ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມໜ່ວຍງານວິຊາການຮ່ວມ ອາຊຽນ-ຣັດເຊຍ ວ່າດ້ວຍການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ ຄັ້ງທີ 11 ໄດ້ຈັດຂຶ້ນໃນວັນທີ 4 ເມສາ 2024 ແບບອອນລາຍ ໂດຍພາຍໃຕ້ການເປັນປະທານຮ່ວມຂອງ ທ່ານ ພັອ ກີ້ ຈັນ ທະວົງສາ ຫົວໜ້າກົມພົວພັນຕ່າງປະ ເທດ ຫ້ອງວ່າການ ກະຊວງປ້ອງກັນຄວາມສະຫງົບ, ທ່ານ ນາງ ລາຣິສຊາ ນິໂກແລວາ ຫົວໜ້າພະແນກຕ້ານການກໍ່ການຮ້າຍ ແລະ ຕ້ານລັດທິຫົວຮຸນແຮງ, ກົມຕ້ານສິ່ງທ້າຍ ແລະ ໄພຂົ່ມຂູ່ແບບ ໃໝ່ ກະຊວງການຕ່າງປະເທດ ແຫ່ງ ສະຫະພັນຣັດເຊຍ, ມີ 10 ປະເທດສະມາຊິກອາຊຽນ, ຕີມໍ ແລັດສະແຕ ໃນນາມຜູ້ສັງເກດການ, ກອງເລຂາອາຊຽນ, ແລະ ປະເທດຄູ່ເຈລະຈາ ຣັດເຊຍ ເຂົ້າຮ່ວມ.
ກອງປະຊຸມໜ່ວຍງານວິຊາການຮ່ວມ ອາຊຽນ-ຣັດເຊຍ ຖືກກັບມາຈັດຄືນໃໝ່ ພາຍຫຼັງຖືກເລື່ອນ ນັບແຕ່ການແຜ່ລະບາດຂອງພະຍາດໂຄວິດ 19 ໃນປີ 2020. ກອງປະຊຸມຄັ້ງນີ້ ແມ່ນເວທີສໍາລັບປະເທດຄູ່ເຈລະຈາ ຣັດເຊຍ ແລະ ປະເທດສະມາ ຊິກອາຊຽນ ເພື່ອແລກປ່ຽນສະພາບໄພຂົ່ມຂູ່ຈາກການກໍ່ການຮ້າຍສາກົນ ແລະ ອາຊະຍາກໍາຂ້າມຊາດ. ພ້ອມນີ້, ກອງປະຊຸມຍັງໄດ້ປຶກສາຫາລືເປັນເອກະພາບກັນ ກ່ຽວ ກັບທິດທາງການສ້າງແຜນວຽກ ກອງປະຊຸມເຈົ້າໜ້າທີ່ອາວຸໂສອາຊຽນ ບວກຣັດ ເຊຍ ວ່າດ້ວຍການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ ເພື່ອເປັນບ່ອນອີງສໍາລັບການຮ່ວມມືໃນຕໍ່ໜ້າ. ພິເສດ, ສປປ ລາວ ໃນນາມປະທານຮ່ວມກອງປະ ຊຸມ ໄດ້ສະເໜີກອງປະຊຸມພິຈາລະຈາທົບທວນຄືນເອກະສານພາລະບົດບາດ ຂອງກອງປະຊຸມໜ່ວຍງານວິຊາການຮ່ວມ ອາຊຽນ-ຣັດເຊຍ ວ່າດ້ວຍການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ ເນື່ອງຈາກວ່າເອກະສານດັ່ງກ່າວຖືກຮັບຮອງນັບແຕ່ວັນທີ 19 ມິຖຸນາ 2008 ແລະ ກອງປະຊຸມກໍ່ເປັນເອກະພາບເຫັນດີໃຫ້ ສປປ ລາວ ເປັນຫຼັກ ໃນການປັບປຸງເອກະສານດັ່ງກ່າວ ໃຫ້ມີເນື້ອໃນສອດຄ່ອງກັບສະພາບ ການເຄື່ອນ ໄຫວກໍ່ການຮ້າຍ ແລະ ອາຊະຍາກໍາຂ້າມຊາດ ໃນໄລຍະປະຈຸບັນ.
ກອງປະຊຸມຄັ້ງນີ້ ໄດ້ດໍາເນີນໄປດ້ວຍບັນຍາກາດໄມຕີຈິດມິດຕະພາບ ຍ້ອນປະເທດສະມາຊິກອາຊຽນ ແລະ ປະເທດຄູ່ເຈລະຈາ ຣັດເຊຍ ລ້ວນແຕ່ຫ້າວຫັນ ແລະ ຈິງໃຈໃນການປຶກສາຫາລື ແລະ ພ້ອມກັນຄົ້ນຄ້ວາທິດທາງການຮ່ວມມືເຊິ່ງກັນ ແລະ ກັນ.
ຜົນໄດ້ຮັບຈາກກອງປະຊຸມຄັ້ງນີ້ ຈະຖືກນໍາໄປລາຍງານຕໍ່ ກອງປະຊຸມເຈົ້າໜ້າທີ່ອາວຸໂສອາຊຽນ ບວກຣັດເຊຍ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 16 ພາຍໃຕ້ການເປັນປະທານຮ່ວມ ກໍາປູເຈຍ ແລະ ປະເທດຄູ່ເຈລະຈາ ຣັດເຊຍ ໃນລະຫວ່າງວັນທີ 24-28 ມິຖຸນາ 2024 ທີ່ນະຄອນຫຼວງວຽງຈັນ, ສປປ ລາວ.
ພາບ-ຂ່າວ: ສິລິພອນ