ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງສາທາລະນະລັດປະຊາທິປະໄຕ ປະຊາຊົນລາວ ຄັ້ງທີ IV ອັດລົງດ້ວຍຜົນສໍາເລັດ

ກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງສາທາລະນະລັດປະຊາທິປະໄຕ ປະຊາຊົນລາວ ຄັ້ງທີ IV ອັດລົງດ້ວຍຜົນສໍາເລັດ ໃນຕອນເຊົ້າວັນທີ 15 ກັນຍາ 2020 ພາຍຫລັງດໍາເນີນມາເປັນເວລາ  1 ມື້ເຄິ່ງ ພາຍໃຕ້ການເປັນປະທານຂອງ ທ່ານ ສອນໄຊ ສິດພະໄຊ ກຳມະການສໍາຮອງສູນກາງພັກເລຂາຄະນະພັກ ຜູ້ວ່າການທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວ,ໂດຍການ ໃຫ້ກຽດເຂົ້າຮ່ວມຂອງ ທ່ານນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກປະທານສະພາແຫ່ງ ຊາດ, ມີຄະນະບໍລິຫານງານພັກ, ສະມາຊິກພັກອ້ອມຂ້າງທະນາຄານແຫ່ງສາທາລະນະລັດປະຊາທິປະ ໄຕປະຊາຊົນລາວພ້ອມດ້ວຍພາກສ່ວນກ່ຽວຂ້ອງ.

ຕະຫລອດໄລຍະດໍາເນີນກອງປະຊຸມເປັນເວລາ 1 ມື້ເຄິ່ງ ຜູ້ແທນທີ່ເຂົ້າຮ່ວມກອງປະຊຸມໄດ້ພ້ອມກັນຮັບຟັງການຜ່ານບົດລາຍງານການເມືອງຂອງຄະນະບໍລິຫານງານພັກທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວ ໄລຍະຜ່ານມາທີ່ສະເຫນີໂດຍ ທ່ານ ສອນໄຊ ສິດພະໄຊ ກຳມະການສໍາຮອງ ສູນກາງພັກເລຂາຄະນະພັກ ຜູ້ວ່າການທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວ, ຮັບຟັງລາຍງານການຈັດຕັ້ງປະຕິບັດວຽກງານຕ່າງໆໃນຂະແຫນງການທະນາຄານໃນ 5 ປີຜ່ານມາແລະ ຍຸດທະສາດການພັດທະນາລະບົບສະຖາບັນການເງິນ ເງິນຕາ 5 ປີຕໍ່ຫນ້າ, ຮັບຟັງການປະກອບຄໍາເຫັນ ຂອງບັນດາຮາກຖານພັກທີ່ກ່ຽວຂ້ອງໃນຫົວຂໍ້ຕ່າງໆເປັນຕົ້ນ: ການຮັກສາສະຖຽນລະພາບເງິນຕາແຫ່ງ ຊາດໂດຍການນໍາໃຊ້ນະໂຍບາຍອັດຕາແລກປ່ຽນ ແລະ ການຄຸ້ມຄອງເງິນຕາແຫ່ງຊາດ, ການຮັກສາສະຖຽນລະພາບທາງດ້ານການເງິນ, ການຄຸ້ມຄອງລະບົບຊໍາລະບົດບາດຂອງຕະຫລາດການເງິນໃນການ ສະຫນອງທຶນໃຫ້ແກ່ວິສາຫະກິດຂະຫນາດນ້ອຍ ແລະ ຂະຫນາດກາງແລະຍຸດທະສາດການປັບປຸງ ພາລະບົດບາດຂອງທະນາຄານນະໂຍບາຍ.

ກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວ ຄັ້ງທີ IV ບັນດາຜູ້ແທນທີ່ເຂົ້າຮ່ວມໄດ້ພ້ອມກັນໃຊ້ສິດປະຊາທິປະໄຕບ່ອນບັດເລືອກຕັ້ງເອົາຄະນະບໍລິ ຫານງານພັກ ທະນະຄານແຫ່ງສາທາລະນະລັດປະຊາທິປະຊາຊົນລາວຈໍານວນ 15 ສະຫາຍ, ເພື່ອເປັນຫຼັກແຫຼ່ງແກ່ນສານ ນຳພາຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ IV ແລະເປັນໃຈກາງແຫ່ງການເຕົ້າໂຮມຄວາມສາມັກຄີເປັນເອກະພາບພາຍໃນກົມກອງ, ປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ,ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວໄດ້ເປັນເອກະພາບເລືອກເອົາ ສະຫາຍ ສອນໄຊ ສິດພະໄຊ ເປັນເລຂາ ຄະນະພັກ, ສະຫາຍຄໍາວົງ ທີບພະວົງ ເປັນຮອງເລຂາຄະນະພັກ, ສະຫາຍນາງ ວັດທະນາ ດາລາລອຍ ເປັນປະທານກວດກາພັກ, ສະຫາຍ ວຽງສະຫວັນ ໄຊຍະວົງ ເປັນຮອງປະທານກວດກາພັກ, ສະຫາຍ ອາລຸນ ບຸນຍົງ ເປັນຮອງປະທານກວດກາພັກ, ແລະ ກອງປະຊຸມໄດ້ ເຫັນດີເປັນເອກະພາບ ເລືອກເອົາຄະນະປະຈຳພັກທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວຈໍານວນ 5 ສະຫາຍ.

