ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກອງປະຊຸມ ຄັ້ງທີ 7 ຂອງບັນດາພາຄີ ອະນຸສັນຍາສາກົນ ວ່າດ້ວຍ ການຕ້ານການໃຊ້ສານກະຕຸ້ນຕ້ອງຫ້າມໃນກິລາ ທີ່ ນະຄອນຫຼວງປາຣີ, ປະເທດຝຣັ່ງ

ກອງປະຊຸມ ຄັ້ງທີ 7 ຂອງບັນດາພາຄີ ອະນຸສັນຍາສາກົນ ວ່າດ້ວຍ ການຕ້ານການໃຊ້ສານກະຕຸ້ນຕ້ອງຫ້າມໃນກິລາ (7th session of the Conference of Parties to the International Convention against Doping in Sport) ໄດ້ຈັດຂຶ້ນຢ່າງເປັນທາງການ ໃນລະຫວ່າງວັນທີ 29-31 ຕຸລາ 2019 ທີ່ ສຳນັກງານໃຫຍ່ອົງການອຸຍແນສໂກ, ນະຄອນຫຼວງປາຣີ, ປະເທດຝຣັ່ງ. ຕາງໜ້າ ສປປ ລາວ ເຂົ້າຮ່ວມກອງປະຊຸມໃນຄັ້ງນີ້ມີ ທ່ານ ຮສ.ປອ ຈັນສະໝອນ ປຣະສອນໄຊ, ທີ່ປຶກສາດ້ານການສຶກສາ ແລະ ວັດທະນະທຳ ປະຈຳ ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ປາຣີ ພ້ອມດ້ວຍຄະນະ. ມີຄະນະຜູ້ແທນຂັ້ນສູງຈາກອົງການສາກົນເພື່ອຕ້ານການໃຊ້ສານຕ້ອງຫ້າມໃນກິລາ, ຄະນະກຳມະການໂອລິມປິກສາກົນ ແລະ ຕົວແທນຈາກບັນດາພາຄີ ຫຼາຍກວ່າ 500 ທ່ານ ຈາກ 188 ປະເທດເຂົ້າຮ່ວມ.

ກອງປະຊຸມໄດ້ທົບທວນຄືນບັນດາມະຕິຂອງກອງປະຊຸມ ຄັ້ງທີ 6 ແລະ ຜົນການຈັດຕັ້ງປະຕິບັດຜ່ານມາ ພ້ອມທັງໄດ້ກຳນົດແຜນການໃນຕໍ່ໜ້າ. ໃນນັ້ນ, ກອງປະຊຸມໄດ້ປຶກສາຫາລື ກ່ຽວກັບ ການບໍລິຫານຈັດການກອງທຶນເພື່ອລຶບລ້າງການໃຊ້ສານກະຕຸ້ນຕ້ອງຫ້າມໃນກິລາ ແລະ ບັນຫາອື່ນໆທີ່ເປັນສິ່ງທ້າທາຍຕໍ່ການກິລາ. ກອງປະຊຸມໄດ້ດຳເນີນໄປຢ່າງຈົບງາມ ໂດຍມີການປະກອບຄຳຄິດເຫັນຢ່າງຟົດຟື້ນຈາກຜູ້ເຂົ້າຮ່ວມ ເພື່ອຫາທາງຮ່ວມມືກັນຕ້ານການໃຊ້ສານກະຕຸ້ນຕ້ອງຫ້າມໃນກິລາ ແລະ ສົ່ງເສີມການແຂ່ງຂັນກິລາແບບບໍລິສຸດ, ຍຸຕິທຳ ແລະ ມີຄວາມສະເໝີພາບເທົ່າທຽມກັນ. ນອກຈາກນັ້ນ, ກ່ອນໜ້າກອງປະຊຸມຈະເປີດຂຶ້ນ ຍັງມີກອງປະຊຸມເວທີປຶກສາຫາລືຂອງບັນດານັກວິຊາການ ແລະ ຄູ່ຮ່ວມ ໃນ 3 ຫົວຂໍ້ ທີ່ກ່ຽວຂ້ອງກັບກອງປະຊຸມຄື: 1) ປັນຍາປະດິດ ແລະ ການກະຕຸ້ນພັນທຸກຳ (Artificial Intelligence and Gene Doping); 2) ການສຶກສາໂດຍເນັ້ນຄຸນນະພາບ (Values-Based Education) ແລະ 3) ການມີສ່ວນຮ່ວມຂອງແມ່ຍິງ ແລະ ຊາວໜຸ່ມເຂົ້າໃນການກິລາ (Women and Youth engagement in sport).

ກອງປະຊຸມດັ່ງກ່າວ ໄດ້ຈັດຂຶ້ນທຸກໆ 2 ປີ, ສປປ ລາວ ເຂົ້າເປັນພາຄີຂອງອົງການຕ້ານສານກະຕຸ້ນຕ້ອງຫ້າມໃນກິລາສາກົນ ເປັນປະເທດທີ 184 ໃນປີ 2017 ໂດຍແມ່ນ ຫ້ອງການປະສານງານຕ້ານສານຕ້ອງຫ້າມແຫ່ງຊາດລາວ ເປັນຜູ້ປະສານງານ.

ຂ່າວຈາກ: ກົມການຂ່າວ, ກະຊວງການຕ່າງປະເທດລາວ