ກອງປະຊຸມໃຫຍ່ສະມາຊິກພັກ ຄັ້ງທີ V ຂອງອົງຄະນະພັກສູນກາງຊາວໜຸ່ມປະຊາຊົນ ປະຕິວັດລາວ ຈັດຂຶ້ນໃນວັນທີ 31 ທັນວາ 2020 ພາຍໃຕ້ການເປັນປະທານຂອງ ສະຫາຍ ອາລຸນໄຊ ສູນນະລາດ, ກໍາມະການສຳຮອງສູນກາງພັກ, ເລຂາຄະນະບໍລິຫານງານພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິ ວັດລາວ (ສຊປລ) ໂດຍການໃຫ້ກຽດເຂົ້າຮ່ວມຂອງ ສະຫາຍ ກິແກ້ວ ໄຂຄຳພິທູນ ຄະນະເລຂາທິການ ສູນກາງພັກ, ລັດຖະມົນຕີກະຊວງ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ພ້ອມດ້ວຍຜູ້ແທນສົມບູນ 128 ສະຫາຍ, ຍິງ 51 ແລະ ແຂກຮັບເຊີນເຂົ້າຮ່ວມ.
ກອງປະຊຸມຄັ້ງນີ້ ໄດ້ສະຫລຸບຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ໃນໄລຍະ 4 ປີ ນັບແຕ່ປີ 2017 ຫາ 2020 ທີ່ໄດ້ຢັ້ງຢືນເຖິງຜົນງານ, ຜົນສຳເລັດອັນເປັນພື້ນຖານ, ຕີລາຄາດ້ານດີ, ດ້ານຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຈາກການຈັດຕັ້ງປະຕິບັດຕົວຈິງ. ພ້ອມດຽວກັນນີ້ ຜູ້ແທນກອງປະ ຊຸມໃຫຍ່ ໄດ້ພ້ອມກັນຄົ້ນຄ້ວາ ແລະ ຮັບຮອງເອົາທິດທາງແຜນການໃນ 5 ປີ ຕໍ່ໜ້າ ເພື່ອເປັນບ່ອນອີງໃນການນຳພາການ ເຄື່ອນໄຫວປັບປຸງວຽກງານຮອບດ້ານຂອງອົງ ຄະນະພັກສູນກາງຊາວໜຸ່ມປະຊາຊົນປະຕິວັດລາວ ແລະ ຮັບຟັງການປະກອບຄຳເຫັນຂອງຜູ້ຕາງໜ້າຂອງອົງການຈັດຕັ້ງມະຫາຊົນຂອງສູນກາງຊາວໜຸ່ມປະຊາຊົນປະຕິວັດລາວ.
ນອກຈາກນີ້ ຜູ້ແທນກອງປະຊຸມໃຫຍ່ ໄດ້ປ່ອນບັດຄັດເລືອກເອົາຄະນະພັກຊຸດໃໝ່ ເພື່ອເປັນແກນນຳໃນການນຳພາການເຄື່ອນໄຫວ ແລະ ຈັດຕັ້ງປະຕິບັດໜ້າທີ່ການ ເມືອງຂອງອົງຄະນະພັກໃຫ້ມີປະສິດທິຜົນໃນຕໍ່ໜ້າ, ພ້ອມນີ້ ຍັງໄດ້ເລືອກເອົາຜູ້ແທນສົມບູນ ແລະ ສໍາຮອງ ເພື່ອໄປເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກ. ກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ກິແກ້ວ ໄຂຄໍາພິທູນ ຄະນະເລຂາ ທິການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ.
