ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫຍ່ ຄັ້ງທີ IV ຂອງໜ່ວຍພັກ ກົມອາຊີ-ປາຊີຟິກ ແລະ ອາຟຣິກາ

ກອງ​ປະ​ຊຸມ​ໃຫຍ່ ຄັ້ງ​ທີ IV ຂອງໜ່ວຍ​ພັກ​ ກົມອາຊີ-ປາຊີຟິກ ແລະ ອາຟຣິກາ ໄດ້ຈັດ​ຂຶ້ນ ໃນຕອນເຊົ້າຂອງວັນທີ 22 ມິຖຸນາ 2020  ໂດຍການໃຫ້ກຽດເຂົ້າຮ່ວມ​​ເປັນປະທານຂອງ ສະຫາຍ ​ສະ​ເຫລີມ​ໄຊ ກົມ​ມະ​ສິດ, ກໍາມະການສູນກາງພັກ, ເລ​ຂາຄະນະບໍລິຫານງານພັກ, ລັດຖະມົນຕີກະ​ຊວງ​ການ​ຕ່າງ​ປະ​ເທດ, ມີສະຫາຍຮັກສາການເລຂາໜ່ວຍພັກ ກົມອາຊີ-ປາຊີຟິກ ແລະ ອາຟຣິກາ, ບັນດາສະຫາຍເລຂາ, ຮອງເລຂາ ຈາກບັນດາໜ່ວຍພັກກົມອ້ອມຂ້າງພາຍໃນກະຊວງການຕ່າງປະເທດ ແລະ ຄະນະຜູ້ແທນກອງປະຊຸມເຂົ້າຮ່ວມຢ່າງພ້ອມພຽງ.

ກອງປະຊຸມໃຫຍ່ ຄັ້ງທີ IV ຂອງໜ່ວຍພັກກົມອາຊີ-ປາຊີຟິກ ແລະ ອາຟຣິກາ ໄດ້ໄຂຂຶ້ນພາຍໃຕ້ບັນຍາກາດທີ່ພະນັກງານ, ສະມາຊິກພັກ ອ້ອມຂ້າງອົງຄະນະພັກ ກະຊວງການຕ່າງປະເທດ ພວມອອກແຮງແຂ່ງຂັນກັນສ້າງຜົນງານຂໍ່ານັບຮັບຕ້ອນກອງປະຊຸມໃຫ່ຍ ຂອງອົງຄະນະພັກຕົນຢ່າງຟົດຟື້ນ ແລະ ວັນສະຖາປະນາ ສປປ ລາວ ຄົບ ຮອບ 45 ປີ. ກອງປະຊຸມໃຫຍ່ຄັ້ງນີ້ ຖືວ່າເປັນກອງປະຊຸມທີ່ມີຄວາມໝາຍສຳລັບຊີວິດການເມືອງຂອງຄະນະໜ່ວຍພັກ ແລະ ສະມາຊິກພັກທຸກສະຫາຍ, ເປັນຂີດໝາຍແຫ່ງການສືບຕໍ່ປັບປຸງ ແລະ ເພີ່ມທະວີການກໍ່ສ້າງໜ່ວຍພັກໃຫ້ມີຄວາມໜັກ ແໜ້ນເຂັ້ມແຂງຍິ່ງໆຂຶ້ນ ເພື່ອກາຍເປັນໜ່ວຍພັກປອດໄສ, ເຂັ້ມແຂງ, ໜັກແໜ້ນ ໃນອານາຄົດ. ກອງປະຊຸມໄດ້ມີປະກອບຄໍາເຫັນ ແລະ ເອກະພາບກັນຮັບຮອງເອົາ ບົດລາຍງານການເມືອງ ແລະ ບົດສໍາຫຼວດການນຳພາຂອງຄະນະພັກ ໃນໄລຍະ 5 ປີຜ່ານມາ ແລະ ກໍານົດທິດທາງໜ້າທີ່ຕໍ່ໜ້າ. ນອກນີ້, ຍັງໄດ້ມີການປ່ອນບັດຄັດເລືອກເອົາ ຄະນະໜ່ວຍພັກຊຸດໃໝ່ ຈຳນວນ 3 ສະຫາຍ, ຊຶ່ງໄດ້ເລືອກເອົາ ສະຫາຍ ບຸນທະນົງສັກ ຈັນທະລາດ ເປັນເລຂາໜ່ວຍພັກ, ສະຫາຍ ສຸລິສັກ ສຸລິທອນ ເປັນຮອງເລຂາໜ່ວຍພັກ ແລະ ສະຫາຍ ພັນທະວົງ ບຸດທະສະວົງ ເປັນກໍາມະການ ທັງເປັນປະທານກວດກາ ໜ່ວຍພັກກົມອາຊີ-ປາຊີຟິກ ແລະ ອາຟຣິກາ.

