ກອງປະຊຸມດັ່ງກ່າວໄດ້ໄຂຂຶ້ນໃນຕອນແລງວັນທີ 01 ສິງຫາ 2024 ຢູ່ທີ່ຫ້ອງປະຊຸມຫ້ອງການອຸດສາຫະກໍາ ແລະ ການຄ້າ ໂດຍພາຍໃຕ້ການເປັນປະທານຂອງ ສະຫາຍ ບຸນທັນ ພະວີໄຊ ກຳມະການພັກເມືອງ ເລຂາໜ່ວຍພັກຫ້ອງການອຸດສາຫະກຳ ແລະການຄ້າເມືອງ, ກອງປະຊຸມຍັງໄດ້ຮັບກຽດເຂົ້າຮ່ວມໂດຍ ສະຫາຍ ສຸວຽງທອງ ວົງຈຳປາ ຮອງເລຂາພັກເມືອງ ຜູ້ຊີ້ນຳວຽກພັກ -ພະນັກງານ, ມີ ສະຫາຍ ກວຽນທອງ ເທບທິດາ ຄະນະປະຈຳພັກເມືອງ ຮອງເຈົ້າເມືອງ ໆ ວັງວຽງ, ມີບັນດາເລຂາ-ຄະນະພັກ, ໜ່ວຍພັກອ້ອມຂ້າງ, ຄະນະຮັບຜິດຊອບຂັ້ນເມືອງ ແລະ ສະມາຊິກພັກພາຍໃນໜ່ວຍເຂົ້າຮ່ວມຢ່າງພ້ອມພຽງ.
ສະຫາຍ ບຸນທັນ ພະວີໄຊ ກໍາມະການພັກເມືອງ, ເລຂາໜ່ວຍພັກຫ້ອງການອຸດສາຫະກໍາ ແລະ ການຄ້າ ໄດ້ໃຫ້ກຽດຂຶ້ນຜ່ານບົດສຳຫຼວດການນຳພາລວມ ແລະ ສະຫາຍ ສົມໝາຍ ຄຳພິລາວົງ ຮອງເລຂາໜ່ວຍພັກໄດ້ຜ່ານບົດລາຍງານການເມືອງ ໂດຍສະເພາະແມ່ນຜົນງານໃນການນຳພາ-ຊີ້ນຳ ຂອງຄະນະພັກ, ສະມາຊິກພັກໃນໄລຍະຜ່ານມາສາມາດເຮັດລ້ອນໜ້າທີ່ໃນຫຼາຍດ້ານ ແລະ ສາມາດບັນລຸຜົນສຳເລັດຕາມແຜນການທີ່ວາງໄວ້, ບັນດາສະມາຊິກພັກໄດ້ມີແນວຄິດອຸ່ນອຽງທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ, ມີຈັນຍາບັນ, ຈັນຍາທຳ, ມີລະບຽບວິໃນ ມີການຕັດສິນໃຈສູງ ແລະ ມີນ້ຳໃຈເສຍສະຫຼະ ພ້ອມກັນນີ້ກອງປະຊຸມຍັງໄດ້ເປັນເອກະພາບຮັບຮອງເອົາທິດທາງແຜນການ ແລະ ຄາດໝາຍສູ້ຊົນໃນຕໍ່ຫນ້າ ກຳນົດມາດຕະການ ແລະ ວິທີຈັດຕັ້ງປະຕິບັດ ເພີ່ມທະວີຄວາມສາມາດໃນການນຳພາ-ຊີ້ນຳ ຂອງຄະນະພັກໃຫ້ເຂັ້ມແຂງ, ໜັກແໜ້ນ ແລະ ທັນກັບຄວາມຕ້ອງການຂອງວຽກງານ.
ກອງປະຊຸມຄັ້ງນີ້ ສະມາຊິກພັກສົມບູນໄດ້ພ້ອມກັນປ້ອນບັດຄັດເລືອກເອົາຄະນະພັກຊຸດໃໝ່ ເຊິ່ງໃນມະຕິຂອງກອງປະຊຸມຄັ້ງປະຖົມມະລຶກ ໄດ້ຕົກລົງເຫັນດີເປັນເອກະພາບຮັບຮອງເອົາ ສະຫາຍ ບຸນທັນ ພະວິໄຊ ເປັນເລຂາ, ສະຫາຍ ສົມໝາຍ ຄຳພິລາວົງ ເປັນຮອງທັງເປັນຜູ້ກວດກາ, ສະຫາຍ ຈັນສະແຫວງ ອຸດົມ ເປັນຄະນະ.
ຕອນທ້າຍ ສະຫາຍ ສຸວຽງທອງ ວົງຈໍາປາ ຮອງເລຂາພັກເມືອງ ກໍ່ໄດ້ໃຫ້ກຽດຂຶ້ນມີຄໍາເຫັນໂອ້ລົມ ເຊິ່ງສະຫາຍກໍ່ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພາຍໃນໜ່ວຍຂອງຕົນໄດ້ຮັບຮູ້ ເຂົ້າໃຈຕໍ່ແນວທາງຂອງລັດໃຫ້ເລິກເຊິ່ງຕໍ່ແນວທາງນະໂຍບາຍຂອງພັກ ສືບຕໍ່ປັບປຸງກົງຈັກຂອງພັກເປັນຕົ້ນແມ່ນການແບ່ງຄວາມຮັບຜິດຊອບພາຍໃນໜ່ວຍພັກໃຫ້ລະອຽດຈະແຈ້ງ, ມີແບບແຜນນຳພາ-ແບບແຜນເຮັດວຽກບົນພື້ນຖານຫຼັກການລວມສູນປະຊາທິປະໄຕ, ພ້ອມກັນເຕົ້າໂຮມຄວາມສາມັກຄີໃຫ້ໜັກແໜ້ນກວ່າເກົ່າ ເພື່ອສ້າງເປັນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ.
