ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫຍ່ຜູ້ແທນອົງຄະນະພັກ ປ້ອງກັນຄວາມສະຫງົບແຂວງຈຳປາສັກ ຄັ້ງທີ III ໄຂຂຶ້ນຢ່າງເປັນທາງການ

ກອງປະຊຸມໃຫຍ່ຜູ້ແທນອົງຄະນະພັກ ປກສ ຄັ້ງທີ III ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 3 ກຸມພາ 2020 ນີ້ ຢູທີ່ກອງບັນຊາການ ປກສ ແຂວງຈຳປາສັກ. ໂດຍໃຫ້ກຽດເຂົ້າຮ່ວມຂອງ ສະຫາຍ ບຸນຖອງ ດີວິໄຊ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງໆຈຳປາສັກ, ມີສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ພັນເອກ ຫຸມພັນ ຜິວເຂັມພອນ ຫົວໜ້າກົມພັກກະຊວງ ປ້ອງກັນຄວາມສະຫງົບ, ມີການນໍາພະແນກການ, ກົມກອງອ້ອມຂ້າງແຂວງ, ນະຄອນ, ເມືອງ, ຜູ້ຊົງຄຸນວຸດທິ, ເລຂາ, ຮອງເລຂາ ແລະ ຄະນະພັກ ພາຍໃນອົງຄະນະພັກ ປກສ ແຂວງ,ບັນດາເລຂາ, ຮອງເລຂາ ໜ່ວຍພັກຜູ້ແທນສົມບູນຕາງໜ້າໃຫ້ສະມາຊິກພັກຂົງເຂດ ປກສ ທົ່ວແຂວງ ເຂົ້າຮ່ວມ 157 ສະຫາຍ.

ໃນກອງປະຊຸມໃຫຍ່ຄັ້ງນີ້ ສະຫາຍ ພັນເອກ ຖາວອນ ບຸນກອງພີມ ຮັກສາການເລຂາອົງຄະນະພັກ ຫົວໜ້າ ກອງບັນຊາການ ປກສ ແຂວງ, ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ III ຂອງອົງຄະນະພັກ ປກສ ແຂວງ ແມ່ນມີຄວາມໝາຍ, ຄວາມສຳຄັນຫຼາຍ ເນື່ອງຈາກເປັນການຈັດຕັ້ງປະຕິບັດຕາມກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່, ປອດໄສ, ເຂັ້ມແຂງ, ໜັກແໜ້ນ. ຜູ້ແທນກອງປະຊຸມໃຫຍ່ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງອົງຄະນະພັກ ປກສ ສະໄໝທີ III, ເລືອກເອົາຄະນະບໍລິຫານງານພັກຊຸດໃໝ່ ເພື່ອເປັນແກນນຳຂອງອົງຄະນະພັກ ປກສ ແຂວງທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາວຽກງານ ປກສ ສະໄໝທີ III (ແຕ່ປີ 2020-2024) ໃຫ້ມີຄວາມໜັກໜ້ນເຂັ້ມແຂງ ແລະປະກົດຜົນເປັນຈິງ. ສະຫາຍ ພັນເອກ ຖາວອນ ບຸນກອງພີມ ຮັກສາການເລຂາອົງຄະນະພັກ ຫົວໜ້າ ກອງບັນຊາການ ປກສ ແຂວງຈໍາປາສັກ ຍັງໄດ້ຜ່ານບົດລາຍງານການເມືອງທັງສອງພາກ ຊຶ່ງຍົກໃຫ້ເຫັນຜົນງານອັນພົ້ນເດັ່ນໃນການນໍາພາໄລຍະ 5 ປີຜ່ານມາແຕ່ປີ 2015-2019 ໂດຍຍົກໃຫ້ເຫັນ ກໍາລັງ ປກສ ໄດ້ເຮັດໜ້າທີ່ເປັນຫຼັກແຫຼ່ງ ປ້ອງກັນຮັກສາສະພາບການທົ່ວແຂວງມີຄວາມເປັນລະບຽບຮຽບຮ້ອຍ,ມີສະຖຽນລະພາບທາງດ້ານການເມືອງທີ່ໜັກແໜ້ນ ຮັບປະກັນ ແລະ ເປັນທ່າແຮງໃນການຕ້ານ ແລະສະກັດກັ້ນການເຄື່ອນໄຫວຂອງກຸ່ມຄົນບໍ່ຫວັງດີ ແລະປະກົດການຫຍໍ້ທໍ້ໃນສັງຄົມ, ຊຸກຍູ້ເປັນເງື່ອນໄຂເຮັດໃຫ້ເສດຖະກິດ-ສັງຄົມ ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ. ກອງປະຊຸມໃຫຍ່ຄັ້ງນີ້ ຍັງໄດ້ມີການປະກອບຄຳເຫັນຫົວຂໍ້:ວຽກງານ ປ້ອງກັນສໍານັກງານ ອົງການ ເພື່ອຮັບປະກັນບໍ່ໃຫ້ສັດຕູແຊກຊຶມ, ວຽກງານແກ້ໄຂປະກົດການຫຍໍ້ທໍ້ໃນສັງຄົມຕາມ 5 ໂຄງການ, ວຽກງານປັບປຸງກໍ່ສ້າງຕາໜ່າງປ້ອງກັນຄວາມສະຫງົບງຢູ່ຮາກຖານ, ການຄຸ້ມຄອງລາຍຮັບ-ລາຍຈ່າຍ ແລະຊອກແຫຼ່ງທຶນເຂົ້າກົມກອງ, ວຽກງານການຄຸ້ມຄອງນັກໂທດ,ຕ້ອງຫາ ແລະດັດສ້າງໃນທົ່ວແຂວງ ແລະວຽກງານສໍາຄັນອື່ນໆ ມາ ຂໍ່ານັບຮັບຕ້ອນຕໍ່ກອງປະຊຸມ. ເພື່ອແນໃສ່ເຮັດໃຫ້ການດໍາເນີນກອງປະຊຸມໃຫຍ່ຜູ້ແທນອົງຄະນະພັກປກສ ແຂວງຄັ້ງທີ III ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫ່ຍຜູ້ແທນອົງຄະນະພັກ ປກສ ແຂວງຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ຂ່າວ: ເກດສະໜາ ແກ້ວສຸວັນນະແສງ