ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫຍ່ ຄັ້ງທີ V ຂອງສະຫະພັນແມ່ຍິງ ຫສນຍ ຈັດຂື້ນດ້ວຍຜົນສຳເລັດອັນຈົບງາມ

ໃນຕອນເຊົ້າ ຂອງວັນທີ 30 ມັງກອນ 2020 ຢູ່ຫ້ອງປະຊຸມໃຫຍ່ຊັ້ນສອງຂອງຫ້ອງວ່າການສໍານັກງານນາຍົກ ລັດ​ຖະມົນຕີ (ຫສນຍ), ນະຄອນຫຼວງວຽງຈັນ, ກອງປະຊຸມໃຫຍ່ ຄັ້ງທີ V ຂອງສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ໄດ້ໄຂຂຶ້ນ ແລະ ໄດ້ດໍາເນີນໄປເປັນເວລາເຄິ່ງວັນ ພາຍໃຕ້ການເປັນປະທານຂອງສະຫາຍ ນາງບຸນໜັກ ຫຼວງລາດ, ປະທານສະຫະພັນແມ່ຍິງ ຫສນຍ, ແລະ ໂດຍການໃຫ້ກຽດເຂົ້າຮ່ວມຂອງສະຫາຍນາງ ປອ. ອິນລາວັນ ແກ້ວບຸນພັນ, ກໍາມະການສູນພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ; ສະຫາຍ ປອ. ເພັດ ພົມພິພັກ, ກໍາມະການສູນກາງພັກ, ເລຂາຄະນະພັກຫ້ອງວ່າການສໍານັກງານນາຍົກລັດຖະມົນຕີ; ພ້ອມດ້ວຍ ແຂກຖືກເຊີນ, ແລະ ສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ທັງໝົດ 151 ສະຫາຍ.


ກອງປະຊຸມໃນຄັ້ງນີ້ ໄດ້ດໍາເນີນໄປໃນບັນຍາກາດສ້າງສັນສາມັກຄີ ແລະ ມີຄວາມເປັນລະບຽບຮຽບຮ້ອຍດີ, ໂດຍບັນດາສະຫາຍຜູ້ແທນກອງປະຊຸມໄດ້ຍົກສູງຄວາມຮັບຜິດຊອບ ແລະ ສະຕິປັນຍາຂອງຕົນ ເຂົ້າໃນການປະກອບຄໍາຄິດເຫັນ, ຮັບຮອງເອົາລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະບໍລິຫານງານສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ຊຸດເກົ່າ ໂດຍໄດ້ທົບທວນ ແລະ ສັງເກດຕີລາຄາຄືນຈຸດດີ, ຈຸດອ່ອນ, ສາເຫດ ແລະ ບົດຮຽນທີ່ຖອດຖອນໄດ້ຈາກການຈັດຕັ້ງປະຕິບັດວຽກງານຂອງຄະນະບໍລິຫານງານ ຊຸດທີ 4 ໃນໄລຍະ 5 ປີຜ່ານມາ; ພ້ອມນີ້, ກໍ່ຍັງໄດ້ກໍານົດທິດທາງລະອຽດໃນແຕ່ລະດ້ານ ເພື່ອຈັດຕັ້ງປະຕິບັດໃນຕໍ່ໜ້າ.
ຫຼັງຈາກນັ້ນ, ກອງປະຊຸມກໍ່ໄດ້ປ່ອນບັດເພື່ອເລືອກຕັ້ງເອົາຄະນະບໍລິຫານງານສະຫະພັນແມ່ຍິງຫ້ອງວ່າການສຳນັກງານນາຍົກລັດຖະມົນຕີ ຊຸດໃໝ່, ຊຶ່ງມີຜູ້ລົງສະໝັກເລືອກຕັ້ງທັງໝົດ ຈຳນວນ 12 ສະຫາຍ, ເລືອກເອົາ 07 ສະຫາຍ.
ຜ່ານການເລືອກຕັ້ງ ແລະ ການດຳເນີນກອງປະຊຸມຄັ້ງປະຖົມມະລຶກຂອງຄະນະບໍລິຫານງານສະຫະພັນແມ່ຍິງ ຫສນຍ ຊຸດທີ V ໄດ້ຕົກລົງເຫັນດີເປັນເອກະພາບ ເລືອກເອົາສະຫາຍນາງ ບຸນໜັກ ຫຼວງລາດ ເປັນປະທານຄະນະບໍລິຫານງານສະຫະພັນແມ່ຍິງ ຫສນຍ; ສະຫາຍນາງ ວິລະສະຕີ ສົມບູນຂັນ ເປັນຮອງປະທານ, ທັງເປັນປະທານກວດກາ; ສະຫາຍນາງ ບຸນນະວັນ ຄົງມີໄຊ ເປັນຮອງປະທານ; ສະຫາຍນາງ ສຸລິກັນ ພົົມມະຈັນ ເປັນຄະນະບໍລິຫານ, ທັງເປັນຮອງປະທານກວດກາ; ສະຫາຍນາງ ສາຍລັດສະໝີ ອຸດົມຮັກ ເປັນຄະນະ; ສະຫາຍ ນາງ ສາຍສອນ ບຸນວິໄລ ເປັນຄະນະ; ສະຫາຍ ນາງ ມະນີວອນ ສິມມາລາວົງ ເປັນຄະນະ.