ໃນບົດລາຍງານການເມືອງທີ່ ສະຫາຍ ບຸນຕາ ເທບພະວົງ, ຄະນະພັກ, ຮອງເລ ຂາຄະນະບໍລິຫານງານສູນກາງຊາວຫນຸ່ມ ປະຊາຊົນ ປະຕິວັດລາວ ຂຶ້ນຜ່ານຕໍ່ກອງປະຊຸມຄັ້ງນີ້ ໄດ້ຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ມີຫລາຍດ້ານພົ້ນເດັ່ນ, ໃນນີ້ ສະເພາະການນຳພາວຽກງານວິຊາສະເພາະ ຄະນະພັກ ສຊປລ ໄດ້ຊີ້ນຳຈັດຕັ້ງຜັນຂະຫຍາຍມະຕິ X ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ເວົ້າລວມ, ເວົ້າສະເພາະແມ່ນໄດ້ລົງເລິກຊີ້ນຳຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຜູ້ແທນຊາວໜຸ່ມທົ່ວປະ ເທດ ໄດ້ຮັບຜົນສໍາເລັດໃນຫຼາຍດ້ານ ໂດຍສະເພາະແມ່ນບັນດາກົງຈັກເສນາທິການ ທີ່ເຮັດວຽກງານວິຊາສະເພາະພາຍໃຕ້ການນຳພາ-ຊີ້ນຳ ຂອງອົງຄະນະພັກ, ໜ່ວຍພັກ. ວຽກງານອົບຮົມຊາວໜຸ່ມ: ຄະນະພັກສູນກາງ ຊປປລ, ກົມອົບຮົມຊາວໜຸ່ມ ສຊປລ ໄດ້ສຸ່ມໃສ່ຄົ້ນຄວ້າ ແນວທາງ, ມະຕິ, ຄໍາສັ່ງຂອງພັກ, ໂດຍສະເພາະແມ່ນມະຕິກອງປະຊຸມໃຫຍ່ຂອງພັກແຕ່ລະສະໄໝ, ມູນເຊື້ອຂອງພັກ, ຂອງຊາດ, ກໍາລັງປະກອບອາວຸດ, ຊາວໜຸ່ມ ແລະ ຂະແໜງການອື່ນໆ. ໄດ້ຮຽບຮຽງ, ສ້າງເອກະສານເພື່ອຮັບໃຊ້ ປາຖະກະຖາ, ເລົ່າມູນເຊື້ອ, ສ້າງຫຼັກສູດຮັບໃຊ້ການສິດສອນຊາວໜຸ່ມ-ເຍົາວະຊົນ, ໄດ້ສຳເລັດການສ້າງ ແລະ ຮັບຮອງ ຄຸນລັກສະນະຂອງຊາວໜຸ່ມ ( 4 ມີ: ມີນໍ້າໃຈຮັກຊາດ, ມີຄວາມສາມັກຄີ, ມີຄວາມດຸໝັ່ນ, ມີຄວາມເກັ່ງກ້າ) ແລະ ເນື້ອໃນ ສໍາມະນາ ແລະ ເອກະສານອື່ນໆ. ວຽກງານຂະບວນການ: ໄດ້ຮັບການ ຊີ້ນໍາຈັດຕັ້ງປະຕິບັດສ້າງຂະບວນການຢ່າງເປັນຂະບວນການຟົດຟື້ນ, ໂດຍສະເພາະແມ່ນສຳ ເລັດການສ້າງຄູ່ມືວຽກງານ ຂະບວນການ, ຈັດຂະບວນຄາຣາວານຫວນຄືນມູນເຊື້ອການປະຕິວັດ; ຂະບວນຊ່ວຍເຫຼືອສັງຄົມຕ້ານໄພພິບັດທໍາມະຊາດ, ບໍລິຈາກເລືອດ, ແກ້ໄຂຄວາມທຸກຍາກ; ຂະບວນການກິລາ, ສິລະປະ ແລະ ຂະບວນການແຂ່ງຂັນສົ່ງ ເສີມພອນສະຫວັນດ້ານຕ່າງໆ ທັງໝົດຈຳນວນ 358 ຄັ້ງ, ເຊິ່ງມີການຈັດຕັ້ງຂອງພັກ, ອົງການປົກຄອງ, ອົງການຈັດຕັ້ງສັງຄົມ, ບຸກຄົນ, ນິຕິບຸກຄົນ, ສະມາຊິກຊາວໜຸ່ມລາວບັນດາເຜົ່າ ແລະ ໃຫ້ການຮ່ວມມືຢ່າງຫຼວງຫຼາຍ ເຊິ່ງມີເຂົ້າຮ່ວມ ທັງ ໝົດຈຳນວນ 270.302 ຄົນ; ຂະບວນການດັ່ງກ່າວ ໄດ້ມີຜົນສະທ້ອນອັນຕັ້ງໜ້າ ເຂົ້າສູ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດນັບມື້ນັບຫຼາຍຂຶ້ນ.