ໃນ​ໂອກາດ​ນີ້, ສະຫາຍ ສະ​ເຫລີມ​ໄຊ ກົມ​ມະ​ສິດ ກໍ​ໄດ້​ໃຫ້ກຽດໂອ​ລົມ​ຕໍ່​ກອງ​ປະຊຸມ ​ໂດຍໄດ້​ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກ ກົມອາຊີ-ປາຊີຟິກ ແລະ ອາຟຣິກາ ທີ່ຍາດມາໄດ້ຕະຫລອດໄລຍະທີ່ຜ່ານມາ ແລະ ໄດ້ໃຫ້ທິດຊີ້ນຳແກ່ຄະນະໜ່ວຍພັກຊຸດໃໝ່ໃຫ້​ສືບ​ຕໍ່​ ເສີມ​ຂະຫຍາຍ​ມູນ​ເຊື້ອ​ຂອງ​ຕົນ, ໃຫ້ຖືເອົາວຽກການເມືອງແນວຄິດ, ແບບແຜນວິທີການເຮັດວຽກ, ການກໍ່ສ້າງພັກ-ພະນັກງານ ແລະ ວຽກວິຊາສະເພາະເປັນບຸລິມະສິດຕົ້ນຕໍ, ໂດຍເພີ່ມທະວີການນຳພາ​ດ້ານການເມືອງ-ແນວຄິດ ຕໍ່ສະມາຊິກພັກ-ພະນັກງານ, ເພີ່ມທະວີຄວາມສາມັກຄີພາຍໃນໜ່ວຍພັກ, ຍົກສູງຫລັກການເຮັດວຽກແບບລວມສູນປະຊາທິປະໄຕ ຕັດສິນເປັນໝູ່ຄະນະ ແລະ ບຸກຄົນຮັບຜິດຊອບ, ກໍ່ສ້າງຂະຫຍາຍສະມາຊິກພັກໃຫ້ໄດ້ຄຸນນະພາບ, ການກໍ່ສ້າງບໍາລຸງ ພະນັກງານ ດ້ານການຄົ້ນຄວ້າ, ຂີດຂຽນ, ພາສາຕ່າງປະເທດ ຄຽງຄູ່ກັບຄວາມຮູ້ດ້ານວິຊາສະເພາະ ໃນດ້ານຕ່າງໆ ​ແລະ ​ເຊີດ​ຊູຄວາມເປັນເຈົ້າການ ແລະ ​ຄວາມຮັບຜິດຊອບຕໍ່​ໜ້າ ທີ່ການເມືອງຂອງຕົນ ເພື່ອຍາດໄດ້ຜົນສຳເລັດ ອັນໃໝ່ຍິ່ງໃຫຍ່ກວ່າເກົ່າ ແລະ ກໍ່ສ້າງໜ່ວຍພັກກົມອາຊີ-ປາຊີຟິກ ແລະ ອາຟຣິກາ ໃຫ້ກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນຕໍ່ໜ້າ. ກອງປະຊຸມໄດ້ປິດລົງດ້ວຍຜົນສໍາເລັດອັນຈົບງາມຕາມຈຸດປະສົງລະດັບຄາດໝາຍ.