ໃນຕອນທ້າຍຂອງກອງປະຊຸມ ທ່ານນາງ ປານີ ຢ່າທໍ່ຕູ້ ກໍາມະການກົມການເມືອງສູນ ກາງພັກປະທານສະພາແຫ່ງຊາດໄດ້ສະແດງຄວາມຍ້ອງຍໍຊົມເຊີຍແລະຕີລາຄາສູງຕໍ່ຜົນສໍາຂອງກອງປະຊຸມຄັ້ງນີ້ິເຊິ່ງສະແດງໃຫ້ເຫັນເຖິງຄວາມສາມັກຄີທີ່ເປັນປຶກແຜ່ນ, ຫມາກຜົນແຫ່ງການເຕົ້າໂຮມສະຕິປັນຍາລວມຫມູ່, ການເສີມຂະຫຍາຍປະຊາທິປະໄຕຄວາມເປັນເອກະພາບສູງພາຍໃນຄະນະພັກ, ກໍ່ຄືສະມາຊິກພັກພາຍໃນຂະແຫນງການທະນາຄານ ທີ່ປະກອບສ່ວນຢ່າງຕັ້ງຫນ້າເຂົ້າໃນການກະກຽມ ເນື້ອໃນກອງປະຊຸມເຮັດໃຫ້ການດໍາເນີນກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງສາທາລະນະລັດປະຊາທິປະໄຕປະຊາຊົນລາວຄັ້ງທີ IV ອັດລົງດ້ວຍຜົນສໍາເລັດຢ່າງຈົບງາມ, ທ່ານມີຄໍາເຫັນຕື່ມວ່າ:ໄລຍະຜ່ານມາກໍ່ຄືປັດຈຸບັນເຖິງວ່າສະພາບການຂອງໂລກກໍ່ຄືຂອງປະເທດເຮົາ ໄດ້ຮັບຜົນກະທົບຈາກສີ່ງທ້າທາຍນາໆປະການໂດຍສະເພາະຈາກການລະບາດຂອງພະຍາດ ໂຄວິດ 19 ແຕ່ຄະນະພັກຄະ ນະນໍາກໍ່ຄືສະມາຊິກພັກພະນັກງານພາຍໃນຂະແຫນງທະນາຄານແຕ່ລະຂັ້ນໄດ້ທຸ້ມເທເຫື່ອແຮງສະຕິ ປັນຍາເຂົ້າໃນວຽກງານວິຊາສະເພາະຂອງຕົນຢ່າງແຂງແຮງສອດຄ່ອງກັບຕາມແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ ຂອງລັດຖະບານ, ເຮັດໃຫ້ການຮັກສາສະຖຽນລະພາບທາງດ້ານເງິນຕາແຫ່ງຊາດມີຄວາມຫມັ້ນທ່ຽງ, ປະກອບສ່ວນເຮັດໃຫ້ເສດຖະກິດມະຫາພາກຂະຫຍາຍຕົວ ຢູ່ໃນລະດັບດີສົມຄວນ ແລະ ໄດ້ຮັບການພັດທະນາເຂົ້າສູ່ລວງເລິກ, ພ້ອມທັງຮຽກຮ້ອງໃຫ້ຄະນະພັກຊຸດໃຫມ່ສືບຕໍ່ອອກແຮງເສີມຂະຫຍາຍມູນເຊື້ອສາມັກຄີເປັນປຶກແຜ່ນພາຍໃນ, ເຮັດໃຫ້ອົງຄະນະພັກກາຍ ເປັນໃຈກາງການຈັດຕັ້ງທີ່ມີຄວາມໜັກແໜ້ນ, ເຂັ້ມແຂງ, ເຊີດຊູສະຕິເປັນເຈົ້າ,ນໍ້າໃຈຮັບຜິດຊອບ ແລະຄວາມເປັນແບບຢ່າງນໍາໜ້າຢ່າງຮອບດ້ານຂອງຄະນະພັກ, ສ້າງໂອກາດແລະເງື່ອນໄຂອໍານວຍຄວາມສະດວກໃຫ້ແກ່ການພັດທະນາເສດຖະກິດສັງຄົມ ໂດຍສະເພາະໃນຂະແຫນງການທະນາຄານໃນຂອບເຂດທົ່ວປະເທດໃຫ້ນັບມື້ເຕີບໃຫຍ່ຂະຫຍາຍຕົວ ແລະ ມີຄວາມທັນສະໄຫມ.

ໂດຍ: ເດດອາລຸນ ແກ້ວວິໄລ