ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມໃຫຍ່ສະໄໝສາມັນ ສຕລ ປະຈໍາປີ 2023 ຮັບຮອງຫລາຍວຽກງານສໍາຄັນ
ກອງປະຊຸມໃຫຍ່ສະໄໝສາມັນ ສະຫະພັນບານເຕະແຫ່ງ ຊາດລາວ (ສຕລ) ປະຈໍາປີ 2023 ຈັດຂຶ້ນໃນຕອນເຊົ້າວັນທີ 10 ທັນວາ 2023 ນີ້ ທີ່ໂຮງແຮມເມືອງແທ່ງ, ນະຄອນຫລວງວຽງ ຈັນ ພາຍໃຕ້ການເປັນປະທານຂອງ ທ່ານ ວີເພັດ ສີຫາຈັກຣ໌, ປະທານ ສຕລ, ໂດຍມີ ທ່ານ ກິ່ງມະໂນ ພົມມະຫາໄຊ ຮອງລັດ ຖະມົນຕີກະຊວງສຶກສາທິການ ແລະ ກີລາ, ທ່ານ ສົມສະຫວາດ ເລັ່ງສະຫວັດ, ປະທານກິດຕິມະສັກ ສຕລ, ພ້ອມດ້ວຍຜູ້ຕາງໜ້າ ສະຫະພັນບານເຕະແຕ່ລະແຂວງ, ຄະນະບໍລິການງານ ສຕລ ແລະ ສະໂມສອນໃນເປບຊີ ລາວລີກ ເຂົ້າຮ່ວມ.
ກອງປະຊຸມໄດ້ຮັບຮອງເອົາຫລາຍວຽກງານສໍາຄັນ ເຊັ່ນ: ຮັບຮອງເອົາບົດບັນທຶກກອງປະຊຸມໃຫຍ່ ສຕລ ປະຈໍາປີ 2022 ຄັ້ງວັນທີ 27 ທັນວາ 2022, ຮັບຮອງເອົາບົດລາຍງານກວດ ສອບບັນຊີ ປະຈໍາປີ 2022, ຮັບຮອງເອົາ ແຜນການເຄືື່ອນໄຫວ ແລະ ງົບປະມານ ສຕລ ປະຈໍາປີ 2024, ຮັບຮອງຄະນະອະນຸກໍາມະການການເລືອກຕັຕັ້ງການເລືອກຕັ້ງຄະນະບໍລິຫານງານ ສຕລ ສົກປີ 2024-2028. ພ້ອມນີ້ ກອງປະຊຸມ ໄດ້ຮັບຟັງລາຍງານການເຄື່່ອນໄຫວວຽກງານ ສຕລ ປະຈໍາປີ 2023, ລາຍງານການກວດສອບບັນຊີປະຈໍາປີ 2022 ແລະ ລາຍງານບົດສະຫຼຸບການເງິນ ປະຈໍາປີ 2023 ແລະ ສະເໜີແຜນການເຄືື່ອນໄຫວ ແລະ ງົບປະມານ ສຕລ ປະຈໍາປີ 2024.
ທ່ານ ວີເພັດ ສີຫາຈັກຣ໌ ປະທານ ສຕລ ໄດ້ຍົກໃຫ້ເຫັນວ່າ: ການແຂ່ງຂັນກີລາບານເຕະ ໃນປີ 2023 ຜ່ານມາມີ 9 ສະໂມ ສອນທີ່ຊະນະເລີດ ໃນນີ້: ຊ້າງນ້ອຍ ເອັຟຊີ ຄອງແຊັມບານເຕະເປບຊີ ລາວລີກ 1, ສະໂມສອນ ຊ້າງນ້ອຍ ເອັຟຊີ ຄອງແຊັມບານເຕະລາວລີກຍິງ, ສະໂມສອນ ເບ ສະຫວັນ ຄອງແຊັມຟຸດຊໍລີກ, ຊ້າງນ້ອຍ ເອັຟຊີ ຄອງແຊັມບານເຕະຊີງຂັນ ສຕລ ຮຸ່ນອາຍຸບໍເກີນ 15 ປີ ແລະ ສະໂມສອນ ຊ້າງນ້ອຍ ເອັຟຊີ ຄອງແຊັມບານເຕະ ຊີງຂັນ ສຕລ ຮຸ່ນອາຍຸບໍ່ເກີນ 18 ປີ. ນອກຈາກນີ້ ສຕລ ໄດ້ເປີດ ສູນຝຶກຈໍາປີ-ຈໍາປາ ເປີດແລ້ວ 5 ສູນ: ນະຄອນຫຼວງວຽງຈັນມີ 2 ສູນ, ຈໍາປາສັກ, ຫຼວງນໍ້າທາ ແລະ ຫຼວງພະບາງ ພາກສ່ວນລະ 1 ສູນ.
