ສະພາແຫ່ງຊາດ ໄດ້ຈັດກອງກອງປະຊຸມ ຄົບຄະນະກຳມະການລະດັບຊາດ ປະຈໍາເດືອນສິງຫາ 2024 ຂຶ້ນໃນວັນທີ 23 ສິງຫານີ້ ທີ່ສະພາແຫ່ງຊາດ, ໂດຍການເປັນປະທານ ຂອງທ່ານ ໄຊສົມພອນ ພົມວິຫານ ປະທານຄະນະປະຈຳສະພາແຫ່ງຊາດ ປະ ທານຄະນະກຳມະການລະດັບຊາດ ປັບປຸງລັດຖະທຳມະນູນ ປີ 2015, ມີບັນດາທ່ານຄະນະປະຈຳການຄະນະກຳມະການລະດັບຊາດປັບປຸງລັດຖະທຳມະນູນ, ບັນດາຫົວໜ້າອະນຸກໍາມະການ, ຄະນະກົມ, ວິຊາການທີ່ກ່ຽວຂ້ອງເຂົ້າຮ່ວມ.
ຈຸດປະສົງເພື່ອຄົ້ນຄວ້າບັນດາເນື້ອໃນສໍາຄັນທີ່ສັງລວມໄດ້ ຈາກຜົນປະເມີນການຈັດຕັ້ງປະຕິບັດລັດຖະທຳມະນູນ ແລະ ຄໍາເຫັນເບື້ອງຕົ້ນຂອງຜູ້ເຂົ້າຮ່ວມປະເມີນ ໄດ້ສະເໜີປັບປຸງລັດຖະທຳມະນູນ ເພື່ອໃຫ້ສອດຄ່ອງກັບສະພາບການພັດທະນາໃນໄລ ຍະໃໝ່, ຄົ້ນຄວ້າປະກອບຄໍາເຫັນໃສ່ໂຄງຮ່າງເບື້ອງຕົ້ນຂອງຮ່າງລັດຖະທຳມະນູນ ສະບັບປັບປຸງ, ເກັບກຳຄໍາຄິດຄໍາເຫັນຂອງສັງຄົມຕໍ່ການຈັດຕັ້ງປະຕິບັດລັດຖະທຳ ມະນູນໃຫ້ຫຼາກຫຼາຍ, ກວ້າງຂວາງ ແລະ ເລິກເຊິ່ງ, ເປັນການສັງລວມແນວຄວາມຄິດໃນການຄົ້ນຄວ້າປັບປຸງເນື້ອໃນ ຂອງລັດຖະທຳມະນູນໃຫ້ມີເນື້ອໃນຖືກຕ້ອງ, ສອດຄ່ອງ, ຄົບຖ້ວນ, ສາມາດນໍາໄປສູ່ການພິຈາລະນາຮັບຮອງ ແລະ ຈັດຕັ້ງປະຕິບັດໄດ້.
ໃນກອງປະຊຸມ, ທ່ານ ໄຊສົມພອນ ພົມວິຫານ ກ່າວວ່າ: ກອງປະຊຸມຈະຮັບຟັງການສະຫຼຸບການເຄື່ອນໄຫວວຽກງານໄລຍະຜ່ານມາ ຂອງຄະນະກໍາມະການລະດັບຊາດ ປັບປຸງລັດຖະທໍາມະນູນ ແລະ ທິດທາງແຜນການຮອດເດືອນທັນວາ 2024, ບົດລາຍງານການປະເມີນຜົນການຈັດຕັ້ງປະຕິບັດລັດຖະທໍາມະນູນ ສະບັບປີ 2015 ຢູ່ຂັ້ນສູງກາງ ແລະ ທ້ອງຖິ່ນໃນທົ່ວປະເທດ, ແຜນການຈັດກອງປະຊຸມວິທະຍາສາດ ກ່ຽວກັບການປັບປຸງລັດຖະທໍາະນູນ ແລະ ບົດລາຍງານກ່ຽວກັບການປະເມີນການຈັດຕັ້ງລັດຖະທໍາມະນູນຕໍ່ກອງປະຊຸມກົມການເມືອງສູນກາງພັກ ໃນທ້າຍເດືອນສິງຫາ 2024 ແລະ ເພື່ອເຮັດໃຫ້ດ້ານເນື້ອໃນຂອງບົດສະຫຼຸບ, ແຜນການກອງປະຊຸມວິທະຍາສາດ ກໍຄືບົດລາຍງານທີ່ຈະນໍາໄປຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ ມີເນື້ອໃນຄົບຖ້ວນ, ຮັດກຸມ ທ່ານ ໄຊສົມພອນ ພົມວິຫານ ຍັງໄດ້ສະເໜີໃຫ້ບັນດາທ່ານທີ່ເຂົ້າຮ່ວມ ສຸມສະຕິປັນຍາ ຄົ້ນຄວ້າ, ປະກອບຄວາມເຫັນຢ່າງກົນໄປກົງມາ, ສ້າງສັນ ແລະ ກ້າວໄປເຖິຄວາມເປັນເອກະພາບຕໍ່ເນື້ອໃນ ເພື່ອເປັນບ່ອນອີງໃຫ້ແກ່ການປັບປຸງລັດຖະທໍາມະນູນ ປີ 2015.
(ຂ່າວ-ພາບ: ແສງຈັນ)
