ກອງປະຊຸມຄະນະກໍາມະການຊາຍແດນຮ່ວມ ລາວ-ກໍາປູເຈຍ ແລະ ກໍາປູເຈຍ-ລາວ ໄດ້ຈັດຂຶ້ນໃນ ວັນທີ 28 ມິຖຸນາ 2024 ທີ່ນະຄອນຫຼວງວຽງຈັນ, ສປປ ລາວ, ຄະນະຜູ້ແທນຝ່າຍລາວ ນໍາໂດຍທ່ານ ສະເຫຼີມໄຊ ກົມມະສິດ, ຮອງນາຍົກລັດຖະ ມົນຕີ, ລັດຖະມົນຕີກະຊວງການຕ່າງປະເທດ, ປະທານຄະນະກໍາມະການຊາຍແດນ ລາວ-ກໍາປູເຈຍ ແລະ ຄະນະຜູ້ແທນຝ່າຍກໍາປູເຈຍ ນໍາໂດຍທ່ານ ລໍາ ເຈຍ, ລັດຖະ ມົນຕີປະຈໍາຄະນະກໍາມະການຊາຍແດນ ແຫ່ງ ຣາຊະອານາຈັກກໍາປູເຈຍ, ປະທານຄະ ນະກໍາມະການຊາຍແດນ ກໍາປູເຈຍ-ລາວ, ໂດຍມີຜູ້ຕາງໜ້າຈາກຂະແໜງການຂອງສູນກາງ ແລະ ທ້ອງຖິ່ນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ກອງປະຊຸມໄດ້ຮ່ວມກັນຮັບຮອງເອົາບົດບັນທຶກຂອງກອງປະຊຸມ ຄັ້ງທີ 9 ຂອງຄະ ນະອະນຸກໍາມະການເຕັກນິກຊາຍແດນຮ່ວມ ລາວ-ກຳປູເຈຍ ແລະ ກຳປູເຈຍ-ລາວ ທີ່ໄດ້ຈັດຂຶ້ນ ໃນວັນທີ 27 ມິຖຸນາ 2024 ແລະ ໄດ້ຮ່ວມກັນຮັບຮອງຜົນການປະຕິບັດວຽກງານຂອງຄະນະວິຊາການເຕັກນິກທັງສອງຝ່າຍຢູ່ພາກສະໜາມ ໃນການກໍານົດຈຸດທີ່ຕັ້ງຫຼັກໝາຍຊາຍແດນເພື່ອປັກຫຼັກໝາຍຊາຍແດນແບບໃໝ່ປ່ຽນແທນຫຼັກໝາຍຊາຍແດນແບບເກົ່າ ແລະ ປັກຫຼັກໝາຍຊາຍແດນເພີ່ມເຕີມໃສ່ຕາມເສັ້ນຊາຍແດນ ຊື່ງວຽກງານນີ້ໄດ້ເລີ່ມມາແຕ່ ເດືອນພຶດສະພາ 2023 ແລະ ມາຮອດ ເດືອນມິຖຸນາ 2024, ສອງຝ່າຍສາມາດກໍານົດຈຸດທີ່ຕັ້ງຫຼັກໝາຍຊາຍແດນໄດ້ ຈໍານວນ 168 ຈຸດ (ຫຼັກໝາຍ), ໃນນີ້ມີຈຸດຫຼັກໝາຍຊາຍແດນເດີມ ຈໍານວນ 33 ຈຸດ (ຫຼັກໝາຍ) ແລະ ກໍານົດຈຸດຫຼັກໝາຍຊາຍແດນເພີ່ມເຕີມ ຈໍານວນ 135 ຈຸດ (ຫຼັກໝາຍ) ແລະ ສາມາດກໍ່ສ້າງຫຼັກໝາຍໃໝ່ໄດ້ສໍາເລັດແລ້ວ ຈໍານວນ 73 ຫຼັກໝາຍ ໃນແຜນການທີ່ຈະປັກຫຼັກໝາຍຊາຍແດນຮ່ວມກັນຕະຫຼອດເສັ້ນຊາຍແດນຈໍານວນທັງໝົດ 510 ຈຸດ (ຫຼັກໝາຍ) ທີ່ລັດຖະບານສອງຝ່າຍໄດ້ຕົກລົງຮ່ວມກັນ.
ສອງຝ່າຍຍັງໄດ້ປຶກສາຫາລື ແລະ ເປັນເອກະພາບກັນວາງທິດທາງແຜນການເຮັດວຽກຮ່ວມກັນໃນຕໍ່ໜ້າ ໂດຍມອບໝາຍໃຫ້ຄະນະວິຊາການສອງຝ່າຍ ລົງສໍາຫຼວດ ແລະ ເກັບກໍາຂໍ້ມູນຢູ່ພື້ນທີ່ຕົວຈິງຮ່ວມກັນ ຢູ່ບໍລິເວນທີ່ມີການຕົກລົງທິດເນັ່ງເສັ້ນຊາຍແດນແລ້ວ ແຕ່ບໍ່ທັນສາມາດເອກະພາບກັນໄດ້ທາງດ້ານເຕັກນິກຢູ່ພູມີປະ ເທດຕົວຈິງ ເພື່ອນໍາມາພິຈາລະນະແກ້ໄຂຕາມຂັ້ນຕອນ.
ພ້ອມດຽວກັນ ກໍໄດ້ມອບໝາຍໃຫ້ຄະນະວິຊາການສອງຝ່າຍປຶກສາຫາລືແກ້ໄຂຂໍ້ກໍານົດທາງດ້ານເຕັກນິກຮ່ວມ (TOR) ໃຫ້ສອດຄ່ອງກັບວຽກງານໃນປະຈຸບັນ ແລະ ໃຫ້ດໍາເນີນວຽກງານສ້າງຕາໜ່າງເຄົ້າພິກັດພື້ນຖານດາວທຽມ (GPS) ເພື່ອນໍາໃຊ້ເຂົ້າໃນວຽກງານການສໍາຫຼວດ ແລະ ປັກຫຼັກໝາຍຊາຍແດນຢູ່ພື້ນທີ່ຕົວຈິງ.
ກອງປະຊຸມຄັ້ງນີ້ໄດ້ດໍາເນີນໄປ ພາຍໃຕ້ບັນຍາກາດ ແຫ່ງ ໄມຕີຈິດມິດຕະພາບ ແລະ ໄດ້ອັດລົງດ້ວຍຜົນສຳເລັດອັນຈົບງາມ. ຜົນຂອງກອງປະຊຸມຄັ້ງນີ້ ເປັນການປະ ກອບສ່ວນອັນສໍາຄັນເຂົ້າໃນການເພີ້ມພູນຄູນສ້າງສາຍພົວພັນຮ່ວມມືຂອງສອງປະເທດຖານບ້ານໃກ້ເຮືອນຄຽງທີ່ມີມູນເຊື້ອອັນດີງາມມາແຕ່ບູຮານນະການໃຫ້ຂະຫຍາຍຕົວ ແລະ ແຕກດອກອອກຜົນຍິ່ງຂຶ້ນ, ຕອບສະໜອງຄວາມມຸ້ງມາດປາດ ຖະໜາອັນແຮງກ້າຂອງການນໍາສອງພັກ, ສອງລັດ, ກໍຄືຂອງປະຊາຊົນສອງຊາດ ລາວ-ກໍາປູເຈຍ ທີ່ຕ້ອງການສ້າງຊາຍແດນຂອງສອງປະເທດ ລາວ-ກຳປູເຈຍ ໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືຢ່າງຍາວນານ.
