຈິງ; ສອງປະເທດຍັງໄດ້ປຶກສາຫາລືແລະຮ່ວມມືກັນຢ່າງເປັນປະຈຳ ໃນວຽກງານການປ້ອງກັນຄວາມສະຫງົບ ແລະ ການປ້ອງກັນປະເທດ; ກ່ຽວກັບດ້ານເສດຖະກິດ, ການລົງທຶນ ແລະ ການຄ້າ, ຫວຽດນາມແມ່ນໜຶ່ງໃນບັນດາປະເທດລົງທຶນໃຫຍ່ທີ່ສຸດ, ຢືນຢູ່ອັນດັບທີ 3 ຂອງລາວດ້ວຍຍອດຈຳນວນທຶນຈົດທະບຽນຫຼາຍກວ່າ 4 ຕື້ USD. ໂດຍສະເພາະ, ໃນກອງປະຊຸມຄັ້ງທີ 43 ປີ 2021 ຂອງຄະນະກຳມະການຮ່ວມມືລະຫວ່າງລັດຖະບານລາວ – ຫວຽດນາມໄດ້ຈັດຂຶ້ນຢູ່ນະຄອນຫຼວງຮ່າໂນ້ຍໃນເດືອນທັນວາປີ 2020, ສອງຝ່າຍໄດ້ລົງນາມໃນເອກະສານຮ່ວມມື 17 ສະບັບ, ເຊິ່ງໃນນັ້ນມີເອກະສານທີ່ສຳຄັນຫຼາຍສະບັບເຊັ່ນ: ອະນຸສັນຍາລະຫວ່າງລັດຖະບານລາວ ແລະ ຫວຽດນາມວ່າດ້ວຍການຮ່ວມມືພັດທະນາທ່າເຮືອຫວຸງແອງ 1, 2, 3; ບົດບັນທຶກຄວາມເຂົ້າໃຈ ລະຫວ່າງກະຊວງໂຍທາທິການ ແລະ ຂົນສົ່ງລາວ ແລະ ກະຊວງຄົມມະນາຄົມຂົນສົ່ງຫວຽດນາມກ່ຽວກັບການພັດທະນາທາງລົດໄຟລາວ – ຫວຽດນາມ; ໂຄງການປັບປຸງຄຸນະພາບ ແລະ ປະສິດທິຜົນຂອງການຮ່ວມມືລາວ – ຫວຽດນາມໃນຂົງເຂດການກໍ່ສ້າງ ແລະ ພັດທະນາຊັບພະຍາກອນມະນຸດໃນໄລຍະປີ 2021-2030 ແລະ ບົດບັນທຶກຄວາມເຂົ້າໃຈຫຼາຍສະບັບກ່ຽວກັບການຊື້ໄຟຟ້າຈາກລາວຂອງຫວຽດນາມ ເຊິ່ງສ້າງບ່ອນອີງໃໝ່ ບໍ່ພຽງແຕ່ຊ່ວຍໃຫ້ເສດຖະກິດຂອງລາວພັດທະນາຢ່າງໝັ້ນຄົງໃນຊຸມປີຕໍ່ໜ້າ, ແຕ່ຍັງຈະເຮັດໃຫ້ສາຍພົວພັນລະຫວ່າງສອງປະເທດແໜ້ນແຟ້ນຍິ່ງຂຶ້ນ. ມາຮອດປະຈຸບັນ, ສາມາດຢືນຢັນໄດ້ວ່າ, ຜ່ານການທົດລອງຫຼາຍທົດສະວັດ, ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານພາຍໃຕ້ການນຳພາຂອງພັກປະຊາຊົນປະຕິວັດລາວແລະພັກຄອມມູນິດຫວຽດນາມບໍ່ພຽງແຕ່ໄດ້ຮັບການຮັກສາໄວ້ເປັນຢ່າງດີ, ແຕ່ຍັງໄດ້ຮັບການເພີ່ມພູມຄູນສ້າງຢ່າງບໍ່ຢຸດຢັ້ງ, ພັດທະນາຢ່າງເລິກເຊິ່ງ, ແທ້ຈິງ ແລະ ມີປະສິດທິຜົນໃນທຸກຂົງເຂດ, ນຳເອົາຜົນປະໂຫຍດຕົວຈິງມາສູ່ປະຊາຊົນຂອງສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

Loading...