ກອງປະຊຸມ ໄດ້ຮັບຟັງການປະກອບຄໍາເຫັນຈາກ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານໄດ້ສະແດງຄວາມຊົມເຊີຍຕໍ່ຜົນສລາເລັດໃນການພັດທະນາວົງການກິລາລາວຕະ ຫລອດໄລຍະ 1 ປີ ຜ່ານມາ ຊຶ່ງມີຫລາຍດ້ານພົ້ນເດັ່ນ ສາມາດສ້າງຊື່ສຽງ ແລະ ກຽດສັກສີມາໃຫ້ຊາດລາວ, ພ້ອມນີ້ ທ່ານໄດ້ສະເໜີ ສຕລ ແລະ ບັນດາສະຫະ ພັນບານເຕະແຂວງ/ນະຄອນຫລວງ ໃນທົ່ວປະເທດສືບຕໍ່ເອົາ ໃຈໃສ່ຄົ້ນຄອງເພື່ອພັດທະນາໃຫ້ກິລາບານເຕະສືບຕໍ່ເປັນກິລາຍອດນິຍົມຂອງປະຊາຊົນລາວໃຫ້ຫລາຍຂຶ້ນກວ່າເກົ່າ, ທັງຊຸກຍູ້ສົ່ງເສີມພໍ່ແມ່ ກໍຄື ຜູ້ປົກຄອງນັກຮຽນຫັນມາມີສ່ວນຮ່ວມໃນວຽກງານກິລາໃຫ້ຫລາຍຂຶ້ນ. ການຂັບເຄື່ອນກິລາບານເຕະໃນໂຮງຮຽນໃຫ້ເປັນຂະບວນກວ້າງຂວາງກວ່າເກົ່າ, ອັນໃດເປັນມູນທີ່ດີຕ້ອງໄດ້ສືບຕໍ່, ສິ່ງໃດທີ່ຍັງເຮັດບໍ່ທັນໄດ້ດີຕ້ອງສືບຕໍ່ປັບປຸງແກ້ໄຂໃຫ້ດີຂຶ້ນແລະອື່ນໆ.
ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມເພື່ອຊີ້ທິດເຍືອງທາງຈາກ ທ່ານ ສົມສະ ຫວາດ ເລັ່ງສະຫວັດ ປະທານກິດຕິມະ ສັກ ສຕລ. ທ່ານໄດ້ສະເໜີໃຫ້ ສຕລ ແລະທຸກພາກສ່ວນກ່ຽວ ຂ້ອງ ເອົາໃຈໃສ່ 4 ວຽກງານສໍາຄັນ ຄື:
– ສະເໜີໃຫ້ກະຊວງສຶກສາທິການ ແລະ ກິລາ ມີນະໂຍບາຍທີ່ດີ ກວ່າເກົ່າຕໍ່ນັກກິລາທີມຊາດ ເວົ້າລວມ, ເວົ້າສະເພາະແມ່ນນັກກິລາບານເຕະທີມຊາດລາວ.
– ສະເໜີໃຫ້ພາກສ່ວນທີ່ກ່ຽວຂ້ອງຂອງແຕ່ລະທ້ອງຖິ່ນທົ່ວປະ ເທດມີການປະສານງານກັບ ສຕລ ແລະ ກະຊວງສຶກສາທິການ ແລະ ກິລາ ເພື່ອເຮັດແນວໃດໃຫ້ມວນຊົນຫັນມາສົນໃຈກິລາບານ ເຕະໃຫ້ຫລາຍຂຶ້ນກວ່າເກົ່າ.
– ສະເຫນີໃຫ້ບັນດາຫົວຫນ່ວຍທຸລະກິດທີ່ມີຄວາມສາມາດເຂົ້າ ມາມີສ່ວນຮ່ວມໃນການອຸປະຖຳນັກກິລາບານ ເຕະທີມຊາດໃຫ້ຫລາຍຂຶ້ນ ເນື່ອງຈາກຄວາມສາມາດຂອງລັດຖະບານໃນດ້ານນີ້ຍັງມີຈໍາກັດ.
– ສະເຫນີຄະນະບໍລິຫານງານ ສຕລ ສືບຕໍ່ບຸກບືນເຄື່ອນໄຫວວຽກງານຢ່າງສະເຫມີຕົ້ນສະເຫມີປາຍກວ່າເກົ່າ ເພື່ອກຽດສັກສີຂອງບ້ານເມືອງ ກໍຄື ປະເທດຊາດ.
ພາບໂດຍ: ສົງການ ພັນແພງດີ