ໃນໂອກາດດັ່ງກ່າວ, ກອງປະຊຸມໄດ້ຮັບກຽດຢ່າງສູງ ຮັບຟັງການໂອ້ລົມ ແລະ ຊີ້ນໍາ ຂອງສະຫາຍ ດຣ. ນາງ ອິນລາວັນ ແກ້ວບຸນພັນ ແລະ ສະຫາຍ ປອ. ເພັດ ພົມພິພັກ, ເຊິ່ງທັງສອງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ສໍາເລັດໃນການນໍາພາ-ຊີ້ນໍາ ສະມາຊິກສະຫະພັນແມ່ຍິງຫ້ອງວ່າການສໍານັກງານນາຍົກລັດຖະມົນຕີ ໃນການປະຕິບັດໜ້າທີ່ການເມືອງຂອງຕົນ ແລະ ສາມາດຍາດໄດ້ຜົນສໍາເລັດຫຼາຍດ້ານ.
ພ້ອມດຽວກັນນັ້ນ, ບັນດາສະຫາຍການນຳທັງສອງ ຍັງໄດ້ສະແດງຄວາມເປັນຫວ່ງເປັນໄຍ ຕໍ່ດ້ານອ່ອນ-ຂໍ້ຄົງຄ້າງ ແລະ ຮຽກຮ້ອງໃຫ້ຄະນະບໍລິຫານງານຊຸດໃໝ່ ຈະຕ້ອງໄດ້ສືບຕໍ່ປັບປຸງແກ້ໄຂໃຫ້ໝົດໄປໂດຍໄວ.
ຈາກນັ້ນ, ສະຫາຍການນຳທັງສອງ ຍັງໄດ້ໃຫ້ທິດຊີ້ນໍາຕໍ່ກັບທິດທາງແຜນວຽກຈຸດສຸມໃນຕໍ່ໜ້າ ທີ່ຈະຕ້ອງໄດ້ສຸມໃສ່ຈັດຕັ້ງປະຕິບັດ ໃນໄລຍະ 5 ປີຕໍ່ໜ້າ ແລະ ກໍ່ເຊື່ອໝັ້ນວ່າ ຄະນະບໍລິຫານງານຊຸດໃໝ່ ຈະສືບຕໍ່ນໍາພາ-ຊີ້ນໍາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ໃຫ້ມີຜົນສໍາເລັດໃໝ່ ທີ່ຍິ່ງໃຫ່ຍກວ່າເກົ່າໃນຊຸມປີຕໍ່ໜ້ານີ້.

ຂ່າວ,​ພາບ: ກົມປະຊາສຳພັນ ສນຍ