ສ່ວນ ວຽກງານເຍົາວະຊົນ-ອະນຸຊົນ: ຄະນະພັກ ສຊປລ ໄດ້ເອົາໃຈໃສ່ຢ່າງໃກ້ຊິດຕໍ່ການປັບປຸງຂະຫຍາຍການຈັດຕັ້ງເຍົາວະຊົນ-ອະນຸຊົນ ໃນຂອບເຂດທົ່ວປະເທດ, ສຸ່ມໃສ່ລົບລ້າງໂຮງຮຽນທີ່ບໍ່ມີການຈັດຕັ້ງເຍົາວະຊົນ ແລະ ສ້າງຂະບວນການປະຕິ ບັດຂໍ້ແຂ່ງຂັນ 3 ດີ 4 ຮູ້ຂອງເຍົາວະຊົນ ພວມມີຄວາມຟົດຟື້ນກວ້າງຂວາງ, ໄດ້ສຳ ເລັດການຮັບຮອງເອົາຄຸນລັກສະນະຂອງເຍົາວະຊົນ ຄື: 3 ຮ: ຮັກ, ຮຽນ, ຮູ້; ສຳເລັດການສ້າງວົງປະສານສຽງເຍົາວະຊົນທັນວາ; ນອກນັ້ນໄດ້ສ້າງກິດຈະກຳ ສະເຫຼີມສະ ຫຼອງວັນສໍາຄັນຂອງເດັກ, ເຍົາວະຊົນ, ສ້າງເວທີແຂ່ງຂັນຄວາມສາມາດດ້ານຕ່າງໆຂອງເຍົາວະຊົນ ຕິດພັນກັບທັດສະນະ ຢ້ຽມຊົມສະຖານທີ່ ປະຫວັດສາດ, ສຶກສາອົບ ຮົມມູນເຊື້ອ, ການຮັກສາສິ່ງແວດລ້ອມ, ຮັກການຮຽນ, ການອອກແຮງງານ. ວຽກ ງານພັດທະນາວິຊາຊີບ:ໄດ້ປະສານສົນທົບກັບບັນດາຂະແໜງການ ແລະ ທ້ອງຖິ່ນໃນຂອບເຂດທົ່ວປະເທດ ນັບທັງຄະນະຊາວໜຸ່ມເພື່ອນມິດຍຸດທະສາດ ແລະ ອົງ ການ ຈັດຕັ້ງສັງຄົມທັງພາຍໃນ ແລະ ຕ່າງປະເທດໃນການສ້າງວິຊາຊີບສ້າງວຽກເຮັດງານທໍາໃຫ້ແກ່ຊາວໜຸ່ມຜູ້ດ້ອຍໂອກາດ ເຊັ່ນ: ຝຶກອົບຮົມຊ່າງສ້ອມແປງ, ຕັດຫຍິບ, ເສີມສວຍ, ປູກເຫັດ, ມີຜູ້ເຂົ້າຮ່ວມຈໍານວນ 1.005 ຄົນ, ສາມາດປະ ກອບອາຊີບໄດ້ 70 % , ຝຶກອົບຮົມພາສາຕ່າງປະເທດ ແລະ ຄອມພິວເຕີ ມີຜູ້ເຂົ້າຮ່ວມ 18.871 ເທື່ອຄົນ, ສາມາດຍາດແຍ່ງທຶນຊ່ວຍເຫຼືອຈາກພາກສ່ວນຕ່າງໆປະກອບສ່ວນໃນການຝຶກວິຊາຊີບ ສ້າງວຽກເຮັດງານທໍາໃຫ້ຜູ້ດ້ອຍໂອກາດໄດ້ 1.090-800 ໂດລາສະຫະລັດ.
ນອກຈາກນີ້ ສະຫາຍ ບຸນຕາ ເທບພະວົງ ຍັງໄດ້ຍົກໃຫ້ເຫັນຜົນສໍາເລັດໃນຫລາຍດ້ານ, ລວມທັງຈຸດອ່ອນຂໍ້ຄົງຄ້າງ, ສາເຫດທີ່ພາໃຫ້ມີຜົນສໍາເລັດ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງໜ້າທີ່ຂອງອົງຄະນະພັກ ສູນກາງຊາວໜຸ່ມ ປະຊາຊົນ ປະຕິວັດລາວ ໃນ 5 ປີຕໍ່ໜ້າ ຕື່ມອີກ.
Loading...