ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ 6 ໄຂຂື້ນຢ່າງເປັນທາງການ

ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ 6 ໄຂຂື້ນຢ່າງເປັນທາງການໃນຕອນເຊົ້າວັນທີ 5 ຕຸລາ 2020 ພາຍໃຕ້ການເປັນປະທານຂອງ ທ່ານ ບົວຄົງ ນາມມະວົງ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງໆບໍ່ແກ້ວ ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ກຳມະ ການກົມການເມືອງສູນກາງພັກ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ມີຜູ້ແທນສົມບູນຈຳນວນ 223 ທ່ານ ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງ 9.191 ທ່ານ ພ້ອມດ້ວຍແຂກຖືກເຊີນເຂົ້າຮ່ວມ.
ໃນໂອກາດກ່າວໄຂກອງປະຊຸມ ທ່ານ ບົົວຄົງ ນາມມະວົງ ກໍາມະການສໍາຮອງສູນກາງພັກ, ເລຂາຄະ ນະບໍລິຫານງານພັກແຂວງ ເຈົ້າແຂວງໆບໍ່ແກ້ວ ໄດ້ຍົກໃຫ້ເຫັນວ່າ: ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ 6 ນີ້ແມ່ນຜົນສໍາເລັດລວມຍອດແຫ່ງສະຕິປັນຍາ, ຫົວຄິດປະດິດສ້າງຂອງຄະ ນະບໍລິຫານງານພັກແຕ່ລະຂັ້ນ ກໍ່ຄືພະນັກງານ, ສະມາຊິກພັກ ທະຫານ ຕຳຫລວດ ແລະ ປະຊາຊົນບັນດາເຜົ່າໃນທົ່ວແຂວງບໍ່ແກ້ວ ເພື່ອສືບຕໍ່ພາລະກິດປະຕິກວັດໃນໄລຍະໃໝ່ແຫ່ງການປົກປັກຮັກສາ ແລະ ພັດທະນາແຂວງບໍ່ແກ້ວໃຫ້ຮຸ່ງເຮືອງຈະເລີນກ້າວໜ້າຢ່າງບໍ່ຢຸດຢັ້ງ. ຕະຫລອດໄລຍະ 5 ປີຜ່ານມາ ຄະນະບໍລິຫານງານພັກແຂວງ ກໍ່ຄືອົງການປົກຄອງແຂວງທຸກຂັ້ນ ໄດ້ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ 5, ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ 8 ຂອງແຂວງຢ່າງຕັ້ງໜ້າ ໂດຍໄດ້ຫັນເປັນ 7 ແຜນງານ, 52 ໂຄງການ, ສ້າງແຜນດຳເນີນງານຂອງຄະນະບໍລິຫານງານພັກແຂວງສະໄໝທີ 5 ແລະ ບັນດານິຕິກຳຕ່າງໆຢ່າງກ້ວາງຂວາງ ແຕ່ຂັ້ນແຂວງລົງຮອດຮາກຖານບ້ານ ປະກອບສ່ວນສ້າງເງື່ອນໄຂສຳຄັນໃຫ້ແຂວງບໍ່ແກ້ວໄດ້ຮັບການພັດທະນາກ້າວຂື້ນ ສາ ມາດຍາດໄດ້ຜົນສຳເລັດພົ້ນເດັ່ນຫລາຍດ້ານ ສະແດງອອກດ້ານການພັດທະນາເສດຖະກິດມີການຂະຫຍາຍຕົວຢ່າງຕໍ່ເນື່ອງ ສະເລັ່ຍລວມຍອດຜະລິດຕະພັນພາຍໃນ ຫລື GDP 7,4 ສ່ວນຮ້ອຍຕໍ່ປີ ລາຍຮັບຕໍ່ຫົວຄົນບັນລຸໄດ້ຫລາຍກວ່າ 17 ລ້ານ ຫລື ປະມານ 1.900 ໂດລາສະຫະລັດຕໍ່ຄົນຕໍ່ປີ, ສ້າງບ້ານພັດທະນາໄດ້ 98 ບ້ານ, ສ້າງບ້ານນໍ້າເກີ່ງ, ເມືອງຕົ້ນເຜີ້ງ ເປັນຕົວເມືອງໃນຊົນນະບົດ, ລຶບລ້າງບ້ານທຸກຍາກໄດ້ 17 ບ້ານ ແລະ ລຶບລ້າງຄອບຄົວທຸກຍາກໄດ້ 1.870 ຄອບຄົວ ປະຈຸບັນທົ່ວແຂວງຍັງເຫລືອເມືອງທຸກຍາກ 3 ເມືອງ, 78 ບ້ານ ກວມເອົາ 30 ກວ່າສ່ວນຮ້ອຍ.
ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ 6 ນີ້ ຜູ້ແທນຈະໄດ້ພ້ອມກັນສັງເກດຕີລາຄາຄືນ ຜົນການຈັດຕັ້ງປະຕິບັດມະຕິກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ 5 ໃນໄລຍະ 5 ປີຜ່ານມາ ນັບແຕ່ 2016 ຫາ 2020 ແລະ ຜ່ານຮ່າງແຜນພັດທະນາເສດຖະກິດສັງຄົມ 5 ປີ ຄັ້ງທີ 9 ນັບແຕ່ 2021 ຫາ 2025 ລວມທັງບົດສຳຫລວດການນໍາພາລວມຂອງຄະນະບໍລິຫານງານພັກແຂວງ ສະໄໝທີ 5 ນອກຈາກນີ້ກອງປະຊຸມຍັງຈະໄດ້ດຳເນີນການປ່ອນບັດຄັດເລືອກເອົາຄະນະບໍລິຫານງານພັກແຂວງບໍ່ແກ້ວຊຸດທີ 6 ພ້ອມທັງປ່ອນບັດຄັດເລືອກເອົາຜູ້ແທນໄປຮ່ວມກອງປະຊຸມໃຫ່ຍ ຄັ້ງທີ 11 ຂອງພັກ ພິເສດກອງປະຊຸມຍັງຈະໄດ້ຮັບຟັງການໂອ້ລົມຈາກ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງຕື່ມອີກ.